Part-II India cozah tang ah UNHCR nih ralzam a cohlang ning le ralzam a sok nak a dotdot in theih a herh mi tete?

Part-II INDIA COZAH TAANG AH UNHCR NIH RALZAM A COHLAN NING A DOT’DOT India innpa ram siseh, Kawlram in a rak zaam mi hna telh in ramdang in himnak duh ah a rak zaam mi paoh nih India, UNHCR office ah Ralzam sinak sok khawh le fuhpanh khawh a si.

UNHCR nih India ram khualipi a simi New Delhi ah Office an ngeih i cu ka ahcun ralzam sinak soknak le Ralzam sinak pomnak kong tiang tawlrelnak an tuah. Hi ka zawn ah kan fian ding mi cu Ralzam sinak i cohlan a si hlan ah, UNHCR New Delhi office register an tuah hmasa lai, cu hnu ah Refugee Status Determination (“RSD”) timi biahalnak le a sining taktak kherhlainak tuah hmasa a si.

Ralzam sinak halnak/ Soknak (REGISTRATION) Ralzam sinak a sok mi nih Register na va tuah bak ah a herh mi cu, UNHCR nih na pumpak chingchiahnak (basic identification details) an i tuah hmasa lai i hi ah’hin biometrics timi computer hmang in kutpi namnak le mit scan tuahnak aa tel chih lai. Biometrics hi a hlan ahcun an rak tuah lo, a si nain kum 2010 hnu lei ah ralzam chung in minung i thuatnak tete a hun chuah hnu ah a thar in an tuah mi asi.

Cu pin ah na zaamnak a ruang, zeiruang ahdah nan ram ah na him lo, zeibantuk thihphaihnak le tihphannak dah na ngeih timi vialte kha hi registration process ah hin na pek dih a herh i nangmah pumpak nih a biapi ko na timi kha fianghlang tein na langhter chih khawh zong a herh. (UNHCR zohkhenhnak ka herh hrimhrim na tinak zawn, na pumpak case zohchih in thilchih khawh asi tinak). Hi Registration tuahnak (Ralzam sinak soknak register) na dih hnu ah, UNHCR riantuantu office nih Under Consideration Certificate (“UCC”) timi an i pek lai, a fawinak in Blue Card kan ti mi kha a si.

Ralzam sinak ah pom na si rih lo nain pom awktlak na si maw, timi na case zohnak process chung ah na lut cang ti nak a si. Cun RSD Interview tuahnak ding nicaan zong cu ahcun pekchih na si lai. RSD timi hi Refugee Status Determination ti a si i Ralzam sinak ah pomtlak na si taktak maw timi kherhlainak Interview a si. Hi interview ah hin holh lehpiak a herh mi na si ahcun an mah UNHCR lei nih holh lettu an i timhtuah piak lai. FIRST INSTANCE (RSD) INTERVIEW: Refugee Status Determination (RSD) Interview hi a biapi taktak mi a si.

Hi ka zawn ah ralzam na soknak a ruang kha felfai taktak in na langhter khawh a hau. Ralzam sinak na sok mi pompiak na si le si lo biachahnak tuahtu a si caah a biapi kan tinak asi. Ralzam sinak (Asylum) na sonak a ruang le na zamtak mi na ram ah na tong mi thil dikthlir langhter a herh. UNHCR officer nih na pumpak chungkhar sining dikthlir (Background detail), na zamtak mi na ram na um lio na dirhmun le harsatnak buainak na tong ning, na him lonak a ruang, zeitin in dah na rak zaam, India ram na rak luh khawh ningcang ti bantuk vialte an i hal dih lai.

Hi ka zawn ah hin na chungkhar dirhmun a dik ning tein, na zamning le a ruang a dik ning tein lehnak na tuah khawh dih a herh. Hi ka zawn ah na chim mi hi tha tein record an tuah lai caah lih le, ttawnchawm ti bantuk kha a si awk a si lai lo. Cun hi First Instance Interview ah lehnak na tuah mi hi record tha tein an tuah cang caah nangmah zong nih nai chingchiah peng a herh. Hi ka zawn a dih hnu ah a dang voikhat hi bantuk interview an i auh than te lai i kherhhlainak (Interview) an i tuah nolh than lai (Voikhat nak First Instance Interview ah a fiang ko an ti ahcun auh ti lo zong a ngah mi asi).

Hi a voikhatnak First Instance RSD Interview a dih hnu ah, a tlangpi in thla 6-18 karlak chung ah thawngthanh nak tuah na si lai i Interview an i tuah lio le Register na tuah lio ah na pek mi case an zoh dih hmasa lai, Refugee Convention ningin, na case kha refugee pom ding mi criteria he aa tlak, aa mil ko ti a si ahcun Refugee sinak ah pom na si lai. Hi ka zawn hi thla 6-18 karlak a rau mi cu a si. Refugee sinak ah an i pom ahcun Razam sinak card, Refugee Certificate an i pek lai. Note: Atu ka langhter mi “Thla 6-18 karah ah” timi hi UNHCR nih normal process timeline ah an chiah mi cu asi.

A si nain ruah awk ngai a si mi cu “India Cozah hi 1951 United Nation (UN) Convention minsen a thu mi a si lo caah, UNHCR nih India Cozah mithmai zoh lengmang a herh. Cu tikah ralzam sinak pek taktak nak ahcun an ral a chia i Indai Cozah hmurka an ngai peng. CU caah Min Aung Hliang nih rampi uknak hramhram in chuh hram thok February 1, 2021 in nihin tiang ah UNHCR Delhi nih Kawlram mi ralzam sinak taktak a pek mi an um rih lo ti kawh a si i RSD interview zong a tuah ngam taktak rih lo.

Nihin tiang ah ram buai hnu in a rak zaam mi nih an i tlaih mi cu UCC kan timi “Under Consideration Card) lawng a si rih, a huap pi in zoh ahcun ralzam sinak pom taktak mi an um rih lo ti hi zapi theih awk tha cu a si. Next Topic ah “SOK THANNAK (APPEAL-RSD)” timi Ralzam sinak na sok mi pom piak na si lo tikah, zeitin dah sokthan a si timi ka rak tarlangh than te lai.

#Salai Cung Dawt (CHRO)#