Global Zophei Seminar i Hlasak aa zuammi pawl an thiam khawh ning (video thar) – Salai Kawltu

Global Zophei Seminar i Hlasak aa zuammi pawl an thiam khawh ning (video thar)

Note: Global Zophei Seminar i Hlasak aa zuammi pawl video cu a tanglei bik ah  a um lai. 

Modern Leitak ah tuahmi “Global Zophei Seminar, Lentecelhnak le i Zuamnak cu tlamtlingte in an lim. Hi Global Zophei Seminar, Lentecelhnak le i Zuamnak ah hin zuamnak phuntling tuah a si. A tling tuk hringhran. Muidawh miss zuamnak sieh hlasak zuamnak,Paih le lentecelhnak phuntling in zuamnak tuah a si. Hlasak zuamnak zong tuah a si i an thiam kho tak tak. Hlasak zuamnak idol i teinak hmu tu hna cu  1st: Mai Mang Hlei Ṭial (Congthia)
• 2nd: Mai Van Rem Mawi {Aibur)
• 3rd: Mai Za Ci Sung {Aibur} hna an si.

An i zuamnak video a tanglei bik ah a um lai. An thiam kho tak tak. 

Cu hna lakah Muidawh Miss zuamnak zong an tuah. Hi Muidawh miss zuamnak i teinak (winner) a hmutu hi Sui Tin Thlem (Hlamphei) a si. Sui Sui hi aa dawh kho tak tak. A pumru, a cawlcangh le a biachim holhrel zong a tha tiah chim a si. A hmanthlak zong kan van zoh ve lai.

Cu hlan deuh te ah Zuamnak Phun phun i teinak a hmutu hna cu a tanglei bantuk in an si.

Modern Leitak ah tuah mi “Global Zophei Seminar” Lentecelhnak le I Zuamnak pawl results cu a chuak cang.
A tanglei bantuk an si lai-

Idol:
• 1st: Mai Mang Hlei Ṭial (Congthia)
• 2nd: Mai Van Rem Mawi {Aibur)
• 3rd: Mai Za Ci Sung {Aibur}

Miss:
• Winner: Mai Sui Tin Tlem (Hlamphei)

  • 1st runner up: Mai Anita Duh Chin Ṭial (Khuabung)
  • 2nd runner Up: Mai Sarah ( Leitak Zipi )
  • 3rd Runner Up: Mai Deborah Sui ( Leitak Modern )

Volleyball ( Pa ):

  • Champion: Hlamphei
    • 2nd: Lawngtlang
    • 3rd: Leitak ( ___ )

Volleyball ( Nu ):
• Champion: Congthia
• 2nd: Leitak ( B )
• 3rd: Hmawngtlang

Paih :
• Champion: Zephai A
• 2nd: Aibur

Choir:

  • 1st: Congthia
    • 2nd: Ngalang
    • 3rd: Leitak (Modern)

Note: Min le Khua palh sual le hrelh sual mi a um sual ahcun kan ngaithiam te uh law, Internet line a tthatlo caah, thawng Kan i thanh chin mi a har pah le.

Source: Zophei Network of America

Global Zophei Seminar i Muidawh Miss Teinak Hmutu Sui Tin Thlem (Hlamphei) Hmanthlak Pawl.

Sui Sui Hmanthlak karlak ah hi cabia hi rel awk ka van chiah pah lai. Cabia hi rel awk tlak bak a si.

Kumzabu 21 le Chin Mino (Salai SH Lian)

Hi capar cu a voikhatnak 2013 DCCF nih tuahmi Chinland Night ah chimmi hrambunh in, tialmi a si i, Phungtungtu Magazine (Monywa-Mandalay), Thingthang Magazine (Yangon) le Senri Magazine (Norway) ah chuah cangmi a si. Online careltu cheukhat caah careltu nih siaherhnak he ka vun tar thanmi a si.

Sui Tin Thlem (Hlamphei) hi aa dawh kho tak tak.

