US Lai nu Rebecca Thihnak Kong Lai in Full a um Cang

Note: US Lainu Rebecca Zahau thihnak kong dothlatnak cabia FUll in rel awk a um. Hi cabia hi a sau pah ngai ngai. Tling tein rel khawh a si. Rel a nuam kho tak tak. Ngaih zong a chia ngai ngai. Kan lainu kan tuarpi tak tak.

Rebecca Zahau Thihnak kong tling tein rel a zuammi caah Full in rel awk ka van langhter. Hi cabia hi Salai B Chankhar nih a tialmi a si. A tialmi ah thlenmi le chapmi ka ngei lo. Hibantuk in cabia tha tuk a tialpiaktu le a kan lehpiaktu Salai B.Chankhar cung zong ah lawmhnak bia ka van chim chih fawn.

Rebecca Zahau Thihnak Fak le Aa Thupmi Tehte Part 1

Vawleicung minung thong sang sing nuai tuksum le lungtuai in a umtertu hna lainawn fak kong le dingthu (justice) biadik kawlnak kong a si. Zeicatiah lainawnnak phen ah aa thupmi tehte a um caah a si.

Hi Cabia Saupi Nih Aa Tinhmi.
* Lainu Rebecca Zahau thah a sinak chungril kong, Laiholh in rel awk

Hi Cabia Chungah A Ummi. Biahmaithi

  1. Rebecca Zahau le A Tlangval Te Chungkhar Kong Tawi
  2. Rebecca Tlangval Fapa Max Thihnak le Rebecca Zahau Thihnak Fak
  3. Lunghrinh Awk A Tammi Palik Hlathlainak le Aa Thupmi Tehte
  4. Rebecca Zahau Chungkhar le An Sihni Minthang Phu Nih Dingthu An Kawlnak
  5. Palik Nih Tehte Kawl Lo In An Al Peng Hna, An I Sawlhphelh Peng
  6. Criminal Law (Sualtuah Phungbia) Si Lo In Civil Law (Palhnak Phungbia) In Taza An I Cuainak Kong
  7. A Dong Rih Lomi Dingthu Kawlnak le Aa Thupmi Tehte
  8. Cabia Chirhchan

Biahmaithi
Nizan tih ni in Rebecca Zahau thihnak kong hi biatak thla in rel hram kai thok. Cikkhatte ah ka thinlung a ka lak colh, ngol hngal lo in rel ka duh. Zeicatiah dingthu biadik thuh in a um caah a si, ka ti. Laiholh in a chungril deuh i a ummi kong rel awk um sehlaw tiah siaherhnak ka ngei. Asinain cabia saupi in tial a herh caah Part 1, 2, 3, 4 … in tial lengmang a hau. A dih rih lomi kong a si caah a herhning in tialchap lengmang a hau ding a si.

Cucaah theih le hngalh zokzok na duhmi a um len ko lai nain lungsau in rak hngak tiah kan sawm. A si khawh chung in, hi kong hi tling ngai in tial dingin ka lung kaa thlek. A cunglei ka langhter cang bang, cabia chungum kong khi a dotdot in ka run tial hna lai. Ka tial rih lomi kong ah cun, theih zau na duhmi bia a um zongah kan let kho rih lai lo caah a ruahzia na ka thiam awk kan nawl.

  1. Rebecca Zahau le A Tlangval Chungkhar Kong Tawi 
    Rebecca Mawii Zahau, kum 32 hi Falam peng in a chuakkekmi a si. A pa Khua Hnin Thang le a nu Zung Tin Par (Pari) an si. Kum 2000/ 2001 ah USA ram ah khua a sa. Kum 2002 ah USA Arizona ramkulh, Scottsdale khuami Neil Nalepa, kum 32 he Rebecca hi an i thi-um. Rebecca hi mit lei thlopnak siikhan ah rian a ttuanmi le mit lei thlop thiamnak a ngeimi a si.

2008 in USA California ramkulh, San Diego County, rili kam khuapi Coronado i a ummi nuai mirumpa Jonah Shacknai he an i helhnaih. A tlangvalpa hi nupi a tthenmi fathum ngei a si, Medicis Pharmaceutical CEO (siilei company lutlai) a si. A tlangvalpa nih naupa Adam Shacknai a ngeih i, hi pa hi Rebacca thattu tiah an timi a si.

Rebecca nulepa le a unu Mary Zahau-Loehner le a naunu tleirawl Xena Zahau hi USA Missouri ramkulh, St. Joseph khuapi ah khua a sami an si. Germany ah Rebecca unau nu pakhat a um.

Kum 2008 ah Jonah le a fapa Max nu Dina Romano an i tthen, ka taksa ramri lonh in na ka tuaitam an i ti veve ruangah an i tthen. Coronado khuapi ah a tlangval Jonah nih inn nganpi Spreckels Beach House timi a ngeih i, cuka inn ah cun, Rebecca le a tlangvalpa chungkhar khua an sati. 2010 December ah Rebecca nih a rian a chuahtak i, a tlangval fapa Max, kum 6 a zohkhenh. Rebecca le Max hi an i tlaihchan ngaingai i, mising lebang nih cun, nufa ah an rel hna, an ti.

  1. Hngakchiapa Max Thihnak le Rebecca Zahau Thihnak Fak

Max cu, Rebecca a thih hnu ni linak ah a thi ve. 2011 July 11 ah an inn nganpi chung dot hnihnak le tangdot a pehtu hleihlak in a tlangval i a fapa Max, kum 6 fakpi in a tla; a hmaifang lei in a tlak caah nikhua hngal lo in ttuang ah a bok. Inn dot khatnak kholhnak khaan chungah a ummi Rebecca nih tlak thawng a theih lecangka in, a tli i, Max cu, a hei zuanhnawh colh.

Ahohmanh nih Max a tlak lio an hmu lo. A pawngkam ah scooter lengke, uico le pumpululh an um. Innchung cunglei ah inn ttamhnak i thlaimi meiborh a um. Scooter lengke ai cuanh ruangah hleihlat in a lanh caah a tlak hi a si hnga maw, asiloah, thlaimi meiborh hei banh a zalhnak ah a tlak bia a si hnga maw tiah Coronado Police Department nih an tuakning a si.

Rebecca nau Xena Zahau, kum 13 nih a tlawn hna lio a si i, a um ve. Asinain Max a tlak lio ah Xena hi kholhnak khaan chungah aa kholh lio a si, an ti. Rebecca nih Max cu a hlawm i, CPR (thawpek phun khat) a tuah. Rebecca nih a nau Xena cu, 911 chawnh zokzok a fial i, Xena nih tonsapup bawmtu a chawnh hna. Bawmtu an hung phan i, Max cu, CPR an tuah lio ah, Rebecca nih, “Dina (Max nu) nih a ka thah phah lai, a ti,” tiah bawmtu nih an chimchin.

Max cu, Rady Children’s Hospital sii-inn ah an tlikpi. Max nu Dina nih hlathlai a thiammi Dr. Robert Bove a hlan i, Max a tlaknak kong cu, a chekhlatter. Dr. Bove nih Max hi aa cuanhmi scooter in cuti men cun, hleihlak ah a tla kho lai lo, ttuang phah carpet chahpi a ummi nih a kham awk a si, a ti; an lung a hring. Asinain cuti vial in a dih. Dothlattu palik nih Max a thihnak hi hleihlak in a tlak sual caah a si ko tiah an thanh.

A nulepa nih Max cu, sii-inn i mizaw zual chiahnak ICU khaan ah an umpi. A tlaknak ah a hmaifang ruh a kiak, a kengruh aa hliam caah a thluak a rawk. Rebecca tu cu, vanlawngbual ah Max nu i a unau nu Dina a va dong. Dina nih hin Rebecca a lunghrinh.

A thaizing July 12 ah Rebecca nih vanlawngbual ah a tlangval i a naupa Adam Shacknai a va don. Max cu, mizaw zual chiahnak ICU khaan ah a um ko rih nain dam lei a panh ko rua tiah an ruah lio a si.

A zanlei ah Jonah, Rebecca le Adam cu, hmundang ah zanriah an eiti. Jonah cu, Max umnak sii-inn ah riak dingin a kal. Rebecca le Adam cu, Spreckels an inn nganpi ah cun an ttin. Adam nih a chimmi ah, zan suimilam 8:00 hrawng in mileng khaan ah hngilh sii ka ding i, ka it, a ti. Mileng khaan cu, innpi carlei (hnulei) ah a dangte in a um i, innpi he aa peh lo, an karlak ah tual a um. Innpi dot hnihnak ah Rebecca ihnak khaan a um.

