Hi bantuk hi thiang thlarau riantuannak asi tiah an ti hna Mi nupi/pasal cung zong ah bawh asi ko dik nan ti ceu maw?

Tu lio vawlei umtu ning hi adang ngai ngai cang ko, Khrihfa bu chung zong ah anung mi Pathian kan biak ning zong hi phun dang dang in achuak cuahmah ko cang, thiang thlarau riantuan mi asi tiah dawh le dawh lo zong um ti lo, sirem ning tein mah duh ning in kan cawlcang ko, mah bantuk thil cang mi hna hi zoh dawh lo ngai mi asi, mah bantuk cawnpiaknak hna hi aho te mawh phurnak dah asi hnga? Thiang thlarau hruainak si lo in minung hruainak cu thiang thlarau nih akan hruai mi asi ti phun in kalpi mi cu apoi ngai te ko lai?

Khrihfa bu le an min hna hi chim adawhcah lo caah kan langhter lo khi asi, picture ah khin vun zoh ulaw thil tampi nan theihthiam te lai, atu lio ah mah bantuk zumnak phung hi alar ngai ngai ko, Khrihfa asi lo mi hna nih zei tin dah akan hmuh te hnga? Missionary riantuannak ah thlarau tlaih kan tim fawn mah dirhmun in thlarau tlau ding mi tlaih cu ahar bak ko lai, atu bantuk biaknak dik lo mi hna hi aho nih dah achimhrim lai? Aho te mawh phur dah sihnga? Timi hi bia hal nak a um ko cang khi asi?

Biaknak lei hi kan umnak zei bantuk Bu asi ko hmanh ah cucu atha bik, khakha atha bik timi hi a um lo, biapi bik ah cun nangmah le Pathian karlak kha biapi bi kasi ko, cu asi lo ah cun Bu ah hin khamhnak a um lo, atha bik timi a um fawn lo, kei cu zumtu dik tak ka si tiah kan ti zong ah kan umtu ning ah fiang tein thil alang tawn ko, zumtu dik tak hna cu an holhka ah siseh, an umtu ning ah siseh, mi cung ah an lungput ning ah siseh, an tuah an sernak ah siseh, an cawlcangnak le an holhka hman nak ah fiangte in alang khawh ko, an mizia ah alang ko, mah cu zumtu diktak tiah kan timi ah theih khawhnak lam pakhat asi.

Khrihfa Bu tampi hna nih ramthim ah Bawipa caah riantuan nak ngei in missionary kan kalter hna, harsatnak tampi karlak ah hramthawh khi asi, midang nih zei tin dah zungzal nunnak angei ve khawh lai tiin, Pathian bia taktak hi an chim piak tawn,  cheukhat hna le bang cu nunnak a pek tiang in an tuar ko, mah bantuk martyr hna cu Khrihfa bu nih anrak upat ngai ngai khi asi, mi dang caah thiang thlarau lei ah thluachuah an ngah ve nak ding ah nunnak ape mi an um lio ah, atu bantuk thiang thlarau riantuan tiah phuah chawmh mi minu mipa lam ti hna le acancan ah ibawh ti bantuk hna hi cu thiang thlarau riantuan mi dik cu asi theng lai lo nang zei tin dah na ruah?

Muslim/ Buddhism/Hidhu hna hi zei tin dah Bawipa Pathian sin ah kan hruai khawh lai, Khrihfa ah an lut duh bak lai lo, Khrihfa bu upa hna nih hma akan lak piak deuh atha ko lai, Khrihfa bu dih lak nih tangti in mah zumnak dik lo hi kan chimhrim aher ko cang lai, hmai lei ah akau chinchin ko lai, setan riantuan zong hi athawng ve deuh deuh ko cang, kan ram ah hi bantuk zumnak hi akarh chinchin lo nak hnga thlacam le tuahnak pakhat khat in bawm aher te hnga.

Mah bantuk hna thiang thlarau kan cang tiah ati mi hna hi adik lo atha lo tiah kan ti zong ah an huat ngai ngai fawn cu mu, hmai lei ah an mah hna caah tih anung bak ko lai, mi dik le mi tha hna tu hi misual midik lo ah akan hmuh lettalam khi asi.