Christmas lio ah Hlasak tawn mi ”U AMA” timi hi zei dah asul lam a si??

Christmas lio ah Hlasak tawn mi ”U AMA” timi hi zei dah asul lam a si??

Krismas hla tha tak leh lãr tak, sak nuam bawk si; ‘Ringtu zawng zawngte u…’ tih hla Mercer-a phuah Rev. F.W. Savidge-a lehlin, kumtin krismas dawna sak hlawh ber pawl hi a saka sak mai duh tawk lovin tawngkamah kan rawlh hnem hle. Entir nan-“u ama khawiahnge i hman dawn?; U ama vawi eng zat nge I hman tawh; kumin U ama chu kan khuaah ngei hman ka duh; u ama dawnah Thawmhnaw nalh deuh ka lei ang” titein kan tawng kauchhehah kan hmang uar hle. Ka hriat tirh phei chuan ‘u ama’ hi chapchãr kut anga Mizo kutpui emaw, engemaw ni pawimawh hran bik te a awm emaw ka ti thin.

Ka’n hriat chian nak chuan krismas hla “ringtu zawng zawngte u…” tih hla chang tawp zela “amah i lo fak ang u” tih laite mai hi an lo la kawi kual vel mai mai chu niin ka veng ta hawk a; thil hote angin lang mah se hun rei tak chu ngaihtuahna a ti vakvai ve hman a ni.

U AMA CHU ENG NGE A NIH?

U ama chu Lal Nimrod-a’n a thih hnua Ni atanga a thlarauvin a nupui thihsan vãnlalnu Semiramis-i rawn rãia fapa a hrinleh hnuhnawh Tamnuz piancham kumtin Dec 25-a Rom milem behovin an lawm thin elsên nana entawna AD 336 atanga Kristian kohhran hmasate’n Pathian fapa Isua piancham ni anga ngaia dãwt tih hre reng chunga tun thlenga kumtin Isua pianni anga Dec 25 an hman thin chu a ni.

Bible-ah hman tura thupek engmah a awm lo. He hunah hian Rev. leh Pastor, Kohhran upa leh rawngbãwltu zahawm pui puite’n kawrchung suit nawh khawng nalh tak tak ha chunga mahni Biak in pulpit theuh atanga Pathiannung leh kohhran mipuiho hmaa Isua pianni ni uk lo pui, timna nei miah lova huai taka dãwt hmanga-“vawiin hi chhandamtu nausên Isua Bethlehem bawng in tlawma a lo pianna ni a ni a, hlim takin kan tãna nãu lo piang chu i lãwm ang u” tia an au piap piap thinna ni a ni a; Pathianin engtin tak ngaii ang maw!

Chutiang bawkin, Pathian hunbi chhiar dan dik tak Bible calendar Nisan/Abib-Adar (anno mundi) ngainëpa, Pope Gregory XIII-in kum 1582AD atanga gregorian Calendar a siam chawp van thla fang dê leh tahrik nen inmil thei miah lo hmanga Pathian kumthar Nisan/Abib ni 1 pawh ni hlei lo, Rom milem pathian Janus hming chawia January tia phuah zui tãk, kumtin January ni 1 apianga Rev leh Pastors; Kohhran upa leh rawngnãwltu zahawm pui puite’n Pathiannung leh kohhranho hmaa dãwt sawi pawisa miah lova-“Vawiin January 1 hi kumthar ni duhawm tak a ni a, dam taka Pathianin min han hruai thlengleh ta hi a lãwmawm êm a, theihtawp chhuahin kumthar i lãwm ang u” tia ring tak taka an ãu piap piap thinte pawh hi Lalpa’n engtin tak ngai ang maw!

U AMA HMAN A TUL EM?

Kristiante zingah krismas hman hi a tul kher em ni? tia inhnialna hian hun rei tak a awh ta. Hman tul tlata ngai leh Serh thianghlim duh tam tak an awm laiin, hman tul ti lo leh ngai pawimawh lo tam tak an awm bawk. Chhandamtu kan Lal Isua kkan tana a lo piang hi alawmawm êm em rualin engvangin nge Rom milem be mite pathian fapa Tammuz Pianni kher kher chu Pathiannung fapa sual nei lo leh sawisel bo Lal Isua pianni anga kan sengluh ve kher kher le!

