Mi tampi lungthin a la tu Pacquaio nih Pathian he an i tonnak a phuan.

Misifak mi hna caah a tuahserhnak nih Pathian aa bochan taktaknak a langhter.

Kan theih cio bantukin Manny Pacquaio hi Filipino World Champion Professional boxer asi. Forbes nih a langhter ning ahcun kum 2013 in atu tiangah vawleicung lenteceih thiammi vialte lakah a hlawh sangcem 14 nak asi. Trinity Broadcasting Network (TBN) nih interview an tuah i, a chimmi hna cu-

Hi ka interview nak ahhin biaknak kong kan ceih lo, sihmanhsehlaw Pathian he i hawikomnak tu kan ceih tiah ralttha ngaiin a testimony cu a chim. A min in krihfa ka si ve tik ahcun zarhpini paoh ahcun biak inn ah kaa puum tawn. Asinain, nikhatni in zarhteni paoh ahcun bar (zudinnak hmun) ah ka kal tawn i, cun phe kaa kah tawn. A phunphun in sualnak lei ah ka rak kal, nupi ngeih hnu zongah nu duh hi a poi ah ka rak rel lo. Asinain, a donghnak ahcun Pathian thawngin hrintthannak ka co ve cang. Zisuh krih ka co hnu cun ka thluachuahnak hmuh mi vialte hi misifak mi hna caah ka hrawm ve hna. Ka chungkhar hna zong midang cungah zangfahnak ngei ve dingin ka cawnpiak tawn hna.

Keimah zong minthang ka si hlan ahcun mi sifak tukmi ka si, ihnak hmanh ngei lo in lamkam hnaah ka riak tawn, cun rawl eiding zong ka rak ngeih lo caah ti lawng hna ka rak ding tawn. Ka toncia mi vialte nih lungfimnak a ka pek i, teirial tein ka tuahmi kipah Pathian nih a ka umpi i, teitu ka si khawh nak hi asi. Atu cu ka thluachuah hmuhmi vialte cu midang caah ka hrawm ve cang hna.

Hnangamnak taktak hi suingun chawva silo in zisuh sin lawnglaawng in ara timi hi Manny Pacquaio nih aa fiang tuk. Cun mirummi hna zong an ngeihchiah, misifak hna sinah hrawm ve dingin a sawm fawn hna. Zeiruangah kan ti ahcun kan ngeihciah vialte cu kan thih tikah kan thlan ah kan i kal pi kho lo. Pathian kan dawt ahcun a bia lawngin dawt siloin tuahserhnak tuin kan dawt taktak a herh.

 

 300 total views,  1 views today

Leave a Reply

Your email address will not be published. Required fields are marked *