Tuzaan Benjamin Sum le Esther Lai Thuam Hmanthlak Dawh Pawl – Salai Kawltu

Tuzaan Benjamin Sum le Esther Lai Thuam Hmanthlak Dawh Pawl

Note: A karlak ah Lai Tuanbia van Rel Pah

Tuzaan Benjamin Sum le Esther cu Lai thuam bak in an van in thuam. An i dawh kho tak tak. Esther nih cun hi ti hin a van langhter.  Laitlang ( Sui thantlang ) ah movie an ii yeih mi ah va zoh kawh ve nak caan tha ka ngei lunghmui a um ko ka zaan mang hmanh ah si kho te lai maw ka ti mi ka phu ka tawk lo in thluachuah a ka pe tu ka Pathian ka lawm. Kan Chinram , Lai thilthuam , Lai lam ,Lai nunphung pawl si hna seh. Hi movie zoh nak in fimnak tam pi zong ka la ve chuah tik cun rak zoh cio ve te uh. Chin Girl with Chin Dress 

Tuzaan Benjamin Sum le Esther Lai thuam i thuamnak hmanthlak pawl hi van zoh. A karlak ah Tuanbia rel sawh awk ka van langhter pah ve lai. Teng Lam Tuanbia. Teng Lam Thing Haunak

Voikhat cu, Teng Lam nih thingkung a tawri tein ka hau lai tiah a ti i thingkung cung ah a kai an ti. A ṭhutnak tang in a hau thluahmah lio ah khual tlawngmi pahnih nih an hmuh. “Teng Lam na thi lai lo maw, na ṭhutnak tang cun na hau” tiah an ti. Teng Lam nih a tawri tein pei hau ka duh cu tiah a leh hna. Thing cu a hau thluahmah ko i thing nih cun a tang ah a tluk pi i a nenh. Ee law, ka thi tak ko hi ta tiah a ti i a nenh ning te khan a rak it ko. Khual tlawng hna pahnih cu an khual lam in an rak kir lei ah Teng Lam thing nih a rak nenh ko kha an hmuh. A thi cang ko hi ta an ti i laang in an put. Sau nawn an kalpi hnu ah khin lam ṭe pahnih a umnak hmun an phan. Kehlei kap ah pakhat pa nih a kal pi i pakhat ve nih orhlei kap ah a kal pi ve. An i dok lengmang ko i cu lio ah Teng Lam nih cun “ka nun lio ah cun kehlei kap ah ka kal tawn ee. Ka thih hnu ah cun nan duhnak paoh ah ka kal pi ko uh” tiah a ti hna an ti. Khual tlawng pahnih nih cun “Teng Lam na thih ṭung lo, na zang lu kan in thah lai” tiah an ti. Teng Lam nih cun, “nan mah nih pei thing nih an nenh lai i na thi lai tiah pei nan ka ti ko cu” tiah a ti hna an ti.

Teng Lam Tlak-um Zuarnak. Ni khat cu Teng Lam nih Tlak-um zuar ding ah an khua in aa thawh ee an ti. Sau nawn a kal ah a liang a fak tuk cang i ka liang kaa thleng tuah lai a ti ti a si. Thlanglei kap liang i a putmi kha, chaklei kap  liang ah thlen a duh. Cu tik ah orhlei kap liang i a putmi kha kehlei kap liang ah tleng ti lo in a mi pum ning pi in aa mer an ti. Tu nai te kha cu thlanglei kap ah a um si kaw, atu cu chaklei kap ah a um cang. Kaa thlen khawh cang tiah a ruah. A mi pum pi in aa mer caah a kal duhnak ah kal ti lo in an khua lei hoih in a rak kir diam an ti. Cu tik ah an khua lila cu a va phan ṭhan i an inn chak hna inn ah aa ṭhum an ti. A fa le nih ka pa a rak kir nain kan inn chak ah aa ṭhum tiah a nu cu an chimh. Teng Lam nih cun a fa le cu aho fa le dah an si hnga? An fim ning hi tiah a ti hna. An nu nih cun ziah kan inn ah tlung lo in mi dang in ah cun naa ṭhumh tiah a ti i Teng Lam nih cun mah nu nih a ka uar pah ko hi ta tiah a ti e an ti. Cu vial . . . 

 

Teng Lam Cite Thuhnk Kong. Voikhat ah Teng lam cu kawl khua pakhat ah cite cawk ah a kal an ti. Cite cu a hun phorh lulhmalh i inn ah cun a chiah hna i a um sia a rem ti lo, ka um lo kar ah an ka fir piak lai ti a phang i ka kip lo ah a thuh hna ti si. Mi dang nih an fir hnga maw, tiah a thuhnak hmun cu a va zoh, ka thuhnak hmun hi a him lo, keimah hmanh nih ka hmuh mi cu a ti i a lak ṭhan hna. Cutik ah thuhnak hmun cu a kawl lengmang i ti chung ah ka thuh ah a ṭha cem lai ti a ruah i ti chung ah cun a vung thuh hna. Nikhat a ruah hnu ah mi nih an fir hnga maw ka vung zoh tuah lai a ti i a thuhnak ah cun a vung kawl. A thuhmi cite cu a hmu ti lo. Ti chung cun a hung chuak i, ummm . . . keimah hmanh nih ka hmuh  lomi cu mi dang nih cun an hmuhkhawhnak ding a um lo, hika i ka rak thuhmi hi pei a him ngai hi, kaa thuh fuh bak a ti i aa lunghmuih ngai an ti.

