CNF/A Nih Chinram Khualtlawng Luh An Kham Nak Kong He Pehtlaiin Salai Htet Ni Nih Mah Ti Bak Hin A Chim Cang.

CNF/A Nih Chinram Ah Khualtlawng Luh An Kham

The Chin Post II 9 June 2023CNF/A nih Chinram chungah a um mi hna dah ti lo, ramkulh leng ah a um mi hna cu Chinram luh an kham tiah theih a si.
Hi kong he pehtlai in June 8 ah CNF/A nih theihternak cathanh an chuah. An cathanh chungah cun a tanglei bantukin an langhter.

1. Mi sawhsawh khualtawnnak leilawng (mawṭaw) in SAC ralhrang le hriamnam phurhthiar kan kham.

2. Chinram ah inntek mipi dah ti lo, a lenglei mi luh kan kham.

3. A biapi tuk mi thil ah Chinram luh a duh mi hna cu CDF le PDF hna theihpinak ca aa ken mi lawng luhter an si.

4. Hi zulh ding kan thanh mi a buar mi cu fakpi in dantat an si lai.
Hi kong he pehtlai in cathanh dang kan chuah hlan lo cu hi kan cathanh hi zulh ding a si lai.

Chinram ah SAC nih cunglei he tanglei he kahdohnak fakpi in a tuah cuahmah i minung thazang tampi chap a duh. Thazang chap ding mi hna cu anmah ralhrang leilawng hmang loin misawhsawh leilawng kha hramhram in chuh i hman an timh ti thawng kan theih. Cucaah SAC nih Chinram ah thazang an chap khawh lo nakdingah atu bantukin Chinram luh kan khamnak hi a si tiah CNF/A chimnak nawlngeitu Salai Htet Ni nih a chim.

Hi an cathanh hi Chin ramkulh dihlak a huap i khualtlawng hna, leilawng (mawṭaw) khaltu le leilawng dinhnak (cargate) i ṭuanvo ngeitu hna nih felfai tein an zulh a herh. An zulh lo i SAC he pehtlai in rian an ṭuan ahcun fakpi in dan kan tat hna lai tiah Salai Htet Ni nih cun a chimchap.

Credit : The Chin Post

SAC Ralkap Sakhan Hmun 5 cu KNLA le Ṭangṭi Phu Hna Nih An Laak

The Chin Post 8 June 2023June 6 Zing suimilam 4:00 in 7:00 kar ah KNLA le tangti phu hna nih KNU Kaw Htoo Lei hmunram, Mu khuakomh le Leido khuakomh chung um SAC ralkap umhmun khuarnak sakhan 5 cu an laak i, an hrawh dih lengah SAC ralkap eidin phorhnak hlei 3 zong an hrawh, tiah KNU nih an thanh.

KNLA nih an laakmi SAC ralkap sakhan 5 hna cu Yedwinkung sentari hngahnak sakhan, Nattankwin Palek sakhan, Kunchaungwah nichuahlei BGF sakhan le Tadaw sakhan hna an si i, an hrawh mi hlei 3 cu Nattankwin hlei, Ungnyepyin le Nwaypyin kar hlei, Htarsi le Htarsung hlei hna an si.

Kahdohnak ah hin SAC ralkap in 40 an thih pin ah 12 hliam an tuar, KNLA lei in minung 4 an nunnak a liam i, 13 an i hliam. KNLA tangti phu hna nih hriamnam zeimawzat le phaisa zong an laak, tiah KNU nih cun an thanh.

KNLA le tangti phu hna cu SAC Sakhan an lak lio ah Jet Fighter in voi 3, raltuknak helicopter in voi 6 a kah hna lengah SAC ralkap nih Sittaung tiva nitlaklei in nichuahlei khua hna ah hriamngan pehtlaih in an kah.
Hriamngan kahnak ruangah KNU Leido khuakomh in khuate 6 le KNU Mu khuakomh, khuate 5 in minung 4508 cu ralhrial in an zaam hna.

June 7 zing suimilam 8:15 i an hrawhmi Nattankwin hlei le Palek sakhan ah a rak phan ṭhanmi SAC ralkap hna nih, Nattankwin um khuami a zaam lomi pawl cu hramhram in an ṭhialter hna, tiah Karen National Union nih cun anmah facebook page ah an taar.

Credit : The Chin Post