Rev. Hoi Cung Tum Biachim Mi Cu A Mak Tak Tak

Laimi kan pa pakhat simi Rev. Hoi Cung Tum nih atu lio Myanmar rampi thimnak kong he pehtlaiin NLD Party le hruaitu hna a hmuh ning pawl cu a tanglei ah a tawifiannak in kan rak langhter. Video kan rak tar chih ko caah tling deuh in ngaih duh mi nih video zoh chih khawh si.

Ramkhel kong hi ka cuanh tawn. Kei zong hi ram a daw bak mi ah ka chia i, ka dawt le dawt lo cu tah awk a ttha lo i, keimah hmuhnak ahcun ram a daw bak mi le miphun a ttanh bakmi ah ka ruat ve. Cun, NLD zong ka party an si i, an party ka si ve ka ti lai cu. NLD hruaitu bik simi Daw Aungsan Suh Kyi cu ka upat bak mi a si. Thil tampi ka theihmi le hmuh mi ka chim lai lo nain chim ka duh mi cu Kan pi hi nitlak ram ruahnak a ngeimi a si.

Kan pi hi tluk ruang tein khuakhan lairel a thiam mi a si pinah nuhrinnak zong in mifim taktak si i, Kawlram hruaitu hna lak ahcun amah lawng hi nitlak lei ruahnak a ngeimi le Democracy ruahnak a ngeimi a si. Ramdang ah ca a cawng ve lomi nih cun ramdang ruahnak ngaih khawh si lo i, amah pumpak hi cu ka ruahmi le ka upat mi a si. Sinain ka theih lo zong si kho men, a rianttuan pi hawi ding an dirpi kho lo.

Cucaah kan pi khi nikhat khat ahcun a rian in a dinh caan a phan te lai i, a dinh hnu cun NLD zong a dih ve lai,”tiah ka ruah. Zeiruangah kan ti si ahcun amah lawng hi ruahnak kau ngeimi a si. A ttuan pi hawi chung in amah bantuk ruahnak ngeimi an um lo. NLD an kai hnu cun Laitlang ah ah duhlonak (Sandah) an piah mi a tam ngai cang, hi nih kan ram tthatnak a langhter tu a si.

Mah cu NLD cozah kai hnu in kan ram tthat deuhnak a langhnak a si. Asinain JCB nih inn an hrawhmi ka hmuh tikah mah hi thil tuah loin hinak lamttha an hmu hnga lo maw timi ka ruat. An rianttuan kum dongh lei ah ai dawh lo tukmi tuahsernak in an donghter i, hi tluk sifak mi Laimi inn an hrawhmi cu JCB mawngtu pa zong zuu thawltan tel an dinter lo cun a hrawk ngam lai lo, keimah sining law zuu din lo cun ka hrawk ngam hrim lai lo. Cun, JCB ngeimi sining law kha lio ah khan ka JCB aa tel hnga lo.

Mah inn an hrawhmi nih khan zeitluk in dah ranm a sersiam i, rak hrawk hna hlah sehlaw mah nih khan ram kha zeitluk in dah a hrawh hnga timi bia ka hal. Keimah hruaitu sining law mah inn sak kha ka sianh hna lo hmanh ah lamdang ka kawl ko hnga timi ka ruat. Kha lio caan kha ramdang ah ka um lio si i, inn an hrawh lai ah khan pastor pawl an rak sawm hna i, ruahnak an hal ko hna rua. NLD hruaitu hna nih mah inn an hrawh lai ah pastor pawl an sawmmi hna cu an fimtuk ka ti.

Biakam hnu chan zongah siangpahang nih prophet pawl an sawm tawn hna, siangpahrang pawl zong Pathian duh mi an si lo zongah an tuah dingmi ah Pathian duh lo ning in thil kan tuah sual lai maw? tiah Pathian rianttuantu pawl an sawm hna bantukin NLD hruaitu zong nih pastor pawl an sawm hna. Cu tikah ruahnak petu dingah ah an sawmmi hna pastor pawl nih inn kha hrawk/tthet uh an rak ti rua, pastor pawl nih inn kha hrawk uh, tthet uh an ti hna. Kha inn rawhnak ah biachahnak a tuah tu hna hi pastor nan rak si diam.

Kei mah lio kha ramleng ka um lio si tikah ka theihmi bia hi a dik lomi zong si kho men, ka palh sual si ahcun a theihmi a palh tiah ti te ko uh! Pastor pawl ruahnak an in hal hna hnu ah pastor pawl nih inn hi hrawk ko uh, inn hrawh hi miphun dawt si ko tiah an chim tikah mah lio kha um ning law ka bia an ngaih le zulh duh o cu ka thei lo, nain inn hrawh loin lamdang tu kawl in thlacam rih tuah hna usih,”tiah ka ti ko hna hnga.hi ka hi hmet law video zoh khawh si.    

Source:CWNE