Lung a fak tuk mu! Kawl ralbawi Khing Maung Zi nih a thah mi Pu Lawm Ceu, a fanu cabia hi rel ve.

Lung a fak tuk mu! Kawl ralbawi Khing Maung Zi nih a thah mi Pu Lawm Ceu, a fanu cabia hi rel ve.

Kawl Ralbawi Khing Maung Zi Hremnak Fahtuk Ruang Ah A Nunnak A Liammi Pu Lawm Ceu, Fanu Nih A Pa Temtuarnak le Chungkhar Hna An Ngaihchiatnak Kong A Ttialmi Rel Ahcun Mitthli Hnawh Cawk A Si Lo.

Tahnak Biazai: Sualnak ngei lo ka pa, uknak chiattuk ruang ah maw? Lungler Khua ah a thla thla in hreng hna, Thah lai Sia kawng no bang, Khing Maung Zi nih duh in cil len, Khuabawi rianttuan ruang ko ah maw? Ka thin, Ka pa kha Khing Maung Zi nih thah lai Sia bang, khua zakip cul in hruai len hna. Maw! ka pa, khua le ram zawn na rak ruah ruang ah maw kha tluk khan na rak tuar?.

Kha lio ahkhan kei le ka nau cu ka pa nih zei a ton ti kan rak thei ve lo. Kan rak hngakchiatuk rih. Kha lio, ka nu le ka tta le hna mithli le hnapduk he thir le phang in an rak um kha, kei le ka nau nih zei kan rak hngal thiam ve lo.

Ralbawi Khing Maung Zi kuttang pa nih, a nupi le a fale hi a thah ve sual hna lai ti a rak kan phang. Zanttim le khuamang ah khuami hna nih kei le ka nau cu mi puak buin zamttim ahcun ka pa nih a nunnak pek in a ttuan hnawhmi kan khua cu lungsiaherh in mithli he (ka nu le ka tta le rual cu an ttah thawng hmanh thang sual lai phangin ik thliahmah in) kan chungkhar in kan zamtak ruangmaang.

Mah lio ahcun ka pa cu, Khing Maung Zi nih thah lai Sia bang khua zei a hren hmanh thei loin kan ttah bu cun ka pa cu kan rak zamtak. Kha lio, ka nu lungfah le ngaihchiat, ka u le rual ngaihchiat le lungfah, hacang rial kha dah ngai! Ka chan chung ah ka hmuh ballo. Zei hngal loin ka nu le ka tta le khuami mit au phin le umtu nih ttihmi ngei ve bangin an rak kan tuah. Mizoram ramri tiang ka pu le nih an rak thlah i, Mizoram lei in kan chung le nih an rak kan don. Kha lio ah ka nu nih mitthli he hitin Pathian sin ah a rak hal “kan chuahsemnak khua le ram te ahhin ni nikhat ahcun kan kirpi tthan mu” tiah Pathian sin ah thla a rak cammi kha zei ruah awk hngallo in ka rak icinken peng. Ka pa, thih hnu ah kan zamtak mi kan khua (Saikah) ahcun kan nu farual lawngin X’mas kan hmang tthan. Kan khua le ram ruangah nunnak a pemi ka pa cu mizoram ah kan sian lo bute in kan kaltak thai.

Chungkhar hna nih khua kan zamtak hnu ah Ralbawi Khin Maung Zi kut in ka pa cu a rak zam kho i, inn le lo ngei ve lo bang kan inn te hmanh ah um ngam loin na Biak Pathian ruun inn ah him deuh lai ti ruat in tirawl rak pe in rak thlawpbul hna. A hnu ahcun na Biak Pathian ruun inn hmanh ah hnangam kho loin Rualvung tiva kuang hrawn ah rak zaampi hna. Thinghmui zawtnak ngei bang, na hliamhma hmanh duh in thlawp ngam loin khualeng ah thlawp hna maw ka thin! Ka pa, ttitti phangphang in khuami hna nih an rak in thlawpbul mi nihkhan na taksa fah teh a rak in chawng deuh maw? Na nunnak pek hnawhmi, na khuami na rak hmuh hna ahkhan na hna a rak ngam deuh maw? Tirawl an rak in chanhmi na ei ahkhan teh, na kaa hna a rak thaw maw? Ka pa, kha lio na rak intuarnak kha kei nihcun a ruahpiak awk ka rak hngal lo. Nihin ka ruah ahhin na kaa zong a rak thaw bal lai lo dah! ka ti. Ka pa.

