Nupi tha siding kong hi cu tampi tial tawn asi cang, atu ah cun “Nupi tha damter le nun nuamternak kong asi ve lai??

Nupa ingeih kan si cang ah cun kan timh bik mi cu, thil zei poh ah chungkhar thanchoter hi asi, cun Nupa dam chung ah tha dam le nunnuamter pin ah duh dawtnak le theithiam nak nih hin, chungkhar dam chung khuasaknak ah mi zohchunh awk tlak asi tawn, Nupa nuamnak ah hin mawhphurnak ngeih veve kan si, mah ah cun a thleicia in Pa nih mawhphurnak sang deuh kan ngei, aruang cu chungkhar ah alu bik kan si caah asi, mah caah cun atang lei bantuk in points 5 hna hi ahman thiam pohpoh chungkhar hi damchung fek tein thancho nak le tlamtlingnak ahmuh tawn khi asi.

1.Zumngamhnak : Nupi/Pasal Ingeihnak tlamtlintertu hramthawhnak cu, Zumngamhnak veve ah hin a hngat bik mi asi, Nan nupi cu zumtlak asi tiin zumngamhnak ding asi, a thil tuah kip le a um kalnak ah siseh, hawi kawm ngeihnak ah siseh, athil tuahnak ah zumngamh ding ah siseh, theithiam piak in zalongte in umter ko, Amah belte cu, a umtu ning ah dik lonak angeih sual zong ah, thin hunnak le lung awi lonak kha langter hrimhrim ding asi lo, theithiam tein thil sining cu fiangte in chim piak lawlaw ko, cucu nupi lung nuamternak lam pakhat asi.

2.Thinhun nak langter lo ding : Nupa, aho poh hi ruahnak akhat timi hi a um kho lo, thin hun bal lo le lung awi bal lo hi kan um lo, Mi cheu khat asum kho lo mi kan um lio ah asum kho ngaingai mi kan um fawn, duh lo lei in thil acang sual ah cun thin hunnak langter lo in, can tlawm pal hnu ah kha bantuk thil nan tuah mi kha ka duh mi asi lo timi kong kha aw nemtein chim piak ko, cucu nupi thadam ter nak lam asi.

3.Nupi umtu ning theithiam piak ding : Nu hi thla fatin tein Nu sinak ah thi angei tawn, mah lio can ah hin thin hun deuhnak le thil achim hnu hi chim nawlh peng tawn khi ahmang, cun holh hrang hi ahmang tawn, mi dang cung zong ah cu bantuk thin hunnak holh hmang afawi ngai lio asi, mah can lio hna ah Pa nih hin theithiamnak thuk deuh ngeih piak can asi, bia hrang ahman zong ah bia nemtein leh tawn hi philh hrimhrim hlah, Nupa ah chungkhar le fa hna hi ahngat caah theithiamnak sang bik ngeih lio can bak asi, cucu nupi nunnuamtertu asi.

4.Nupi cu dik lonak ah ngaihthiam ding asi : Minung hi aho hmanh mi tlamtling kan um lo caah, thil tuah sual le dik lonak ngeih kho kan si ceu ko, mah thil tuah sual le dik lonak kha kan lung chung ah a um peng asi ah cun, Nupi caah lungnuam lo ngai ngai tawn khi asi, mah caah cun thil tuah sualnak le dik lonak cu philh cawlh ko, chim nawlh hmang ti hlah cucu iremhnak bik lam pakhat asi, Benjamin Franklin nih cun, nan nupi diklonak hmuh piak timhnak in duh anungnaktu kha hmuh piak na timh ah cun, mah nih cun chungkhar le Nupi caah relation ngeihnak tha bik asi.

5.Nupi bawm tawn ko : Nupi nih inchungkhar ah thil tuah mi tete hna ngeih peng asi tik ah, in ah na um can ah cun bawm vet awn ko, along anuam ngaingai ko lai, holhka nem hmang in zeidah tuah ding hna a um maw? Kathiam ve ko tiin nah al ah cun nupi lung anuamh ding cu afiang ko, mah thil nan tuah mi nih alanghter bik mi cu nupi cung ah dawtnak timi cu fiang tein alanghter khi asi, mah points 5 hna vialte bantuk ning tein chungkhar ah holhka, cawlcang ning hna hi, kan fapa fanu caah cawn piaktu tha asi cawlh ko caah, chungkhar nuam, chungkhar than cho, chungkhar zohchunh awk tlak tiah mi nih an chim tawn mi asi.

By – Papari Robert