US ram ah Laipa caah Nupi Ngeih a Harning a Phuannak (US hi um duh ding a rak si lo)

Vawleicung ram vialte lak i TOP a si mi USA hi a nuam lai tiah na ruat maw? US a phan ballomi caah cun US hi vanram tluk deng i tahchunh a si tawn. Asianin a takram (reality) ah US hi a Chin mi caah a nuam tak tak maw? US i khua a sami kan unau Chin miphun hna i an i nuam tak tak maw? Nuamhnak (happiness) tiah ka timi tahfung hi zeibantuk khi dah a si? Thinlung nuamh maw biapi deuh taksa nuamhnak?

Ralzaam dinhmun in Chin mi thong tampi US si seh vawleicung ram lianngan tampi kan phan hna. Chin mi umlonak ram a um ti lo ti tiang chim a si cang. Chin mi lawng si loin kawlram mi hrim hrim US ah kan rak tam tuk. Rian phun phun an tuan cio. USA ah hin 1975 kum thok in USRAP timi U.S. Refugee Admission Program in vawleicung ram kip um Refugee pawl cu a luhter tawn hna i, 1975 kum in tukum June 30,2017 tiang ah Refugee 3,386,771 an luh cang. Hi hna lak ah 5% (169,949) hi Kawlrammi an si.

The BACI (The Burmese American Community Institute Research Team) hna nih cun Kawlrammi refugees US i lut 169,949 chungin miphun hoih i um zat fiang tein a kherhlai hnu ah a tanglei bantuk hin a rak tthen hna:-

Karen = 71,353, Chin = 59,679,Karenni/Kayah = 12,490,Burman/Bama = 5,878,Kachin = 3,916,Arakan/Rakhine = 2,531
Mon = 2,261,Shan = 1,212, Others = 10,629 (Rohingya, Chinese, Tamil etc.)

Kawlrammi Indiana State i ummi dihlak cu 23,629 an si. Fort Wayne le Indianapolis hna ah khua an sa.
Indianapolis ah kawlram mi 17,662 an um i, hi lak ah 86% a minung in 15,203 cu Chin mi an si. Chin mi hna biakinn lawng hmanh 40 leng a um cang. Indianapolis hi USA khuapi ahcun Chin mi tam bik nak a si. Asinain hi tluk Lai mi nih kan fuhhnawhmi USA ram ah Laimi an i nuam tak tak maw? A tanglei video hi US um Laimi nih zapi zoh khawh ding i You Tube an chiahmi video a si.

Hi video ah hin Laimi caah US um a harning, US ah nupi ngeih lungrethei a si ning, US ah caan nih mi a uk ning vialte a chim. Nihchuak a si pah nain a chimmi hi a dik tak tak ti khawh a si. Theihtlei tak tak khi a si. Zoh awk tlak tiah ka ruah caah ka van share chinmi a si.

Kap khat lei nih kan tuak tthan lai. US a harning lawng ruah ahcun hnabeidong khi a si tak tak ve. Asinain The American Dream’ tiah an ti tawnmi US minung vialte caah.. cung sangpi i ivorh khawhnak lam.. caan ttha hi mi vialte nih aa tluk tein an ngeih dih ti a si ve. A tthatnak a um bang a hnabeidong a si nak zong a um ve. Kap hnih lengmang i khuaruah khawh hi a biapi bikmi a si.

Asianin hi video ah US um Laipa chimmi hi a dik tak tak ve.

Hi video hi zoh law na ruahnak comment nak ah rak langhter ve teh. 2015 kum i upload cangmi video a si.

Credit: Peter Ceu (You tube), Source:- BACI Scholars Findings – Refugee Processing Center (RPC), U.S. Department of State.

Leave a Reply

Your email address will not be published. Required fields are marked *