Teng Lam le Siangpahrangpa. Voikhat cu, Siangpahrangpa nih ka in pawng ah tikhur kik taktak mi ka neih i cu ka ah cun suimilam pakhat hmanh um khawh a si lo a ti. Cu tikhur ah cun zaan khat a riak khomi nih ka fa nu nan co lai tiah thawng a thanh. Tlang val ṭhaṭha cu Siangpahrang fa nu co nakding ah cun, tikhur chung ah cun riah an i tim cio hna. Cu kong cu Teng Lam nih a theih ve i aa thawh ve ti si. Siangpahrang fa nu co ding aa timmi vial te le Teng Lam cu tikhur hram cun khat ṭhup in an dir ko hna. Khah, i paih dih cang uh tiah Siangpahrangpa nih cun a van ti hna i ti khur ah cun “phung” tiah an hung zuang cio hna. 

Mi cheu cu suimilam pahnih a um kho na, a cheu cu suimilam pali a um kho na an si. Ahohmanh zaan khua dei tiang ti chung i um ding cu an celh cio lo. An chuak dih. Teng Lam pakhat te lawng a taang ti a si.

Teng Lam cu a khua a sik tuk ve cang i a ka hmanh a cip kho ti lo. A therh in a therh cang. Zaan khuadei ti chung i um ding cu a fawi ṭung lai lo, Siangpahrang fa nu co ding kaa tim fawn a ti i a lung a dong ngaingai. Asinain, Siangpahrang inn lei hoih in khua a hei zoh i, mei ceu te khi a hei hmuh. A hna a ngam tuk i a lung a hung ṭhawng ṭhan. Dei lei a hung si cang i Teng Lam cu ti chung cun a hung chuak.  Siangpahrang inn lei panh in a kal thluahmah. A kal pah in Siangpahrang fanu ka co cang tiah a au pah bu in aa hlok, aa hlirh, a choi, a pet. Siangpahrang inn cu a va phan i, ka pu, ka pu, Siangpahrang na nun bangin ka nung ve. Na fa nu cu ka pe cang tiah a ti.

Siangpahrang pa nih cun, khah a si le rak lut tiah a ti. Teng Lam cu Siangpahrang inn chung ah cun a lut. Siangpahrang pa nih Teng Lam cu a thawh i, ka fa nu cu na ta a si cang, asinatein, zeitindah zaan khuadei te mah tluk a kikmi ti chung ah cun na um khawh tiah bia a hal?

Teng Lam nih cun, Ka pu, a fawi te ko.  Na inn i mei ceu te ka hmuh i cu nih cun a ka lumh ee tiah a ti. Cu tikah Siangpahrangpa nih cun ka inn mei ceu nih pei an lumh ko cu, ka fa nu cu kan pe kho lo tiah a ti. Teng Lam cu a lung a rawk tuk i Siangpahrangpa, i zoh, naa hmuh lai tiah a ti i a ke voithum a thik tak i a chuak ee an ti.

Teng Lam cu a lung a rawk tuk i Siangpahrang fa nu co nakding ah hi ti hin khua a khang. Siangpahrangpa a kal tawnnak lam pawng ah rawl a chuang an ti. A buh um cu thingpar ah a thlai, a tang ah lungthu cu a bunh i mei cu a kau an ti. Ni fatin cu ti cun a tuah leng mang. Cu tikah, Siangpahrangpa nih nifatin Teng Lam nih cu ti rawl a chuan lengmang cu a hmuh tik ah a um kho ti lo. 


Siangpahrangpa nih cun, Teng Lam  mahka ah cun zeidah na tuah tiah a hal. Teng Lam nihcun rawl ka chuang tiah a ti. Khoi, na buh um cu tah? Teng Lam nih Ka pu deu, buh um cu thingkung par ah a um ko tiah a ti. Siangpahrangpa nihcun, na hruh nih maw an thawh? Thingpar ah buh um na chiah i hika ah mei na kau mi cu zeitikahdah a hmin khawh lai tiah a ti. Teng Lam nih hmin kho, hmin kho. Zei ka hngal ee ti lo ah, tiah a Siangpahrangpa cu a hei leh. Siangpahrangpa nih teng Lam cu a thawh i, na hruh hi na ka zawrh siang hnga maw? tiah a ti. Teng Lam nih a thawh i, na inn le na tikhur umnak khi zeitlukdah aa hlat?,  hika i rawl ka chuanmi hi a hmin kho lai lo tiah na zumh a si ahcun, na fa nu co nakding ah ti chungah ka rak um lio ah khan na inn mei ceu te nih a ka lumh ee, kan ti i na fa nu na ka pek cangmi na ka chuh ṭhanmi kha tuak tuah, na inn in meng khat a hlatnak hmun in na mei ceu te nih a ka lumh kho hnga maw tuak? tuah?. Mithalo na si, tazaa kan cuai lai tiah a ti. Cu tikah Siangpahrangpa cu a lung a dong i cu ni thok in pu tu sinak kha an fehter tiah an ti. Cu vial . . . . 

Leave a Reply

Your email address will not be published. Required fields are marked *