Zinglei 6:30 hrawng ah Adam nih 911 a chawnh hna i, palik sinah Rebecca thih thawng a thanh hna. Rebecca ihnak khaan kam ah innkaa a um i, cu innkaa in vun chuah ah innleng donhmi bi nawn a um. Cuka innleng in tanglei vawlei khi pe 9 le kutpi tia 2 a sang.

A ihkhun ah hri senpi an ttem i, khatlei hripar in Rebecca hngawng ah an ttem hnu ah, cuka innleng cun, tanglei ah a taklawng in an thlai. A hnulei a liang an leh i, a kut hnih in hri in an ttem, a ke pahnih kawp in, hri in an ttem lengah angki vandum rong thlehmi in rangchak banh bantuk khin Rebecca cu, a kaa an banh in a hnulei tukbukhor ah an ttem.

Adam nih a chimning ah, a ihnak khaan innleng in aa thlaimi Rebecca ruak ka hmuh bak in, coka ah ka va tli i, namte ka va lak, ke thum ngei cabuai ka hun i rawkpah; Rebecca ruak tang ah cabuai cu, ka chiah i, cabuai cungah ka kai. A ruak cu, ka donhpah in hri cu nam in ka chah i, zialmate in a ruak cu, vawlei ah ka chiah, a ti. Cun, Rebecca kaa i banhmi angki hri cu, ka phoih hnu ah CPR ka tuah, a ti.

911 a chawnh lio i Adam nih a chimmi a aw record a um i, zing sml. 6:48 ah a chawnh hna cu a si; thir lengmang in Adam nih cun, “Hri in amahte in aa awkmi nu ka hmuh… Nizan i hngakchiapa nan rak laknak hmun lila ah khan a si,” a ti. Max an laknak kha a chim duhmi a si. Adam aw record ah cun, Rebecca a auhnak aw, “Na nung maw?” tiah a nolh lennak aw ai tel.

Adam nih 911 a chawnh hnu in zanlei sml. 7:14 lawng ah Rebecca thihnak hmun ah palik lei San Diego Medical Examiner Dr. Jonathan Lucas a va phak ceo khi a si. Sml. 12 leng a rauh hnu ceo ah a va phan. Suimilam sau tuk chung, khualeng (tual) ah Rebecca ruak an phozar tiah thenkhat nih palik an soisel hna.

Palik nih Rebecca ruak an chekhlatning tehna, dothlatnak an tuahning tehna, Rebecca ihnak khaan kam innleng i keneh a zutdawining tehna, innkaa i cafang ngan in catial a umnak kong tehna, Rebecca thih lai zan lila i nu kiorak thawng an theihmi tehna, nu samnakpi nih Rebecca te inntual kutka a kinghning tehna, palik nih dothlatnak felfai an tuah loning tehna, mah le mah thah i an phuanning tehna, vawleicung mi tampi le lainawnnak kong thiamsang Mirang nu an lung a hrinning tehna, Rebecca chungkhar nih thiamsang sihni phu an i rawih hnanak kong tehna, Rebecca ruak an phulnak le hlathlainak an tuahmi kong tehna, civil law in taza an i cuainak kong tehna, criminal law in taza cuai nakding caah aa thupmi tehte va hmuhchuah a herhnak kong tehna kha ka vun tialthan te hna lai.

Chingchiah: Hi cabia hi na website, blog, group ti bantuk ah tar chin na duh men lai. Cabia remhpiak lo, a bia zuhpiak lo le chappiak lo in, na tar khawh. Asinain hi cabia hi na tar ahcun, tual ah taklawng in a rilmi Rebecca ruak hmanthlak kha hmang lo dingin kan nawl hna. Kha hmanthlak le ka cabia hi tarkep kha fakpi in ka duh lo caah a si.

Rebecca Zahau Thihnak Fak le Aa Thupmi Tehte Part 2

Nawlnak: Part 1 ka tial ri in atu zarh 4nak lawng ah Part 2 hi ka hun peh khawh. Zarh 2 chung ka inn internet ai rawk caah a si. Technician nih voi 2 an remh hnu lawng ah an remh khawh. A zarh 3nak ah zarh 2 chung aa khongmi ka rian ka ttuan caah ka peh kho hlei lo. Mobile data cu ka ngei sawk i, ca dang zong ka tial ko hna nain phone cun, tampi kawl le rel a haumi Part 2 kong hi tial awk a ttha lo. Careltu sinah atu nawlnak ka run tuah.

Part 1 ah khan biahmaithi siseh, Rebecca Zahau le a tlangval Jonah Shacknai chungkhar kong tawi siseh, Jonah fapa Max thihnak le Rebecca Zahau thihnak kong siseh, ka tial hna. Part 1 khi na rel hmasa ahcun, Part 2 nih hin an thawt deuh lai.

USA, California ramkulh, San Diego County (District), rili kam khuapi a simi Coronado, nuai mirumpa Jonah inn nganpi ah a cangmi lainawnnak a si. 2011 July 13 i Rebecca a thih hnu ni linak ah Max, kum 6 cu a thi ve. 2011 July 11 ah Max hi an innchung hleihlak in fakpi in a tla i, nikhua hngal lo in a um. A hmaifang ruh a kiak, a kengruh aa hliam caah a thluak a rawk.

Inn ah Rebecca Zahau le a naunu Xena Zahau an um lio a si nain hleihlat in Max a tlak lio hi an hmu lo. Max cu, thih bawh in Rady Children’s Hospital i ICU khaan ah an tlakpi.

A thaizing July 12 ah vanlawng bual ah Rebecca nih Jonah naupa Adam Shacknai a va don. Adam hi Tennessee ramkulh, Mississippi tivapi kuanghrawn ah a ummi Memphis khuapi i khua a sami a si.

July 12 zanlei ah Rebecca le a tlangval Jonah le Adam hi Fish Market rawldawr ah zanriah an eiti. Rebecca nih zanriah rawl tlawmte lawng a ei, holh lote ti awk in zanriah an ei lio ah a um. Adam nih a hnu ah a chim i, Rebecca hi zaangfakte a si tiah a ti. Asinain 2018 April 4 ah civil biaceih bawi pawl nih Adam hi Rebecca thihnak mawhphortu a si tiah phungbia an khiah. Civil biaceihnak le criminal biaceihnak hi an i dang, a hnu ah ka hun fianh te lai.

Rebecca le Adam cu, Spreckels Mansion timi Jonah te chungkhar inn ah an ttin. Jonah tu cu, a fapa Max a kuahnak Rady Children’s Hospital ah riak dingin a kal. Inncar ah a dangte in a ummi mileng le khual umnak inn ah Adam nih hngilhsi ka din hnu ah ka it, a ti. Rebecca cu, Adam a riahnak inn hmailei ah a ummi Spreckels innpi i a ihnak khan ah a it ve.

A thaizing zing sml. 6:48 ah Adam nih palik sinah Rebecca thih thawng a thanh hna. Rebecca cu, taklawng in hri in an thlai, a ihkhun ke ah hri senpi in an tem i, a hmailei innleng khamnak thir tungtlang cung in hri cu an hei lanhpi hnu ah, vawlei phan lo in Rebecca cu, a hngawng in an tlai. A hnulei ah a liang an leh i, a kut an ttem, a ke an kawp i an ttem fawn, a kaa ah angki vandum rong thlehmi in a chak an banh. Rebecca ihnak khaan kam ah innkaa phir a um i, cu innkaa in vun chuah ah thir tungtlang in khammi innleng donhmi bi nawn a um. Cuka innleng in tanglei vawlei khi pe 9 le kutpi tia 2 a sang.

Lunghrinh Awk A Tammi Palik Hlathlainak le Aa Thupmi Tehte

Adam nih a chawnh hna hnu in Rebecca thihnak hmun ah San Diego palik an va phan sawk nain zanlei sml. 7:14 lawng ah Rebecca ruak kherhlaitu ding San Diego Medical Examiner Dr. Jonathan Lucas belte a va phan. Sml. 12 leng a rauh hnu ceo ah a va phan. Suimilam sau tuk chung, khualeng (tual) le tthal nili lakah Rebecca ruak an phozar, hlathlainak kong ah zeimaw tiin midang he a diklomi ceihhmainak an ngeih ta ruangah a si lai tiah thenkhat nih palik an soisel hna.

Rebecca a thih hnu zarh 7nak 2011 September 2 ah San Diego County palik bawi Bill Gore nih media khawmpi a kawh i, an hmai ah Rebecca le Max thihnak an hlathlaimi kong a thanh. Max thihnak hi hleihlak in a tlak sual ruangah a si, a ti. Rebecca hi amahte in ai that tiah a phuan.