Biadomhnak:- Capar tial ding cu ka ruah lengmang nain, a thar tial ding ah caan ka pek khawh lo caah tulio Laimi (Chin) mino kan sining he a tlak bikmi Phuntungtu Mekazin (an chuah cang) i ka tial ciami khi vun tamhmawih chap ninglaw kua ko ning tiah, Kumzabu 21 le Chin Mino timi tlangtar hi ka hun char than. Tamhmawih tuah than ding ah ka vun ruah i tial ding ah har ngai phun in a um. Asinain, hi tlangtar in Delhi University ka kai lio ah Chin Youth Christian Fellowship hruainak in tuahmi Hlasaknak le Biatawi chimnak (Chinland Night; Current Issue Talk & Singsong Service) ah voikhat ka chim bal cang. Sianghleirun pawl caah a tawinak in ka tial bal cang.  Asinain, tial taktak ka vun thok ah a har ngai ngai, a tlangtar nih a huapmi a tam tuk. A zeiset deuh dah ka tial lai tiah ka phet set kho lo. Cucaah, kanmah Chin Miphun mino hna cung ah Kumzabu 21 chung ah zeidah a cang? Zeidah kan hngalh awk a si timi a tawi khawhnak chung in hi capar in langhter ka hun i zuam lai. Kumzabu 21 kong ah siloin Chinmi le Chin Mino hna nunnak ah zeidah a cang timi tuhi a tawifiannak in tial khawh ka hun izuam lai.

Chinram.

A hmasa zeidang hlan ah Chinram kong a tawinakte in hun langhter ka duh. Khawi zeika ah Chinram cu a um i, zeitluk nganmi dah a si, milure zeitluk dah a si tikha a tawinak in ka hun langhter hmasa lai. Kan Chinram a bitkauh cu (36,019 sq km) a si i, (Switzerland 41,285 sq km) he a bitkauh a tluk dengmi ram pakhat a si. Cun, ram minung 500,000 tluk nih kan um hnawhmi ram a si. Pathian pekmi kan Chinram ah miphun dang hna bantukin a rummi nunzamawi, ca le holh, hlawn le thil, thuam le thang, zatlangnun dawh le Khrihfa zumhnak (Kum 100 tling) he khua a sami miphun pakhat kan si. Cutluk a ngan ko mi Ram cu; Chin miphun hna kan kut cung ah Pathian nih a chiahmi ram asiloah a pekmi ram a si. Cucu kilven ding cu CHIN Mino hna kan rian ngan bik a si.

Kumzabu 21st

Kumzabu 21 le Chin Mino tiah tlang kan tar bantukin Kumzabu 21 cu zeidah a si? Zeibantuk thil dah a can lio caan a si? Kumzabu 21 hlan deuh siloah cu chung ah zeidah a cang? Kumzabu 21 cu zeitik in dah a thokmi a si tikha a tawinakte in ka hun langhter hmasa ka duh. Asinain, Kumzabu 21 kongnak in cu chung ah Chin miphun kan cung ah zeidah a cang tikha a biapi deuh in vun langhter khawh ka zuam lai.

Atu lio kan caan hi Kumzabu 21 cu a si. Cucu, January 1, 2001 in a thok i December 31, 2100 ah a dong ding mi a si. A tu lio caan te ahhin, kum 15 le ni —- (careltu nih carel nicaan) a liam cang. Cu chung ah cun zeibantuk thil dah an cang?

Vawleipumpi Ramkhel

Vawleipumpi ramkhel huap ning in kan tial a si ahcun a sau tuk lai caah a tawinak taktakte in kan zoh a si ahcun US Superpower (Ram Thawng Bik) a hung si. Cucu Soviet Union (Russia tiah kan theihmi) aa thencheu ruang ah a si kan tih khawh. Soviet Union a thencheu (1991) i a zalongmi ram 15 ah a then hnu in, Cold War a dih nain Terrorism (ralhrang tck. Al-Qaida Sept.2001) a thok i atu ah a hunglar ngaimi ISIS hna an hung chuak. Vawileipi a dai kho hlei lo. Cun, chawlehthalnak kong he pehtlai in kan zoh a si ahcun Taluk (China) a hung kai (thangcho bik 2nak a phan.

