Chin Mi Thawng

Muidawh nak, Degree ngeih nak, thiamnak, Fimnak, Rumnak, Dirhmun sang ah um duhnak, Thil tampi ngeih duhnak, I uahnak le porhlohnak vialte ah,

Minung hi pumpak ceu ah cun atluk lo mi long te kan si ko lai, Sihmanselaw aho hmanh hi I-hmuh sang ding le I-hmuh niam ding thlei kan um lo timi hi fiang ngai in alanghnak cu, Vawlei cung ah can tlawmte chung kan taksa damnak hmun ah hin, pakhat le pakhat zangfahnak le dawtnak he umti, eiti, dinti hi mah vawlei can tawite ah hin zei ruang adah kan ngeihti hna khawh lo nak cha nasi?

Ni khatkhat ah cun Mirum siseh, Mithiam siseh, Mifim siseh, Mi sifak siseh, Muidawh Mui chia siseh, a uah tawn ngai mi siseh, Mi sang Mi niam siseh, Mi dam le Dam lo siseh, kan thi ceu lai pin ah thlanmual vawlei chung ah taksa luhter dih ding asi laic aah aho hmanh hi thlei dannak um lo tein phum/vu ikan si dih te lai cu! Mah thil cu nan/kan ruat bal maw Unau?

Mah can kan phan ceu tik ah aho hmanh nih kei cu mui dawh kasi, kei cu mirum ka si, tiin atu nan/kan dam lio bantuk hin I uahnak can kan ngei khawh ti lai lo, kan dih lak in thihnak leiba ngei ceu kan si nak long ah hin minung kan itluk ceunak ding hmun asi, mah can kan phan hlan chung cu muidawh, muichia, mirum misifak le midangnak in ngeih tam, hmuh tam duhnak lungthin ngeih ceu kan si cu!

Cu caah can tlawm pal te kan ngeih lio ah hin thil theihthiamnak kaupi ngei in, hmailei kan thih can lio I dirhmun atluk dih ding kan sizia hi, atu thawk in Pathian zangfahnak thawngtha bia fiang cikcek in atheih cang mi nih cun, minung donghnak can theihthiam bu tein dwatnak le velngeihnak in tang dawr nun he, thilk an duh ve bang in mi dang zong nih aduh ve tiah theihthiamnak ngeih in, mi vialte cung ah lungput kan thlen can acu cang ko tiah theih ceu aher ngai cang.

Kan nih tlangcung miphun hna le bang cu Khrihfa kan si ceu dih fawn, Jesuh azum mi kan si tiah mi phun dang hna sin ah kan chim ve tawn fawn, asi nain, Khrih phung nih aken chih mi lungthin hi zei ruang adah kan ngeih ve khawh lai lo maw? Khrihfa asi lo mi hmanh nih mi dawtnak kaupi in angei dakaw, kan mah Khrihfa taktak asi mi hna le bang cu, Hindhu, Muslim nak in alet 10 tiang tangdawr nun hi kan ngeih ding asi ko lio ah, Inchak thlang pa cu vawi 2 nak asi cang, vawithumnak cu ka ngaihthiam ti lai lo tiah kan chim tawn cu ti, kan mak ngai ko.

A donghnak bik ah kan chuah ning atluk ceu ko, kan thil tuah le siduhnak belte cu atluk khawh ti lo, kan chuah ning atluk ceu bantuk in kan thih ning zong atluk ceu te lai cu mu! Minung kan sinak kong fiang tein atheih thiam mi nih mah vawlei can tawite taksa kan/nan dam lio ah hin, a nung mi kan Pathian tuah ding le umtu ning ding ah akan cawn piak mi vialte bantuk in nun ding ah Bawipa nih nang le kei hi akan fial dakaw U le nau?

Chuahnak atluk ceu bantuk in thihnak zong atluk ceu mi kan si timi hi philh lo tein I chinchiah ve ngat u!

Cre:Moses pa