Media minung an lung a tling lo tuk i, palik Gore cu, bia an hun hal thluahmah. Asinain Gore nih an biahal a let cawk ti hna lo, ai veng cawk ti lo le an zamtak hna. Palik nih Rebecca thih kong an thanhmi cungah mizapi lung a tling lo tuk. Mahte in i thahnak kong tehte kawl a thiamsangmi pawl zong nih an zum lo, an lung a hring.

Rebecca ruak a chekhlaitu palik Dr Lucas nih Rebecca lu ah hliamhma a ummi kha hitihin a hrilhfiah. Rebecca kha a tunglei si lo in sawnnawn in innleng a pal lio ah a kal i, innleng tlang khamnak tungtang ah a lu aa khawn bia a si kho, cucaah a lu hliamhma hi a si kho tiah a thanh.

Rebecca hngawng, a keng, a ban le a ke ah hliamhma vual tamnawn an um. A hngawng hliamhma hi hri in aa thlainak in a si tiah Dr Lucas nih a thanh. A dang hliamhma pawl tu hi cu, i thlai awk ah sawnnawn in innleng pal kaw, innleng tungtlang in vawlei lei ah a sirlei in a va tlak tikah burbuk le thingkung nih an hriah caah a si lai tiah Dr Lucas nih a ti. Asinain palik fianh lomi tehte tamnawn an um, a hnu deuh ah ka rak tial te hna lai. Rebecca chungkhar hlanmi lawyer phu hmuhmi kong zong ka run tial te hna lai. Palik hmuhmi kong he ai kalhnak a tampi.

Palik nih Rebecca ihnak khaan chung i a ihkhun kam ttuang ah hmunhnawm khonnak plastic zal pakhat, rongsi thuhnak brush ngan pakhat, rongsi thuhnak brush hme pakhat, coka namte pakhat, coka namtong pakhat le hmunthor khonnak plastic zal tangah cun rongsi dum dur pakhat an char hna. Palik nih hi kong hi an fianhning ah Rebecca hi zuksuai le sithuh a huammi a si i, amah a si ko lai ti khin an ti.

Rebecca ihnak khaan innka pakhat ah cafangpi in hitihin aa tial, “Amah (nu) nih amah (pa) a khamh cang, nang nih teh amah (nu) cu na khamh kho maw?” tiah. Na lung a fian nakdingah a sullam kha hitihin rak lachung ko. “Rebecca nih Max a khamh cang, Jonah/ Adam, nang nih teh Rebecca cu na khamh kho ve maw,” tiin.

Palik nih hi catial kong hi an fianh duh lo. Aa thah lai ah Rebecca nih a tialmi a si ti ngaingai cun, an ti duh lo. Asinain palik Gore nih Rebecca hi zuksuai le rongsi thuh a huammi a si le a ti ttheu ko i, Rebecca deuh a puh. Asinain Rebecca chungkhar nih hi catial hi Rebecca kuttial a si lo, a kuttial he ai milh lo, an ti. Rebecca pasal tthing Nalepa zong nih hi catial hi Rebecca kuttial si dawh a si lo, a ti ve. Palik nih i vennak bia an chimmi ah, hi catial hi cafangpi in tialmi si kaw, a tialtu ngaingai hngalh awk a ttha lo tiah a hnu ah an ti.

Asinain mithah lainawn kong ah chekhlai le dothlat thiam prosecutor minthang bik pakhat a si vemi nu Marcia Clark nih hi catial kong ah hin a lung a hring ve. Rebecca hi mahte that a si ka zum lo, mi nih an thah ti hi ka zumh. A thihning kong hi zoh tikah mahte in aa thatmi pawl nih an tuah balmi kalphung (theory) he aa kalh. Ca aa tialmi khi, ‘amah’ tiin aa tial i, Rebecca nih a tial ahcun, ‘ka’ a hman ding a si, tiah a ti. ‘Ka’ hman hi mahte in aa thatmi catial tawn ning a si, a ti duhnak.

Palik nih kutneh dawinak le DNA an tuahmi ah hitihin an chim. Khual le mileng khaan innka onnak thir ah siseh, Rebecca ihnak khaan innka onnak thir ah siseh, innleng innka phir onnak thir ah siseh, coka namtong an charmi ah siseh, rongsi dur an charmi ah siseh, hri an ttemnak Rebecca ihkhun ke ah siseh, Rebecca kutneh kan hmuh hna, an ti. Asinian thlainak hri belte ah hngakchia kutneh le hngalh awk a ttha lomi mi kutneh an um ve tiah palik nih an ti. Hi kutneh pahnih hi ihkhun ke ah ttemmi hri ah an hmuhmi a si.

Rebecca a thihnak hmun ah hin midang nehnang tampi an um awk in kan ruahning a si ko tiah palik department nih an ti. Zeicatiah an inn ah hin mileng le khual chukcho bualcelnak hmun a si caah tiin palik department nih an ti.

Palik nih Rebecca DNA le hri ah a ummi DNA an lak i, an chek tikah Rebecca DNA lawng kan hmuh tiah palik nih an ti. Midang DNA phun a pelpawite khi a um ve nain DNA hun tuah awkah a hme tuk tiah an ti rih. A ihnak khaan chung ah hmuhmi coka namte zong ah hin Rebecca DNA lawng a um tiah an tichap.

Na lung aa tuai lo nakdingah hun theichung ti ka duhmi cu, Rebecca thihnak khualipi Coronado hi tangka phalh in hlanmi mithahthiam lainawnthiam minthannak khua a si. Tangka phalh in lainawn an i fial tikah biakam (contract) tuah tawnnak khua a si.

Rebecca a thih hi 2011 July 13 zinglei sml. 3:00 hrawng a si tiah a ruak hlaitu palik Dr Lucas nih a ti. Rebecca a thih lai zan July 12 zan sml. 11:30 hrawng ah Rebecca te innpa pakhat nih minu pakhat kio thawng le rak thawng ka theih tiah a ti. Palik nih an hlat tikah, Rebecca thihnak le kiorak thawng hi i pehtlaih dawh a si lo, thawng a theitu nih khuazeilei set in dah kiorak thawng cu, a rat ti a hngal kho lo, innpa ah a ummi tleirawl mineng thla buaibainak thawng hna a si ko lai tiin palik nih cun an ti.

Mithmutu midang pakhat nih Rebecca thih lai zan July 12 ah cun, Rebecca umnak Spreckels Mansion inn kam velchum ah aa helhhummi minupi pakhat, sam saupi, sam nakpi a hmuh ve. Palik nih mah minu hi kan hngalh ko i, amah chungkhar minung a si tiah an ti. Asinain Max nu Dina, asiloah, a nau nu Nina si dawh an si lo. Zeicatiah minupi cu, anmah nakin a pumrua a ngandeuh, a sampi zong cu, sau kaw, Dina le Nina sam he aa milh lo, annih an sam a saupi lo.

Ca hi a sau ngai cang le Part 3 ah ka hun pehthan lai.

Rebecca Zahau Thihnak Fak le Aa Thupmi Tehte Part 3

Part 1 ah khan Rebecca chungkhar kong siseh, a tlangval Jonah Shacknai chungkhar kong siseh, Johan fapa Max thihnak le Rebecca Zahau thihnak kong siseh, Part 2 ah khan palik nih Rebecca thihnak le Max thihnak ah hlathlainak an tuahmi kong siseh, palik hlathlainak phichuak an thanhmi kong siseh, ka tial hna.

Atu Part 3 na rel tikah, Part 1 le Part 2 kha na rel bal lo ahcun, na lung a fiang set men lai lo. Cucaah a tanglei link hin Part 1 le Part 2 rel nakding kan chiahpiak: –

Rebecca Zahau Chungkhar le An Sihni Minthang Phu Nih Dingthlu An Kawlnak

Rebecca Zahau a thih in zarh 7nak 2011 September ah San Diego County palik bawi Bill Gore nih Rebecca hi amahte in ai that tiah a thanh. Rebecca chungkhar nih palik bawi Bill Gore a thanhmi bia hi an pom kho hrimhrim lo, Rebecca hi mah bantuk minung a si lo, Khrihfa a si, amahte in a nunnak aa la hrimhrim lai lo, mi kut in a thimi a si tiah fakpi in an zumh i, a thihnak kong tehte hmuhchuah an duh tuk hringhrang. San Diego County palik nih mei cikcek in dothlatnak le tehte kawlnak rian an lim lo, rian an lim hlan ah hnawhsare in bia an khiah tiah Rebecca chungkhar nih an ti.