Ralkap thawng fawn). Cuticun Kumzabu 20 a dongh lai in Kumzabu 21 a thokka ah thlennak a tam ngaingai. Mifim thiamsang cheukhat nih cun kumzabu 21 cu nichuahlei (Asia) ram hna caan a si cang tiah a timi zong an um. Cu a thleng cuahmah mi caan, thil sining, uknak ah hin kan nih Chin miphun hna cung ah zeidah a cang, zeidah a tlung i a hlei khun in Mino hna cung ah zeidah a cang timi kha hi capar in vun langter ka duh.

Kumzabu 21st: Chinmi Chung Ah Zeidah A Cang?

Kumzabu 21 ah Chin miphun chung ah zeidah a cang timi ka char hlan ah a hnu lei deuh kum tlawm pal kir a hau. Cucu a bik in kanmah Chinmi caah a herh khun. Kum 1988 hnu in zeidah a cang i nihin kan dirhmun zeidah a si hi ruahawk le ngaichiat ngai cu a si. Asinain, kap khat lawng zohlo in kap tampi in kan zoh a si ah cun thatnak a chuahpimi zong a um ve thiam ko. Kumzabu 20 a dongh lei in zabu 21 a thokka hrawng 1988 kum Kawlram Bupi buaibai hnu in 2010, 2012 chozah thar kai hnu in, nihin ni tiang ah Chinram cu Kawl Ralkap nih Camp (Sakhan) an chap lengmang i luklamalak ah 50 lengkai an sak.

Sakhan pakhat ah ralkap um zat ding in cun umter kho hna sehlaw an tam taktak hnga. Battalion Camp (sakhan) pakhat ah ralkap 750 in 1,000 tluk um ding a si hnga. Asinain, an chiah khawh lai cu zumh a um lo. Cucaah, ralkap sakhan 50 ah hin tling an um lo caah a tlawm bik in tuak sisehlaw, Kawl Ralkap 30,000 lengkai nih kan Chinram chung ah an kan congh tiah ruahdamh khawh a si hnga. Cucu Chin milu 16 ah Ralkap pakhat khan nih an kan um hnawh i an kan congh tinak a si.

Cu nih Kumzabu 21 chung ah a phi chuahmi cu Chinmi zaamnak a si; 2008-2009 ah Chinmi cu vawlei pumpi ah ralzam tambik (5) nak ram sinak dirhmun a phan. Vawleipi tahnak (World Record) a hnintu Ralzaam ah a cang. Kum 20 chung ah ramthum dornak haltu (asylum seekers) le ralzaam dihlak fonh in cun Chinmi ramthum pem hi 60,000 kan lonh kho tiah zumh a si. Cun, atulio ah Malaysia le Delhi in Chinmi lawngte 60,000 hlei nih ramthum pem ding an hngak cuahmah rih. Mizoram le kakip ah tampi an tang fawn.

Cucaah Chinmi tam taktak nih chuah tak a si i, chuah ding in an i tim cuahmah rihmi hmuh khawh le ruahdamh chung khawh a si. Cucu a chuak cangmi vialte hna cu Chinmi zapi i milurel 500,000 (sing-nga) tluk chung in kum 20 chung ah milu 125,000 (25%) hrong nih a runrun in Chinram an zaam tak. Cu chung ah cun, Careltu pumpak chungkhar tampi an itel bantukin, Catialtu chungkhar, rualchan le cingla zong an i tel. Hihi, a namber ruahdamhmi hi 2013 lio ning a si, atu cu a palh kho ko men lai nain, elawk a tha lomi a si taktak cangmi thil a si. Cu Chinram a chuahtakmi chung ah a tam bik MINO an si.