Kan biak vãn Pathian hian engtinnge A ngaih ang a, kan chungah engtinnge ro A rêl tak ang le? Ringtu Kohhran tam tak chuan-“Anpianni ni lo mah se, kan tana Lal lo piang hi a lãwmawm ema eng hunah pawh lãwm ila a pawina a awm hlei nem” tiin mahni tanhmun an siamrem sauh sauh thin. Engpawhnise, a chhãnna dik hmuh chhuah a nih theih nan Bible nen i han finfiah teh ang hmiang?

A CHHANTE?

Kristian engemaw zatin u ama an hman loh chhan an sawi danin milembeho kut ni phuahchawp dungthula ruahman chawp milem biakna chikhat a nih avangin Kristian dik takte tan hman tulna tur chhan a awm lo tih leh ” in cheimawi, chhang zai, thingphun, masi putar, hãr mei khuk, Carol, thawhlawm khawm, batti chhit, Isua lem leh Mari lem siam chawp, zanlaia dãr khawn, Thawmhnaw thar lei, dawh thlak, Zana tlaivar, ruai theh, in leh biak in, khawlãi cheimawi etc. zawng zawngte hi hmanlai Rom milembeho tihdan entawna lãk chhãwn vek a nih avangin kristiante tel vena chi a ni lova Pathian duh loh zawng a nih avangin hman tulna a awm lo” an ti ve mek bawk.

Thenkhat erawh chuan -“Eng tak mi tin tieng thin kha a awm a, khawvelah a lo kal mek a ni.(Joh 1:4-9);tih ziak kan hmuh angin kan tana nåusen lo piang hi alawmawm ema chhandamtu lo piang chu ringtute’n kan lãwm ngei tur a ni” an ti ve bawk. Hetiang ngaihdan inkalha inhnialna hi tun thlengin hun engemaw chen atang khan a awm tawh a ni.

Thenkhat dangleh chuan -“Krismas thingphun leh hãr mei khukte leh a bawlhlo rêng rêngte hi hmanlai milem bemite chin dan leh kalphung, milem biakna kaihhnawih thil lawilo a nih avangin ringtute inrawlhna chi a ni lo” an ti ve mauh mai bawk si; a eng chu nge rin zawk tur chu ni ang le? mahni theuh kan pawimawh ta. Kumin atan u ama hmain thla khat pawh hun kan nei tawh lo. U ama hmang turin Kristian Kohhran tam zawk kan inbuatsaihleh ta mup mup mai!

LALPA chuan heti hian a ti: Hnamte awm dan zir suh la, Vana chhinchhiahnate vangin zam hek suh u; Mite dante chu engmah lo mai a ni si a, Ramhnuaiah thing an kit a, Hreipuia a mi themthiam kutin an chei a, (.Jer 10:1, 2) tih ziak kan hmu. Bible-ah hian u ama hman tur emaw hman loh tur tih khapna engmah hmuh tur a awm lo. A chhan chu zirtirte leh thuthlungthar kohhranhote’n an hman ngai loh vang a nih bakah hmang tura thurochhiah a awm lova tlaikhawhnua phuah chawp mai a nih vang a ni.

Zirtirte leh ringtu pasaltha kal hmasate pawh khan u ama an hman loh chuan engvangin nge milem pathian fapa tammuz-a pian champha dec. 25 chu tãwmpuia Isua pianni anga dãwt hmanga vãn Pathian kan chawimawi ve chiam ringaw thin le? Kan Pathian nung, dmgkimtitheia hi A lãwm meuh ang em? Inngaihtuah chian a hun ta.

SUAL A KENG TEL EM?