Rebecca chungkhar bia hi, San Diego County Palik Department nih palik website in hitihin bia an leh hna. “Kannih (palik) nih dothlat a thiammi mithiam 7 in 15 kar kan i ngeih hna, Crime Lab (science lei thiamnak in sualtuah tehte kawl) mithiam an i tel i, zarh 7 chung khengte mah hi thihnak kong bakbak hi an dothlat, an chekhlai. Hnawhsare in bia kan khiak lo. Hi thihnak kong hlathlainak caah hmanrua thilri le mithiam tam liangluang kan ngeih hna i, caantling bak in rian an tuan. Atir ni 7 in ni 10 tiang ah cun dothlat a thiammi kan minung nih hi thihnak hi lainawnnak (homicide) a si ko lai ti deuh ngawt in an zumh i, an dothlat. Tehte hmuhchuah hram an hun thok tikah mah cu an zumhnak cu, aa thleng. A donghnak ah cun hi thihnak hi mahte in i thahnak a si tiah dothlatnak i aa telmi vialte an lung a pem dih…” tiah an leh hna.

Asinain palik thanhmi bia hi Rebecca chungkhar lawng a cohlang lomi an si lo, lainawn kong dothlat thiamsang mi tampi le mi vialte ti awk nih an zum lo i, an cohlang ve lo. Cucaah 2011 November in Rebecaa Zahau chungkhar a dirpitu pawl nih “Justice for Rebecca Zahau (Rebecca Zahau hrangah Dingthlu)” timi website an ser i, Rebecca Zahau chungkhar nih palik biathanh an ralchanhnak bia tlingte in an tarpiak hna.

2011 donghlei ah Rebecca chungkhar nih Seattle khuami sihni Attorney Anne Bremner an hun i ruaih, Anne Bremner nih man hauh lote in (pro bono) a tuanpiak hna. Rebecca nu nih, “Kannih cu, chungkhar sifak kan si. Dothlat a thiammi pawl hi tangka kan phalh kho hna lo,” tiah a ti.

Detectives taking picture of mysterious writing on wall

Anne Bremner hi sihni minthang a si, biabuai (case) minthang pawl a buapi balmi a si. Anne nih hin science thiamnak in dothlat a thiammi forensic pathologist minthang Dr. Cyril Wecht le Dr. Mauric Godwin aa ruaih chin hna. Dr. Cyril Wecht hi American President John F. Keneddy thah le nawn a sinak kong ah dothlatnak a tuahtu Warren Comission phu hmuhchuahmi bia hmanh a hun chal thiammi pa a si.

Rebecca a thih in thla 4nak ah a voi 2nak Rebecca ruak chekhlai dingin Anne Bremner legal phu nih thlan an hun phul. Dr Phil timi nih Rebecca thlan phulnak le ruak chekhlai man hi a liampiak hna. Dr. Cyril Wecht nih Rebecca ruak cu, a hun chekhlai. Asinain a ruak pumpuluk in a chekhlai kho ti lo. Zeicatiah San Diego Medical Examiner Dr. Jonathan Lucas nih Rebecca ruak kha a voi khatnak a rak chekhlai lio ah, ruak rawkral thutman khamnak sii a rak chunh caah a si.

Dr. Cyril Wecht nih palik sibawi Dr Lucas i a hmuh bantuk khan, Rebecca lukheng ah thi a dutmi hliamhma (hemorrhage) pali kha hitihin a hrilhfiah. Mi nih Rebacca lu ah timh ciammamte in kuttum, asiloah, thilri pakhatkhat in an cumhnak a si kho tiah a ti. Dr Lucas nih khan cun, innleng tlang ah a lu aa khawn bia a si kho tiah a rak timi kha a si. Dr. Cyril nih a luvun hi pem cu a pem lo, a lu i an cumhnak hin Rebecca hi thih tainai cu a thi colh lai lo nain nikhua hngal lo le lungfim lo in a um lai tiah a ti.

Dr Cyril nih a timi cu, mizeimaw nih Rebecca takpum hi innleng tlang in thiam ngai in an thlak lai i, an nehnang vialte dawi khawh lo dingin an tuah bia a si lai, a ti.

Rebecca hngawng i hliamhma a ummi kong ah palik sibawi Dr Lucas nih hri in aa thlainak hliamhma a si tiah a rak thanh. Dr Cyril tu nih cun hri thlainak hliamhma a si a zum lo, minung kut in fakpi in a hrom an ditnak hma tu a si deuh lai tiah a ti. Dr Cyril nih cun Rebecca hi mi nih an thahmi a si tiah a zumh.

Rebecca kehlei ngalpacal le vorhlei kephak hrawng ah aa benhmi tape hri pelpawi pathum an um. Rebecca a thihnak inn Spreckels Mansion innchung ah dothlat thiam pawl nih cu tape hri hmanbang cu, an kawl len nain an hmu kho lo. Cu kong ah Dr Cyril nih hitihin a ti, Rebecca nih tape hri hin a ke pahnih aa ttem hnu ah a lung aa leet than i, aa phoih hnu ah hri tu in aa ttem than an ti bia maw a si hnga tiah bia-eng in a ti hna. Cuti a si kun ah, ziah Spreckels Mansion innchung ah tape hri a ciknak tape kual cu a um kun lo tiah a ti. A sullam cu, Rebecca nih amahte in a ke aa tem ahcun, a hmanbang tape kual a um awk a si, mi nih an ttem caah tape kual cu, an i kalpi diam, hmuh awk a um ti lo ti he a sullam ai khat.

2011 ah Dr Lucas nih Rebecca ruak chekhlainak report a thanhmi ah, Rebecca el le chiatha i thidor a ummi kha a thi a rat lio caah a si, tlaihhremnak he aa pehtlaimi a si lo, a rak ti. Palik nih Spreckels Mansion i an hmuhmi namte ah khan zeihmanh DNA hmuh awk a um lo tiah an rak ti.

Asinain 2017 ah taza cuainak i Rebecca chungkhar sihni pa Attorney Keith Greer nih namte tlaihnak hlok ah khan Rebecca thisen a um ko, a chiatha chungah namte an sawh tiah a ti. Thiamsang nih an hmuhchuahmi a si, a ti. San Diego County Palik Department nih Rebecca hi hri in amahte in ai awk ko, a kut le a ke kha amahte in hitihin aa ttem kho tuk tiah minu pakhat kha Rebecca bantuk ah an canter i amahte in a kut le a ke aa ttem lio kha video in hmuhsaknak an rak tuah.

Anne Bremner nih a voi hnihnak ruak hlaimi result chirhchan in a chim i, amahte in hi bantuk in ai that ti hi, “Vawleicung tuanbia ah hihi a hmasa bik biabuai (case) a si hnga… Nihchuak le ttahchuak bak khi a si,” tiah a ti. Kadang i a chimmi ah Bremner nih biavel in a ti i, (nuai mirumpa Rebecca Zahau tlangval) Jonah Shacknai nih a rumnak chawva a hman i, cawl kho lo in palik a tuah hna, Rebecca thihnak tehte an hmuh khawh lo nakdingah, a ti.

Palik sibawi Dr Lucas nih a report ah khan Rebecca keng, a ban le a ke i hliamhma vual tamnawn a um kongah khan sawnnawn in a kal caah innleng tlang ah aa khawng, a sirpaleng i, i let bu in tanglei i a va tlak tikah tang ah a ummi burbuk le thingkung nih an rak hriah caah a si lai, a rak ti.

Dr Cyril nih Rebecca hi a hnulei ah a liangleh bu in hri in an ttem i, innleng tlang ah a kai i, a sirpaleng in a takpum i leh bu in a tlak ahcun, ziah a hmaifang ah hliamhma a um ne kun lo tiah a ti. Cuti a si ahcun, a hmaifang hi burbuk le thingkung nih an hriah awk a si, a ti duhnak.

Rebecca Zahau le an sihni phu nih an timi cu, dothlattu palik nih a tirte in Rebecca thihnak kong hi an dothlat duh lo rengreng ko, an ti. Rebecca thihnak kong fiangte in a chim khotu tehte tampi a um ko nain tthate in an dothlat duh lo, an ti rih.