Chin Miphun le Mino; Kumzabu 21 Chung Zaamnak Nih A Chuahpi Mi

Kan mithmuh a si bantukin Chinram chuaktak in ramdang pemnak nih a chuahpi mi thil phunzakip a um. Cu chung ah thil tha tampi a um bantukin thil tha lo zong a tampi a um ve thiam. Zei bantuk thil poahpoah nih a tha le a chia (Positive le Negative) a um dih bantukin Chinmi ram le miphun chuahtak in zamnak le pemnak zong nih a tha le chia pahnih in a ngeih. Cu hna chung in a thatnak siseh, a chiatnak siseh, tahchunnak pakhat hnih catialtu nih ka hun langhter lai i, careltu pumpak zong nih Kumzabu 21 chung ah Chinmi kan zamnak le pemnak nih zeidah a chuahpi timi hi fak deuh in na ruahnak lai ka hun in sawm duh fawn.

Thatnak: A thatnak tampi lak chung in kan mithmuh a si ko mi cu Chinmi kan zam le pemnak nih Ramthumnak a thangcho ciami (Developed Countries) ram hna ah Chinmi tampi a phanhter hna. Cu a thangcho ciami ram hna mino le mipi sin ah cawhpawlhnak caan tha an ngei. Cun, a that khunnak cu, ram thangcho ciami hna nih kum caan saupi an rak kalpi cangmi vawlei cung fimthiamnak sianginn thatha, cacawnnak hmun thatha ah fimthiamnak sangsang cawnnak caantha Chinmi mino tampi nih an hmuh. Sianginn kainak nawl an ngei. Kaltak ciami Kawlram Bupi chung ah sifak bik a simi Chinram ah hmuh ballomi caantha an hmuh.

Culawng silo in, a thangcho ciami ram ah a ricankhiah tein riantuannak nawl an ngei. Cu an tuahtuanmi cun Inn lei ah taantakmi chungkhat, cingla le rualchan sin ah phaisa chawva  in bawmh khawhnak a lam a hun um. Hihi, Chinram khua tampi a khupthal a lettu a si. Kawlram Bupi cozah nih zeihmanh tuah piak ding in Chinram caah timhtuahnak a um lo ko bu in ramdang phan Chinmi bawmhnak thawng in mithmuh in thil tampi a thleng. Khuakip ah, Inn tha lo tha, Lam le sul, electric mei vannak tbk. in a phunphun tuah piak a si. A thatnak cu a tampi vun char ding le langhter ding a um liangluang ko lai nain, hi vial sirih sehlaw, careltu pumpak lila zong nih thuk deuh in ruah ding ah ka hun kaltak lai i thatlonak a silo ah a chiatnak a chuah pimi ah kan hun zoh lai.

Chiatnak: A fiangmi cu duhsahte in miphun tlaunak a chuahpi dingmi a si. Atu zong ah a cang thluahmah cang. Keimah catialtu ka banh khawh tawk ah, Mizoram ah khua a sami Chinmi faunau tampi mah holh an thiam tilo. An holh an zah pi. Cun, a cheu cu Chinmi sinak hrimhrim kha an zahpi cang. Mizoram lawng ah siloin, kan ram chung khualipi Yangon le Mandalay tibantuk a ummi zong an si ve thiam. Hi hna chung ah hin, Chinmi (Laimi) nih kan bochanmi hna falenau zong tampi an i tel. Kan ca le kan holh kong ah bochanmi, miphun a tanh, holh le ca kilkawi dirpi ko rua tiah ruahmi fanau chung zong in an tam.

Dothlennak a tuah cuahmahmi bochanmi upa hna fa le nau chung zong in an i tel. Cu bantuk a hnu zultu cu miphun tlaunak a si ko cang. Cun, laihlum chungkhar hna sin ah huamlonak a chuahpitu thil thar a hung chuak. Cucu, ramdang in kuatmi phaisa lawnglawng bawmhnak a si. Mino, Upa-Nu le Pa hna tampi cung ah tuan huamlonak phundang in chim ahcun thathut zawtnak nganpi a chuak.

