Aw Jerusalem, ka philh sual asi ah cun, Ka kut awrh lei nih hin thil a thiam mi hi philh ve koseh tiah, Jerusalem tluk in khuapi chiatter tam hi vawlei ah a um lo,

Jerusalem khuapi bantuk tluk in chiatter peng mi khuapi dang a um lai lo, anrak titawn bak mi kha asi, Jerusalem nih hin vawi 46 ral hna nih an kulh cang mi khuapi asi, vawi 13 hmun cheu khat hna chiatter khi asi, vawi 17 meivap minung um lo in a um manh cang, vawi 25 miphun dang dang hna nih umnak ah hman asi cang, atu bantuk hi a dirhmun asi ruang ah, Jerusalem hi khuapi mak/miracle le phun dang ngai mi khuapi asi nak hi atu tiang chim peng mi thawng pang dongh lo mi arak si.

Biaknak lei ah pathum an um, Christian, Juda le Mosolman hna Biaknak hmunpi le an biaknak inghahnak hmun ah an hmang dih ceu hna khi asi, Ngeitu bik sinak an icuh peng fawn mi hmun asi, mahruang ah hin an icuh peng asi pin ah, chiat nak an ton peng tawn fawn kha asi, Biaknak hmun biapi/pawimawh bi kasi pin ah, ahmunhma hi tlang sangtuk lo hmun nuam ngai mi asi, mahruang ah mikip nih hi khuapi hmun hi anrak duh ceu khi asi.

A hmunhma hi adik fawn caah, vawlei hmun dang dang hna nih Siangpahrang/king anrak ngeih ah hin, hruaitu thilti khawh deuh mi arak chuah ah cun, ngeih an duh tawn khi asi, ahmun ah um lio hna he an idoh peng fawn kha asi, mah tluk biaknak hmun biapi/pawimawh le a hmun hma umtu ning a dik fawn ruang ah, vawlei mi tampi lungthin cu Jerusalem lei long long ah hawikir tertu peng tawn, hi ruang ah ‘Jerusalem khuapi mak/khuaruah har bik’ tiah anrak ti mi zong hi a phu bak mi asi.

Jerusalem tlang le a hmun hma nih hin a hmutu hna mit a lak ngai tawn, mi lian le mi te, mi rum le sifak/rethei, Siangpahrang le Siangpahrang lo tiang in, an lungthin ram ah a cam tlat cang tawn khi asi, Nungak tlangval an iduhtuk cang mi bantuk in, Israel miphun hna, Juda prophet hna le an biaknak hla phuah thiam hna zong nih, an bia le hla ah an cawi sang an neng bal lo, an hlasak ah philh sual an siang lo, nihin ni tiang a min arak thangter asi.

Hi tluk in vawlei mi hna nih Jerusalem anrak uarnak le anrak thangthatnak chan cu, thil zei dang ruang ah si lo in, Pathian nih Abraham sin ah a bia kam tlamtlingter ding ah, a miphun thim Israel hna khuapi asi ruang ah asi ko, Abraham sin in biakam alak mi biaknak lei asi cang ah cun, Christian hna, Juda hna le Mosolman pawl nih hin, anrak uar/ngaisang bak mi asi, Jerusalem kong hi Juda hna lungthin ah faktuk in atla ti khawh ding khi asi.

Babulon acoyah nih sal caah an tlaih lio zong ah khan, an Jerusalem, Pathian umpinak khuapi an kal liam tak ah cun, an lungthin hi afaktuk tawn, kum 70 hrawng sal ah an um tak kha asi, Babulon ram ah Tigris Tiva pi phairuam nisen tang ah an lung a leng ngai ngai tawn mi cu, hla ah phuah chuak in, an philh ti lo nak ding ah mah hla hi phuah asi.

“Aw Jerusalem, ka philh sual asi ah cun, Ka kut awrh lei nih thil a thiam mi hi philh ve ko se;

Ka theih peng lo asi ah cun, Ka lei hi ka dang ah bet tlat ko se,” tiin hla anrak phuah (Sam 137:5-6) tiin an ṭap tlawk tlawk khi arak si.

Christian pawl lungthin zong ah Jerusalem hi Bawipa Jesuh ruang ah kan philh khawh ve bak ti lo khi asi, ṭhangthar hna san tampi tiang Jerusalem hi Biaknak pathum thinlung ram ah a bet tlat cang ruang ah, Nungak mui dawh cu a duhtu atam ve bantuk in le a duhtu pawl kar lak ah buainak atam tawn khi asi, cu bantuk in atu tiang ah hin, Jerusalem cu Christian hna, Juda hna, Mosolman hna karlak ah cun buainak hi, a dongh kho bak lo khi asi pin ah, adam kho ti lo zawtnak cu a cam peng ko cang cu mu!!

Mah biaknak pathum hna hi an chuah nak le an umnak hmun khat asi ko hmanh ah hin, a donghnak lei ah cun an kal duh ning le an biak duh ning atluk ti lo caah, a dang ceu in kalnak ngei in, Uico le Maheh bantuk an iremh lo peng khi asi, mahruang ah cun Jerusalem cu icuh lo awk tha lo dirhmun ah atu tiang a dir peng mi arak si.