Spreckels Mansion innchung i Jonah ihnak khan i takkholhnak khan chungah sambu bukhat le thidor dorkhat an um tiah an ti. Hihi, palik nih tehte hrangah DNA an tuah bak lo, an ti rih. Hi bia hi San Diego County Palik Department nih an website in an leh ve hna i, Rebecca nih a thi a rat lio si kaw, Jonah khan hi a hman kan ti caah DNA kan tuah khe lo. Jonah ihnak khan hi Rebecca a thihnak hmun he aa hlat caah tehte kawlnak ah kan huapchih lo tiah an leh hna.

Palik nih dothlatnak an tuah lomi a um rih. Jonah naupa Adam ihnak khual le mileng inn chung i Jonah ihnak khan chungah tifim dildelte thawl khat a um i, palik nih hihi DNA an tuah lo. Cun, Adam a ihnak mileng khan chung i hnawmbawm ah nu tawhrolh chungnawh tuah khat, a rang rong, sen-eu rong le cica rong an um. Hi zong hi DNA an tuah hna lo. Rebecca chungkhar le mi dangdang nih hi kong ah palik an soisel hna.

Palik nih an website in an hun leh hna i, kha tawhrolh chungnawh kha DNA kan tuah lonak cu, Rebecca kha tlaihhremmi a si lo kan ti caah a si. Jonah inn ah hin tleirawl nu pawl nih cu hlan deuh ah puai an rak ngeih tikah an hlawnhmi tawhrolh chungnawh a si ti kan zumh caah a si, an ti.

Rebecca Zahau Thihnak Fak le Aa Thupmi Tehte Part 4

Atu Part 4 na rel tikah, Part 1 le Part 2 le Part 3 kha na rel bal lo ahcun, na lung a fiang set men lai lo. Cucaah a tanglei link hin Part 1 le Part 2 le Part 3 rel nakding kan chiahpiak: –

Part 4 biatlang ka tar hlan ah, Part 3 a pehpar ka tial hmasa lai. Part 3 pehpar ka tial hlan ah, Part 1 i ‘Chungum Biatlang’ ka tianremhmi nambar 5 “Palik Nih Tehte Kawl Lo In An Al Peng Hna, An I Sawlphelh Peng,” timi kha Part 3 ah khin ka telh cang caah a dangte in ka tial ti lai lo.

Rebecca thihnak kong chekhlaitu Attorney Anne Bremner legal phu lakah ai telmi le minthang a simi forensic pathologist Dr. Mauric Godwin nih Rebecca thattu keneh tehte a hmuhchuah. “The Killer Stepped on top of Victim’s Footprint” tiah Dr Godwin nih a ti. A sullam cu, ‘Rebecca keneh par ah a thattu nih a lamh,” tinak. Hi keneh hi Rebecca thihnak innleng leiphang (leidip) hnawm ah a um, Rebecca keneh kam ah a ummi a si.

Rebecca thihnak a chekhlai hmasatu San Diego County Palik nih innleng i keneh cu hman an thlak. Cu hmanthlak cu, palik nih an hun chek i, palik keneh le Rebecca keneh lawng an si tiah an ti. Asinain Dr Godwin nih felte in a hun chekhlai ve tikah palik keneh le Rebecca keneh cu, a dang veve in an um ko, Rebecca keneh kamte ah aho a si hngalh lomi midang keneh a um tiah a hmuhchuah. Hi midang keneh hi San Diego County Palik nih tehte kawlnak ah hmang lo in an hnon sawhmi a si. Cucu, palik nih felfeite in an ttuanchuah lomi a si.

Rebecca a thih caan kha 2011 July 13 zinglei sml. 3:00 hrawng a si tiah a ruak hlaitu palik Dr Lucas nih a ti. A tlangval naupa Adam nih zinglei khuadei hnu ah Rebecca thlaihnak hri kha nam in a chah. July 13 ah cun palik nih Adam hi Coronado palik zung ah an i kalpi i, Rebecca thihnak ah ai tel maw tel lo tiah polygraph hneksaknak an tuah. Polygraph timi cu, sehlei thiamnak phun khat a si, lunghrinhmi minung kha a thahri turning tehna, a thin turning tehna le a pumchung thilri cawlcanghning tehna in chekhlatnak seh phunkhat a si.

Hi polygraph hi Adam hnatlaknak in palik nih rikawt an tuah. Polygraph a thiammi Paul Redden nih Adam rikawt polygraph result cu, a chekhlai tikah Rebecca thihnak ah Adam ai tel le tel lo bia a khiak lo. Asinain palik nih Adam cu, an luatter huar ko. Rebecca sihni hmasa deuh Anne Bremner nih Adam hi polygraph an tuahthan awk a si, a ti. Asinain tuah nolh a um ti lo.

Rebecca a thih lai zan July 12 ah khan Max nulepa Jonah le Dina nih hleihlak in a tlami an fapa Max, kum 6 kha si-inn ah an riahpi. Zan suimilam 12:00 khan July 13 a hun i thok. Zan sml. 12:50 ah Rebecca nih a phone ah rak kuatmi awcakuat (voice-mail) pakhat a hun chek tiah palik nih an ti. Asinain cu awcakuat cu, Rebecca phone in ai hlo, a tlau. Rebecca phone billing rikawt an chek tikah aho nih dah a kuat ti a lang lo. Palik nih an ti i, cu cakuat cu, si-inn ah Max a zual chin lengmang ti an thanhnak cakuat a si, an ti i, aho nih dah a kuat ti bel an fehter fawn lo. Rebecca unau nu Mary Zahau nih a chim i, palik nih an kan chimh le ca a kuatu kha Jonah a si an ti tiah a chim. Rebecca phone ah awcakuat hlohmi cu, palik nih 2011 October thla ah hmuhchuah than an zalh nain tlam an tlinh thai lo.

Rebecca thih thawng kha Adam nih Jonah sinah phone in a hei thanh. Jonah cu, si-inn leng ah a va chuak i, Adam phone chawnh cu, a leh. Si-inn khan chung i a hung luh tikah, Jonah nih Max nu Dina sinah Rebecca a thihnak kong a chimh chin, “Asian honor” a si ko cuh tiah a chimh. A sullam cu, Rebecca cu, Asian mi a si i, a zohkhenhmi Max hi hleihlak in a tlak caah mawhphortu ka si tiin aa ruah le a nunnak ai la a ti duhnak a si. Hi a bia hi, palik nih Jonah kha July 13 chun i bia an hal tikah Jonah nih a chim nolhmi a si. Lunghrinh awk a simi cu, Jonah hi Rebecca a thih tikah a khuaruah a har lo, ahlankan in rak theicia sehlaw cu bang.

2012 January ah Rebecca Zahau chungkhar sihni Bremner legal phu nih California Department of Justice Attorney General chang Julie Garland sinah cahmai 18 a simi cakuat an tial i, Rebecca thihnak biabuai (case) hi a thar in onpiak than dingin an nawl. Asinain an nawlnak cakuat cu, an hnon, an cohlanpiak hna lo.

Rebecca thihnak kong ah 2011 September i palik nih amahte in ai that tiah bia an thanh hnu khan mi vialte ti awk nih palik le Jonah an soisel ngaingai hna tikah Jonah nih hlathlainak a tuahtu DNA office sinah Rebecca thihnak biabuai onpiak than dingin ca a kuat ve hna. Hiti a tuah hi Rebecca thihnak kong ah sualnak kan i nehlonak fiangchin seh ti ka duh ruangah a si tiah Jonah nih a ti. Asinain Jonah cakuat zong cu, DNA office nih an hnon tthiamtthiam ve.

Palik nih Rebecca hi amahte in aa thatmi a si tiah an thanhnak sullam cu, a thattu an um lo caah hi biabuai (case) hi a dih cang, palik nih kan cawlcangh a hau ti lo, hnathiangte in kan um cang lai tinak khi a si.

Bremner legal phu nih Rebecca thihnak kongah palik thanhmi he ai khat lomi tehte an hun chuahpi nain palik nih tehte thar pakhat hmanh a um hlei lo tiah bia an al hna.

Criminal Law (Sualtuah Phungbia) Si Lo In Civil Law (Palhnak Phungbia) In Taza An I Cuai

Palik nih Rebecca hi amahte in aa that tiah an thanh caah Criminal Law in taza i cuai khawh a si ti lo.