Cun, tahchunnak a dang pakhat Sianginn kainak kong in vun char ning law, a bik in tanghra (class 10) sungh-awn kong ah hin a si. Ramdang in phaisa kuattu chungkhar nih laihlum chungkhar fanau sin ah, sianginn kainak caah a herhmi phaisa kuat a si ko nain, a luan ciami kum tampi zohchun tik ah, tanghra a awngmi an tam deuh hlei lo. Fimcawnnak ah cun a lang in phaisa kuatnak lawng in zeihmanh thlennak a um lo tikhawh a si.

Mino tampi ruahnak lungthin ah a chuakmi cu, tanghra awnnak nakin ramdang kal a tha deuh. Ramdang kal a biapi deuh timi a si. Cu nih cun, cazuam duhlonak le cathiam khawhlonak faktuk in hngakchia mino lungthin chung ah hmunhma a lak.  Cun, hi bantuk Chinmi a runrun zaamnak nih a chuahpi mi chim ngam lo dingmi thil a tampi a um. Cucu, careltu pumpak nih nangmahte ruah ding ah catialtu nih ka chiahtak than lai. Zeidah an si hnga? Hi bantuk a tha le chia chung in Miphun nih a bochanmi Mino hna nih zeibantuk dah kan i thim lai i kan tuah lai?

Kumzabu 21 Ah Mino Hi Ram Le Miphun Caah Zeiruang Ah A Biapit Khun?

Pakhatnak ah, Mino cu ram chungum milu lakah a tam bik kan si pinah thazaang a thawngmi le tuannak le cawlcanghnak ah a vikvakmi le aa teltum kho bikmi kan si. Pahnihnak, theihhngalhnak le fimthiamnak a cawng cuahmahmi le vawlei thanchonak chantiluan a dawi khomi kan si. Pathumnak, thatlonak lam a siloah, thatnak lam a zul khomi dirhmun ah kan dir lio caan a si i, palhnak hna kha hlawt in thil tha lei ah nun i sersiamnak caah caan tha a ngeimi kan si. Palinak, Chin mino hna nih kan Chinram hi zeitluk in dah kan dawt i, thinlung ruahnak le kan fimthiamnak hna Chinram caah kan hman timi cungah kan Chinram a thatnak le a chiatnak cu aa hngat zungzal dingmi a si caah mino kan biapit khunnak cu a si.

“Nihin Mino Thaizing Hruaitu’’ ti a si bantukin thaizing Chinram a hruaitu ding cu nihin Chin mino hna kan si. Miphun le Ram a dirkamhtu kan si khawhnak caah mino hna nih timhlamhnak he kan um zungzal a herh.

Mino Hna Nih Ram le Miphun An Sersiamning

ISREL RAM: May 14, 1948 kum ah Israel ram an rak dirh khawhnak tuanbia ah hin MINO hna hi biatakte in a dir mi an si i 1980s kum hrawng ah Israel ram mino dihlak chungin zatuak (75%) hi Israel ram runvennak caah tiah raltuk thiamnak a aungmi an si. Cun, ‘Bat Ami’ timi le ‘Shlomit’ timi Israel NGOs riantuannak ah Israel nungak mino (40,000) tluk hi kum fate nihlawh pek lo bak in pumpek in ram caah a tuanmi an si.

CUBA RAM: 1959 kum lio ah Cuba ram hi ram mipi cathiam cu zatuak (41%) lawng an rak si. Asinain, rampi in cathiamnak ding ah dothlennak cu Ramhun Fidel Castro nih 1960 kum thawk in biatakte in a tuah i Cuba ram mino le sianghngakchia 100,000 nih ram mipi cu i pumpek in ca an rak chimh hna. Cu mino le siangngakchia hna cawlcanghnak thawng cun nihin atu ahcun Cuba ram cu vawlei cungah cathiam tam bik ram ah (Literacy rate, 99.8%) in pahnihnak an si cang. Cuba ram mino hna nih an ram a dawtnak le an ram caah an i pekchanhnak cu Cuba ram nih theipar tha a zun cang.