Ka pa, Facang cil in Khin Maung Zi nih an cilnak, fung le thing in an tuk an dennak, thirhling lakah an kaiter i an kalternak, thir cincik in an ttemnak le an hruainak ruang ah na taksa cu an rak pem dih cikcek. Kha tluk hma le rung kha, Zeitinhme na rak intuar khawh ka pa, Na thaisung le na fale mithmai hmuhta lo na sia a rak herhtuk caah maw na rak intuar peng? Ziah hme na kaltak ding tthiam ko ahcun kha tluk hma fak kha, kha can remruam na rak tuar? Rak kal tuan law, na intuar caan a tawi deuh lai si. Zeitin hme na rak intuar khawh? Ka theihmi pa ah a pasal bik na si. Nangmah nakin a ingtuar khomi ka hmu/thei rih hna lo. Kan chawr bak! Na hma le rung kha, misual hna kan caah Calvari tlang i a kan tlanhtu kan Bawipa Jesuh Khrih temtuarnak a hluan. Kha temtuarnak he khan zei dah na temtuarnak hi ai dan hlei hnga ka ti. Na taksa cu hma le rung nih pei a tuam dih ko kha. A hodah vawlei ahhin kha nak fakin hremnak a tuar hlei hnga? Minung fa nih zeitin hme na intuar khawh? Ka pa, na pa sal bak! Kha vialte hma le rung he, a zeizawn a fak ti hngal loin na thaisung le fale hmuhta duh ah Mizoram Bualpi khua na rak phan. Na celh cawk ve ti lo le mu na rak kan kaltak.

Nunnak pek in na rak dirkamh ve mi kan khua le ramte ah luphum lai lo na rak ttihtuk i na rak duh lo kha, na thaisung ka nu le ka tta le rual nih an sia a herhtuk ve. Nain Ka pa, kha lio ahcun kan khua mi nih nangmah cu chim lo, na thaisung le fale rual hmanh an rak kan ttihtuk. Nang cu chim hau loin an rak in ttihtuk. Nunnak pek in na ttuan hnawhmi kan khua ahcun kirpi ti loin Mizoram ah kan rak in thlawp. Na thaisung le fale rual cu na kan theih bangin hawi bangin kan rak in thlawpbul kho lo. Nain, ka pa, Khing Maung Zi nih an cilnak le an tuk, an dennak kha na chungril tiangin an rak i rawk dih i na rak pasal remruam, minung fa nih nunpi khawh ding phun a rak si lo. Kha, can na nun hmanh kha na pasal tuk ka ti. Ka pa, na kaltaknak kum 21 a tling cang e! Kha lio, puak cungin a kalmi na fanu zong ka nungak ve cang! Ka pa van khin na rak ka hmu dek maw? Kei nihcun kan philh kho lo, kan in hlam zungzal. Kan in ngaituk rih.

Kapa, na rak zam lio ahkhan nangmah na si lo a theituk komi Sopum pa pakhat zong Khin Maung Zi nih ka pa na zam kar ah meithal in a rak kah. Ka pa, na tuanbia cu li bangin ai hnin i vawleipi a cul dih. Maw Pathian Na fale kan tuarnak le ttah-aihramnak vialte hi lunglawmhnak ah kan thlenpiak ve cang mu. Ka pa philhlonak ah ka rak thaimi a si. Ka pa, kan in ngaituk! Zanmang tal ah rak kan leng ve law.

Note : Hi Capar hi Lungler Sakhan ah a rak ummi Ralbawi Khin Maung Zi hremnak in a nunnak a rak liam mi Pu.Lawm Ceu philhlonak le a ngaihnak caah a fanu Chin Chin nih a tial mi capar asi.

Credit : V.O.M