Na lung a fian nakdingin tahchunnak ka tial lai. Rebecca hi Adam le Jonah nih an thah tiah al awk ttha lo in tehte a um ahcun, US cozah ai-awh in palik le cozah prosecutor nih taza an cuai hna lai. Cu bantuk tehte kawl le hmuhchuah cu, Rebecca chungkhar rian si lo in, US cozah ai-awhtu palik le cozah prosecutor rian tu a si. Cu bantuk tehte cu, ‘beyond doubts’ lunghrinh awk le al awk a ttha bak lomi tehte fek a si, a hau. Cu tehte fek taktak cu, palik le cozah prosecutor nih biaceih bawi sinah an chuahpi lai. Adam le Jonah nih Criminal Law a thiammi lawyer an i hlan ve lai i, bawiceih zung i biaceih bawi hmai ah cozah prosecutor le Adam le Jonah lawyer kha phungbia le tehte hmang in bia an i al lai.

Biaceih bawi nih a herh a tining zat in biaceihnak nikhua a khiah lai i, voi tam-ial tiang biaceih zung ah an bia-al a ngaih lai. Hi biabuai hi theih awk le hngalh awk a simi bia le hla le tehte a tling ko cang tiah biaceih bawi kha a lungdi a riamh tikah Rebecca thattu nan si, nan si lo ti kha bia a khiah lai. A thattu nan si ko a ti ahcun, phungbia chirhchan in thong ah kum cu zat tla uh tiah bia a khiah lai. A herh a ti ahcun, cawi le liam dingin tangka cu zat liamh hna uh tiah thongthlak lengah a chap ko hna lai. Cucu Criminal Law in taza i cuaining cu a si.

Civil Law tu cu, Criminal Law bantuk a si lo. Rebecca chungkhar nih sihni an i hlan lai i, Rebecca thihnak ah mawhphortu hi Adam le Jonah an si ko timi tehte kawl kha Rebecca chungkhar hlanmi sihni rian a si cang. Adam le Jonah nih sihni an i hlan ve lai, an sihni nih khan Rebecca thihnak ah mawhphortu an si lo ti tehna, Rebecca chungkhar sihni chuahpimi tehte hi a tling lo, a tlak lo, cu ruang kha ruangah ti tehna kha biaceih bawi hmai le jury phung biakhiaktu hmai ah bia an al ko hna lai. Adam le Jonah sihni nih tehte kawl an hau lo. Rebecca chungkhar sihni bia le tehte va dohdal kha an rian cu a si.

Biaceih bawi si lo in Jury bawi pawl tam u, cu zat, kha zat timi nih bia an khiah lai. Rebecca thihnak ah mawhphortu nan si ko tiah phungbia an khiah ahcun, tangka cu zat kha zat nan liamh hna lai tiah dantatnak bia an khiahchih lai. Thong belte thlak khawh an si lo. Criminal Law a si lo caah a si. Civil Law ah cun, liam le pal in dantatnak taza cuai a si. Criminal Law ah cun, tehte kha ‘beyond doubts’ a si lio ah, Civil Law ah cun, ‘beyond doubts’ a hau lo. Jury phungbia khiaktu pawl kha an lungpem lak in tehte le bia in hun chimh khawh hna a hau.

Part 5 ah taza an i cuainak kong cu, tling ngai in ka run tial te lai.

Rebecca Zahau Thihnak Fak le Aa Thupmi Tehte Part 5

Part 5 ah hin, Civil Law in Rebecca Zahau chungkhar nih Adam, Dina le Nina taza an cuainak hna kong ka tial. Part 4 ah a tlangpi in Criminal Law le Civil Law in taza i cuaining kong ka tial. A tanglei vandum zawng khi hmet hna law ka rak tial ciami pawl na rel khawh hna lai.

Criminal Law cu, cozah nih sualnak a tuahmi minung taza a cuainak hna phungbia a si i, dantatnak cu, thongthlak in khiah a si. Civil Law cu, mi le mi kar ah taza i cuainak phungbia a si i, dantatnak cu, thongthlak si lo in chaw le va in liam le pal awk biakhiah a si.

2012 January ah Rebecca Zahau chungkhar sihni Bremner legal phu nih California Department of Justice sin ah Rebecca thihnak biabuai (case) hi a thar in onpiak than dingin an nawl hna nain an cohlanpiak hna lo.

Cucaah kum 2013 in Rebecca chungkhar nih a cunglei i langhtermi minung 3 khi Civil Law in taza cuai hram an hun thok hna. Adam cu, Jonah naupa a si; Jonah cu, a thimi hngakchiapa Max i a pa a si; Max nu cu, Jonah nupi tthing Dina a si; Dina cu, Nina i phir a chuahpimi unau nu a si. Max hi rak thi hlah sehlaw, Rebecca zong a thi ve hnga lo; Max thihnak nih Rebecca thihnak a chuahpi, aa pehtlai tiah a mikip thinlung ah a um. Asinain San Diego County palik tu nih cun an pehtlaihter lo.

Zapi lakah a hung lar bikmi theory (ruahning fianhnak) pakhat cu, Rebecca thih zan 2011 July 12 – July 13 ah khan Max kha thih bawh in zualhma lei panh kaw, thinhung le thinlinh celh lo in Dina le Nina nih Rebecca hi Jonah te inn nganpi tual ah velh awk in an dir-onh, vuak zong cu, an hun vuak thluahmah i, nikhua hngal lo tiang in an hun velh. Asinain Rebecca kha a lung a hung fimthan tikah, Dina le Nina nih nan ka velh tiah Rebecca nih hun ti hna sehlaw a dawh. Cun Adam nih a hun bawmh ve lawlaw hna. Dina nih thilri in Rebecca kha a lu ah a hun cumh tikah Rebecca kha nikhua hngal lo in a tlu thai. Cun, an pathum in an i bawm i, Rebecca thilthuam an phoih, hri in a kut le a ke an ttem, angki tlek in a chak an banh, duh tawk in an phomh hnu ah innleng tlang in an thlak i, hri in an thlai, ti hi a si. Hihi, theory an hmanmi fianhnak cu a si.

Cuti phun cun, Rebecca chungkhar sihni nih taza a cuaipiakning hna a si. Civil Law in taza i cuainak ah Rebecca chungkhar sihni cu, Attorney C. Keith Greer a si. Attorney Anne Bremner kha Rebecca thihnak tehte kawlnak ‘Criminal chekhlainak’ a tuahpiaktu hna lawng a si.

Kum 2013 ah a cunglei i langhtermi minung 3 khi Rebecca thihnak ah mawhphortu an si tiah $ nuai 10 (sing 100) liam le pal dingin taza an hun cuai hna. Lunghrinh bik awk Jonah tu cu, taza cuaimi ah a tel hmanh aa tel lo. Attorney Anne Bremner tu nih cun, Jonah lengmang hi Rebecca thihnak kong ah a lunghrinhmi a si. Nuai mirumpa si kaw, Jonah nih Rebecca an thahnak tehte hlothlau ding le thuhnawh dingin nawlngeitu le palik hi a chawva le a thilti khawhnak in a hip hna ti khin Bremner nih a chim ttheu ko.

San Diego District (County) palik nih tehte an hmuh duh lo ruang, asiloah, an hmuh khawh lo ruang, asiloah, an thuhnawh ruangah, lungfiang dildelte tehte chuahpi khawhmi a um lo. Cucaah, Rebecca thihnak ah Criminal Law in tazacuainak hmalak balmi a um lo.

Kum 2017 a hung phak tikah Dina le Nina hi Rebecca thihnak i tazacuainak cazin in an min an hun hloh hna. Zeicatiah Rebecca thih zan July 12-July 13 ah Dina hi Rady Hospital ah a fapa Max kha a riahpi tiah CCTV an hun chek tikah an fehter. Cu leng ah sii-inn i a luh le a chuahnak cazin rikawt tiang nih Dina hi Rebecca a thihnak inn ah kalmanh caan a ngei lai lo ti khi a sawhpiak.

A naunu Nina tu nih cun, July 12 zan sml. 11:00-11:30 hrawng ah Rebecca thihnak Jonah inn ah ka va kal khe ko tiah ai phuang. Hleihlak in Max a tlaknak kong ah Rebecca hi biahal ka duh caah ka va kal, a ti. An inn hmailei luhnak kutka leng ah kai chokpade ko, kutka zong cu, ai ong maw ong lo tiah ka va kingh ko i, innkulh chung tu ah cun lut lo in ka kir tiah a ti. Nina sihni nih a chim i, a cell phone rikawt nih Nina hi tazacuainak ah lunghrinhmi a sinak a donghter, a ti. Rebecca thihnak hmun ah Dina le Nina hi an nehnang hmuh awk tehte le DNA tehte a um lo caah tazacuai lunghrinhnak cazin in an luatter hna.

Rebecca a thih zan ah Jonah hi a fapa Max chiahnak Rady Hospital ngeihmi Ronald McDonald House ah zan khuadei in a um kha CCTV nih a langhter. Cucaah Rebecca thihnak kongah hin lunghrinhmi cazin ah an chia bal lo.