Kan nih Kawlram Bupi komh ramchung ummi nihcun uktu cozah chia ruangah fimthiamnak tha an cawng kho lo. Ramleng a phanmi mino tu nihcun tuahnak nawl, kawlnak nawl le hmuhnak nawl ngei a si. Cucu mino pumpak kut cungah a ummi a si. Teirialnak le lung biataknak he fimthiamnak kan i lak i khoika ram kan um hmanh ah kanmah miphun le ram caah thahnem santlaimi si khawh ding kha nu le pa le hruaitu upa le ramchung mino ramleng mino hna caah saduh thah bikmi a si. Cu bantuk a tlamtlin khawhnak ding ahcun mino pumpak ah a hngatmi a si ko caah aa zuammi mino si ding kha ahopoah nih kan duh awk a si. A lualami le zuamnak lungthin a ngeilomi kha kan si awk a si hnga lo. A rang tukmi chantiluan Kumzabu 21 chung ah hin Chin Mino hna um sawhsawh awk a tha hrimhrim lai lo.

Biadongnak

Ram sersiam ding a ngei rihmi hna miphun ca ahcun mah nih lim khawh lomi hmabak cu kan tefa hna tal nih rak tlinh hrim hna seh tiah felfaite in lungthin cheuh bauh an hau. Israel le Cuba mino bantukin in miphun dawtnak ngeih a hau, cawn awktlak thil tha a um ahcun lak ve a herh. Asinain, cu thil vialte an tuah khawhnak ding ca ahcun miphun kong an fian i miphun dawtnak an ngeih taktak a hau. Miphun remh duh ahcun mino hna remh, miphun hrawk duh zongah mino hna hrawk hi a hrampi pakhat cu a si.

Cu caah kan ram ah kan CA/HOLH te hmanh cawn rak sianh lo te hna a rak umnak kha a si. Cu mino hna a caan lio te cawnpiak hi thil biapi bikmi pakhat a si. Miphun kong a ruat khomi mino hna hi mino dang hna nakin pumpak kong tiang ah bochan awk an tlak deuh. Cu caah Kumzabu 21 chung ah Mino hna sersiam ding hi kan pawng kam, chungkhar ca lawng siloin kan miphun ca a si caah biatak deuh in tan la cio hna usih. Miphun holh le Miphun cathiam, Chin miphun dirhmun fian, le mah pahrang le thilti khawhnak hngalh i thanchoter hna u sih! “Nihin Mino Thaizing Hruaitu.”

A donghnak ah careltu pumpak pakhat cio sin ah biahalnak 6 in donghter ka duh;

  1. Zeiruangah kan ram le kan miphun kan dawt awk a si? (Why should/do we love our Chinland and people?)
  2. Zeiruangah dah kan ram le kan miphun kan kal tak? (Why did we leave our Chinland and people?)
  3. Zeidah Ramthumnak nun le um a thathnemnak le a chiatnak an si? (What are the advantages and disadvantages of living in third countries?)
  4. Mino thancho khawhnak dingah zei bantuk hna dah a biapi bik an si? (What are the most important factors to improve ourselves?)
  5. Chin miphun timi nih zei bantuk hmelchunhnak dah a ngeih? (What are the characteristics of ‘Chin Identity’?)
  6. Chinram caah zeidah kan tuah khawh lai? Cucu zeitindah kan tuah lai?
    [What and how can we do for Chinland? ]

Photo Credit: Sui Tin Thlem (Hlamphei), Cabia: Salai Sang Hnin Lian

Global Zophei Seminar i Hlasak aa zuammi pawl video cu a tanglei ah  hin a um lai. An thiam kho tak tak. Hlasakthiam a thiam chin pawl nih an van judge ve.

Credit: Vanmi Production

Leave a Reply

Your email address will not be published. Required fields are marked *