Peace Dialogue kong ah CNF Spokesperson Sslai Thet ni nih Media kaltlang in achim mi cheu khat hna cu,

Nawlngeihnak alaktu Min Aung Hlaing ethnic armed group (tlangcung hriam tlai pawl) hna cu Peace Talk, amah hrimhrim in ngeih pi ding ah April ni 22-ah ram chung TV in sawmnak tuah asi, May 9 dih hlan ah sawmnak leh lo mi cu pawm asi lai lo tiin can akhiah fawn, mah kong ah cun Chin National Front (CNF) ruah ning theih fian ding in, CNF thawngthanhtu Salai Thet Ni bia hal tuahnak langhter asi.

Halnak: Nawlngeihnak alaktu Min Aung Hlaing nih Ethnic Armed Organization (EAO) hna he iton ding ah sawmnak kong ah, CNF ruah ning na ka chim kho lai maw?

Lehnak: Aw, pakhatnak cu nihin Myanmar politics buainak cu military council le Ethnic Armed Organization (EAO) karlak ah politics buainak a si lo, Military council le kan nih EAO karlak ah remh fel ding hi harsatnak asi lo, military council-nih a bul tan mi, mipi le military council karlak buainak a si deuh ko cang, mipi vialte tel nak mipi le military council karlak thil asi ko cang khi asi, CNF lei nih cun mah sawmnak kong ah zeihmanh ichawnhnak kan ngei rih lo.

Halnak: Sr. General Min Aung Hlaing zei bantuk thil timnak ngei in dah Ethnic Armed Organization pawl hi sawm asi tiah nazumh?

Lehnak: A tim bik cu vawlei ram hmuhnak ah politics lei thilti khawh deuh ah leh an chim tawn 2023 general election caah ram chung venghimtu pawl (Local Defense Force) hna langter lo in le tlauter diam in ramchung ah remdaihnak ngeihter hi an tim mi asi khawh tiah ati.

Halnak: Min Aung Hlaing nih hriamnam keng pawl vialte hna cu, amah hrimhrim in hmuhton in, state administration council aiawh hna he zong ibiakchawnh nak ngeih ding ah tiin achim, mah cu zei dah thei par chuah nan zumh?

Lehnak: Amah hrimhrim nih hmuh ton le council member hna he ibiakchawnhnak ngei le ngei lo nih thil adang ter khawh ah an ruah nain zeihmanh adannak a um lo, Kan thil duh kan ngei khawh lai kan ti ah cun, tahchunnak ah, ihmu tonnak ngei siselaw ihmu ton hlan ah ram pum huap ikahnak tawpter ding ti siselaw military council nih hin rem an ti lai maw? Mah caah cun zeihmanh hi beisei ding a um lo.

Halnak: Mah ibiakchawnhnak ah tel ding Ethnic Armed Organization (EAO) pawl in hruaitu pahnih hna min cu May 9 dih hlan ah pek hrimhrim ding asi tiin ralkap hruaitu bik nih achim mi asi, CNF lei nih tel timnak min pek nan ngei cang maw?

Lehnak: Mah kong ah hin zeihmanh chim le rel kan ngei rih lo tiah ati.

Halnak: Mah sawmnak kong ah hin thil dang zei dah chim chih ding na ngei maw?

Lehnak: Mah sawmnak he pehtlai in Ethnic Armed group hna zong siseh,ramchung mipi venghimtu PDF siseh, military council hi a zungtiang phoih chuah timnak atluk cia ngei mi kan si, mipi le Bu min bantuk zong in ruahnak buai ding a um lo, Kan kal timnak lam lak in pel lo in, tangrual tein ifawnh deuhdeuh in military council sawmnak kong ah, ruah buai her lem lo in, kan mah kan dirnak hi fektein dir peng hi tim hna usih timihi adonghnak bik ah chim ka duh mi asi ati.