Rebecca thihnak kong ah hin, a pasal tthing Neil Nalepa kha lunghrinh hrulhhralh awk a ttha hlei lo. Zeicatiah 2011 July 12 zan khua a muih hlan ah Arizona ramkulh Scottdales khua community college ah sianginn a kai ko i, July 13 zinglei sml. 5:00 ah minung tam-ial nih cuka khua i pum cernak ‘gym’ ah an hmuh fawn. Cucaah Arizona in Rebecca a thihnak ramkulh Coronado ah vanlawng hmanh in tlunkal manhnak caan a um lo.

2017 i Rebecca thihnak kong tazacuainak cazin in, Dina le Nina min an hun hnawhpiak hna tikah, Rebecca Zahau chungkhar sihni Greer nih zapi theih in thawngla khawmpi (press conference) a auh i, Dina le Nina cu, ngaithiam a nawl hna. Greer nih, “Tazacuainak i kan chuahpi hmasami theory ah (Dina le Nina) kan rak telhmi hna hi, a palh hlirhliar (flat-out wrong). Ka chim khawh tawk ah cun, hi bantuk hin, Attorney pakhat nih zapi theih in, taza a cuai tthingmi minung ngaihthiam nawl hi a um bal lomi a si,” tiah a ti.

Rebecca chungkhar sihni Greer nih tazacuainak catial a hun remh i, 2011 July 13 i Rebecca thahnak ah hin amah Adam lawng hi mawhphortu a si, a ti. Biaceih zung nih Greer remhmi ca cu an hun pompiak i, 2018 February 26 in jury biaceih phu hmai ah tazacuai rorelnak an hun thok. Hi biaceihnak ah hin jury biaceihtu nu 6 le pa 6 – an dihlak ah 12 an si.

US le Australia tbk. i tazacuaining le biaceihning system hi Asian ram tampi le Myanmar ram tbk he an i khat lo. (Cu kong cu, tial kai tinh lo caah ka fianh lai lo). Part 4 ah Criminal Law le Civil Law in taza i cuaining kha a tlangpi in ka tial cang. Jury kong hi, tlawmte in ka hun telhchap lai.

Jury biaceihtu hmai i taza an i cuai tikah biaceih bawi (judge) kha aa tel ve tthiamtthiam nain biaceihtu bawi cu, tazacuainak i ‘chiarperson’ a tlaimi bantuk khi a si. Biaceih inn ah kaphnih sihni/ prosecutor kha voi tam biathal an i cak (cross-examine) hnu ah bia a hung fiang cikcek ko cang. Cun, biaceih bawi nih aa thawh lai i, “Ka hawile Jury biaceihtu pawl, bia a fiang cikcek ko cang i, biakhiahnak cu, kei si lo in, nangmah tu nih hun khiak ko cang u,” ti phun khin a hun ti hna lai. Cun, jury cu, an hun i pumkhawm lai i, vote in bia an chah lai. Criminal Law in Jury biachahnak ah cun, Jury kha minung 12 an si ahcun, an dihlak 12 ning in an hna a tlak, a hau. Civil Law tu ah cun, phungbia khiahnak ah Jury 12 lak ah a tlawmbik ah 9 (cheuthum cheuhnih) hnatlaknak tal a hau. Jury a zat hi ram khat le ram khat an i khat cio lo.

Rebecca thihnak i Civil Law in taza i cuainak ah hin, Adam sihni cu, International Law Firm Winston & Strawn LLP Lawyer Dan K. Webb a si. Adam upa Jonah cu, rum tuk kaw, an hlanmi hna Law Firm hi vawleicung i a lianngan bikmi lak ah aa telmi an si, an min dang hmanh ah “litigation powerhouse (tazacuai hmual tthawng ruunpi)” tiah an hun auhmi hna an si. Jonah na hei soisel lengmang, ningcang lo in a thang na chiat tiah Rebecca chungkhar sihni hmasa-u Anne Bremner pi hmanh kha Jonah chaw phalhmi lawyer phu nih cun, an hun thihphaih huar ko.

Cu lio ah Rebecca chungkhar tu cu, anmah nih an i chim bang khan, ‘rum ve lo’ le sihni hlannak chaw le va kawl le hawl a herhmi an si. Cucaah, 2018 March 1 ah khan Rebecca chuahpi unau Mary Zahau-Loehner nih Rebecca thihnak kong tehte kawltu dingmi mithiamsang hlannak dingah tlawmsuknak “Gofundme.com/rydrn-justice-for-rebecca” campaign’ a hun thok. Atu July thla in thla 4 chungah petu minung 128 nih $9,118 an pek cang hna. Minung 128 lakah Laimi min 8 ka hmuh hna. Tlawmsuknak hmuichon a zat cu, $50,000 a si. Pek na duh ve hna ahcun, hi link hi hei hmet >> https://www.gofundme.com/rydrn-justice-for-rebecca

GoFundMe cakuang i Mary Zahau nih a tialmi lak ah hun char ka duhmi a um. Civil Law in hi tazacuainak ah hin, mirumpa (Jonah) hlanmi Lawyer phu nih lam khat hnu lam khat in lam an kan kham, a ti. “Kannih cu, chawva rumnak kan ngei lo, asinain kanmahlei ah a ttangmi biatak le zumhngamnak kan ngei. SDSD (San Diego Sheriff Department – palik bu) nih Rebecca amah le mah aa that in an chimmi kha Rebecca nih a tuah khawh tak phun a si lonak tehte kawltu dingah mithiamsang hlan kan hau, Rebecca nih hliamhma a putmi kha thahnak hliamhma he ai dongkhangmi (consistent) a si…” a ti.

2018 April 4 cu, jury 12 nih an tazacuainak biakhiah ding a hung si. Vawleicung mi tam tuk le media nih an hun cuanh tthup hna. Harsa taktak in Rebecca chungkhar nih an i zuamnak vialte cu, hi ni ah hin, lungfah zual chinnak ah a cang kho cang. Dingthlu! Dingthlu! A tlau lan ne lai maw?

Jury 12 lakah 9 nih Adam Sacknai hi Rebecca thahnak ah mawhphortu a si, Rebecca chungkhar hi $ nuai 5 (sing 50) liamh hna seh; cu leng ah, Rebecca kha nung rih sehlaw, hringtu a nu le a unale hi $167,000 in bawmhnak tangka a pek khawh hna hnga caah hi zat zong hi liamh hna seh tiah phungbia an khiah. Jury biakhiah nih a hei kuaihmi cu, Rebecca hi amahte in aa that lo, SDSD palik thanhmi kha a dik lo, ti khi a si.

Jury nih bia an hun khiah hnu i biaceih inn chung ah Rebecca chungkhar sihni Greer nih a kamte ah a tthumi Mary Zahau a hun kuh, harsatnak le ngaihchiatnak tampi an ton hnu ah teinak an hmu. Lawmhnak mitthli zong a luan awk a si ko.

Jury nih bia an khiah hnu tlawmpal ah an sihni Greer nih biaceih inn hmai ah cun hitihin a chim, “(Hi tazacuainak i aa tinhmi hi) tangka (liam le pal duh ruang) kong a si lo. Adam Shacknai nih tangka a ngei lo. Palik nih hi biabuai (case) hi a thar in ong than hna seh ti duhnak a si zungzal. An rian (taktak) tuan hna seh tinak a si. Hi thil hi mahte in i thahnak a si lo,” tiah a ti.

Rebecca Zahau Thihnak Fak le Aa Thupmi Tehte Part 6

A Donghnak.

Atu Part 6 ah hin Rebecca thihnak kong ah a dong rih lomi dingthlu (justice) kawlnak le aa thupmi tehte kong ka run tial hna. A tanglei vandum muici khi hmet hna law ka rak tial ciami pawl na rel khawh hna lai.

A Dong Rih Lomi Dingthlu Kawlnak le Aa Thupmi Tehte. 2018 April 4 ah phungbia khiaktu phu Superior Court jury nih Rebecca thihnak mawhphortu cu, Adam Sacknai a si, Rebecca chungkhar hi $ nuai 5 liamh hna seh, a dangte in $ 167,000 liamhchap hna seh tiah bia an hun khiah.

Jury biakhiah hnu tlawmpal ah Rebecca Zahau chungkhar sihni Greer nih biaceih inn hmai i thawngla hmai ah a chim i, hi tazacuainak hi tangka in liam le pal duh ruang kong a si lo. Adam Sacknai nih tangka a ngei pek lo. Palik nih hi biabuai (case) hi a thar in ong hna seh ti kan i tinhmi tu a si zungzal, a ti.