U ama, hunpui hman lai hian mitin an phurin an zãuthau a, mihlim leh sakhawmi tan phei chuan a hlimawm lehzual thin. Hetihlai hian nula tlangvãl, thalai hawklak tan leh nula2-tlangvãl2 tan te, inngãiizawng leh inlêm mek tante leh misual tawrawt leh kaubawi deuh leh zu in mi leh ruihhlo timi tan pawh mahni theih dan kawng kawnga a nuam thei ang bera khawsak leh chêt lak hun lai a nih avangin sualna (crime) chihrang hrang pawh a hluar hun lai tak a ni thin. Mipat hmeichhiat hmansualna pawh a hluar thin avangin kumtin March-April velah chuan u ama leh kumthar hman rah chhuah vãnlal nãu ang ni si lo fanu fapa kêu hmabakhovin nula, nuthlawi dul an rawn tãwn puar dêt det a, kumtin September/October chho vel a nih meuh chuan fanu/fapa pêkin kan awm fo thin.

Sualna lahin inlår nan hun thaah ngaiin inrãwk, rukrük, tualthah, uire, inbum, pãwngsual, zuruih, insual buai, inrikrãpna a tam thin. Heng zawng zawngte hi ngun taka ngaihtuah chuan u ama hian sual keng tel a ni lawm ni a tih theih ãwm e. Heng avangte hian pianchampha lawm hi Kohhran thenkhat chuan an pawm zam mai mai lo va, kum 3,000 BCE kal taa lal Pharoa pianchampha lawmni pawh khan chhang semtu hotupa kha a lu tansak a ni a; chutiang bawkin lal Heroda pianchampha lawmni khan baptistu Johana lu tansak a nileh a. (Mat. 14:6-11). Hei vang hian u ma hian sualna chihrang hrang a keng tel a ni an ti a, an hmang duh hauh lo.

Hetiang ngaihdan nei, u ama hman tul ti lo Kristian kohhran nisarihni serh leh Sunday serhho zingah an awm nual. U ama hman tul ti lo nisarihni serhho zingah u ama bãwlhlo chihrang hrang paipãwna kumtin naupangho hrilhai hlaua chhuanlam siam chawpa u ama hmanna tur thawhlawm khawn ziah pãwl an awm thin nia sawi a awm bawk. U ama hman tul ti si lo hmang kumtin tho bawk si an nih duh hmel hle mai. (thup 3:25-16).

A TLÃNGKAWMNA

Hripui lên hmaa hlim taka biling a balanga, insaipuk chunga khuang tê leh khuangpui chumchilha dãrbenthek leh rithei chitin reng nen a hlim thei ang bera sap pop group-ho khuang ri aia mi hip zawk leh lungkuai zawk, rãl khat hla deuh atang pawha krismas, kumthar zãikhãwm thãwm hriat phãk ri tluk tluk leh solfa zãi rem thãwm rimawi tak tak hriattur awm thinte leh vengtina hãr mei khuk leh ruai sa bel rimtui tak takte leh in tina carrol thawmte hriattur awm tawh lovin hripui avangin a reh thuap thin kha a ni a, tunah erawh u ama hmang turin kan in saipukleh thei tan ta a, a lãwmawm hle.

Tu huat atan emaw, kohhran mal sawiselna vang emaw ni lovin Pathian hian rorelna dik tak (justice) A rawn hmangin a rawn kengkawh ngei dawn a; chutih hunah chuan A fapa pianni ni lo pui a pianni anga lo sawi piap piapte, leh kumthar ni lo pui kumthar anga lo puan khawl khawlte hi Pathianin justice a kalpui tak tak dawn a nih chuan phat hulna tur a vãng ngawtin a rinrawm. Eng ni pawh Krismas leh kumthar atan emaw lo hmang pawh ni ila, pulpitah dãwt sawi zui nan hmang kher ta lo ila a engthãwl thlak deuh tur.

Mahse, hre reng chungin dãwt kan sawi talh thin niin a lang. Hetiang renga dãwt pawh pawisa lova kan khawsa chho zel a nih chuan Pathianin kan chunga ro a rêl hunah chuan inchhir a sãwt dawn tawh si lo. Chuvangin, mitinte hian kan nitin nun dan hi fimkhurpui hle ila takna leh dikna nen Pathian ring tlat chungin hmalam i pan zel ang u kumin atang chuan u ama leh Kumthar tluang taka hman zel theih tawh turah ngai ila. Pathian rorelna erawh kan la hmachhawn theuh dawn a ni tih i hrenawn mawlh ang u.

Cre: Dr. C. Lalrampana