Attorney Greer nih a timi cu, Adam Sacknai nih Rebecca Zahau hi a lu ah voi 4 thlermer a thongh caah lungfim lo le nikhua hngal lo in Rebecca a tlu. A tlaihhrem hnu ah, a kut le a ke a ttem hna, a hngawng ah hri a khimh hnu ah inn dot hnihnak innleng tlang in a thlak i, a tlai, a ti.

“Amahnu (Rebecca) nih amahpa (Max) a khamh, Amahpa (Adam?) nih teh amahnu cu a khamh kho ve maw?” ti catial zong kha Adam nih a tialmi a si tiah Attorney Greer nih a ti.

Tazacuaimi Adam nih biaceih inn ah a chim ve i, Rebecca thihnak ah zeihmanh ka tuah lo, a ti. Khua ka saknak Memphis in Coronado khua ah hleihlak in Max a thlak sual hnu ah ka rak tlawng hna, a ti.

Adam sihni Dan Webb nih, “Hi biabuai i jury phungbia khiah thintok (thinkhenh) nih hin khuaruahhar in a kan arter cikcek i, phungbia nawlleetnak (appeal) tuah kan i tim. Hi tazacuainak hi a tirte khan, thinlung reprailo (frivolous) le ralrinnak ngei lo in kalpimi a si, tazacuainak ah pompiak awk le kalpi awk tlak hrim a rak si lo,” tiah a ti.

Adam nih thawngla hmai ah jury biakhiah a hun den hna i, “Ka upa [Jonah Sacknai (nuai mirumpa)] nih a ka bawmh peng ko cang le pehzulh in a ka bawmh peng rih lai. Zakhat ah thongkhat in ka hnu in a ka dirkamh. Mitha deuhdeuh cungah thilchia deuhdeuh tampi a tlung cang, hi i a sullam cu, ka zeite hmanh a poi lo ti bia. Ka ttah bel a chuak nain dohleetnak (fight) le ngandamnak tampi bel ka ngei ko. Lungre a ka theihpimi chungkhar a um el pawl, hihi cu, zeihmanh poi ding a si lo,” tiah a ti.

Jury biakhiah hi San Diego Sheriff Department haotu Bill Gore caah ‘ningzak hmaisen’ thil a hung si. Zeicatiah Bill Gore nih Rebecca Zahau hi amahte in aa that tiah biabuai (case) a dihter ruangah.

2018 April 14 ah San Diego Sheriff Department (SDSD) nih cathanh a chuah i, hi tazacuainak i an chuahpimi tehte hi a thar pakhat hmanh a um lo nain, tehte hi a thar in kan kherhlai than lai tiah a hun ti.

Jury nih bia an khiah hnu a ni lila April 4 ah khan SDSD nih hin a rak chim i, Rebecca thihnak kong chekhlainak le tehte kawlnak kong ah hin, palik Medical Examiner Office an hmuhchuahning in kan rak thanhmi a si, an ti. April 14 i SDSD nih cathanh a hun chuahmi zongah cuticun an ti tthiamtthiam. Rebecca ruak a chekhlaitu kha Medical Examiner Office in Dr Lucas a si.

SDSD cathanh i an tialning ah cun, Rebecca Zahau chungkhar sihni Attorney C. Keith Greer he biaruahnak tthahnem, saupi chung kan ngei tiah a ti.

Palik bawi Bill Gore he an i ton hnu April 14 zan ah Attorney Greer nih, “Kan thinlung a cawlcang ngaingai. Sheriff (Bill) Gore he i ceihhmainak nganpi kan ngei. Amah hi a rian ah mithiam ngaingai (very professional) le midang va bawmhchanh a duh ngaingaimi (very accommodating) a si. Thildik tuah awk a duh ngaingaimi si dawh in a lang ko,” tiah a ti.

SDSD cathanh ah cun, “Fianghlang le thleidannak ngei lomi lungput in, hi biabuai hi, cu hlan ah a rak i tel bal lomi chekhlai a thiammi nih a thar in zohthan ding le kongkau thar chekhlai dingin kan hna a tla,” tiah an ti.

Hi thil a hung um hi jury biakhiah hnu le San Diego Country palik haotu thimnak (election) a hung um lai ah a hung chuakmi a si. San Diego County Sheriff (palik) haotu Bill Gore hi Sheriff Commander Dave Myers nih thimnak ah cun a hun zuamcawh. Dave Myers nih 2018 June 5 thimnak ah Bill Gore hi ka tei ahcun, Rebecca Zahau thihnak biabuai (case) hi a thar in ka on lai i, criminal chekhlainak le tehte kawlnak ka tuah lai, a hun ti.

June 5 thimnak cu, a hung um. Asinain Dave Myer (Democrat) nih Bill Gore (Republican) a tei lo; Bill Gore nih 54% – 45% in a tei. Gore nih kum 4 chung a rian a peh lai. Khi hnu khin thimnak a um than te lai.

SDSD nih Rebecca thihnak kong ah a thar in zohthannak kan tuah lai a timi kong he pehtlai in, May donghlei zarh ah khan Mary Zahau nih thlawmsuknak ‘gofundme’ cakuang ah a tial i, Sheriff Gore nih Rebecca thihnak biabuai file hi a thar in a zohthantu ding phu ‘team’ rian ka khinh cang hna tiah a thanh, a ti. Rian a khinhmi hna team ah hin, Captain McClain aa tel; anih hi chekhlainak kong ah hmuhtonmi le tuanbia a ngei lomi a si, a ti. Kannih chungkhar cu, zeihmanh thawng an kan thanhmi a um lo, a ti.

SDSD nih Rebecca Zahau thihnak biabuai a thar in an zohthannak hi a tlawm bik ni 90 a rau lai tiah an cathanh ah cun, aa tel. A phichuak an hmuhmi an thanh te lai.

Biatlangkawmnak

Part 1 in Part 6 tiang, ka ti khawh tawkte in, purhdah awk tete in biatlangkawm kaa zuam lai. Rebecca Zahau nih Jonah fapa Max, kum 6 kha a chungchuak fa bantuk in a dawt. An innchung hleihlak in Max a tlak kha Rebecca nih a tuah nakding a ruang virhkhoih awk a um lo.

Max kha sii-inn ah thihbawh in a um tikah Rebecca cungah a thin a hung bik ding cu, Jonah le Max nu Dina kha an si. Jonah cu, nuai mirumpa si kaw, Rebecca thah nakdingah tangka phalh in mithatthiam hlan aa harh ding a si lo. Rebecca a hung thih tikah tangka phalh in mithatthiam hlannak theory in Coronado khuapi kha a ri.

Hleihlak in Max a tlak a thaizing July 12 ah Jonah naupa Adam kha Coronado ah a upa a hung tlawng. Adam bia bang, Max a tlak ruangah a tlawnnak a si. July 13 celngel ah Rebecca kha thihfak in a thi. Jonah nih timh ciammamte in Rebecca thattu ding mithatthiam a hlanmi bawmtu dingah a naupa Adam hi hman a duh ruangah a si hnga maw ti hi Attorney Anne Bremner chim ttheumi bia vun purdah ka duhmi a si.

Rebecca Zahau hi hleihlak in Max a tlak ruangah lungrawk (depressed) manhnak caan a ngeih lo lengah amah le mah nun aa lak duhnak ding tlak dirhmun ah a um lo. Rebecca Zahau hi lungrawk in a ummanh lo ti a lang.

Zeicatiah amah ningkel in a kal ko; zan a ih tawn ah hin, a tak a thak tawn i, a angki aa phoih tawn tiah Mary Zahau nih chekhlaitu palik sinah a rak chim bal. July 12 zan ah a ihkhun i angki phoih in a ih tikah a thattu minung nih an hei fuh i, an velh hnu, an tlaihhrem hnu ah a kut le a ke an ttem i, hri in innleng tlang in an thlak ti hi mithat lainawng nih an diriamh phun in an tuah duh phun a si. Rebecca Zahau hi amahte in i thah duh sehlaw a thilpuan kher phoih hau lo in, hri kher in i awk herh lo in a fawimi lam i thim awk a um deuh. Hri awh in i thah hi nu nakin pa nih an hman deuh tiah ripawt fel a um.

Adam lawng hi Rebecca thattu a si theng lai lo, mithatthiam a dang he an si kho. Zeicatiah Dr Cyril nih a chim bang khan, mithattu nih an nehnang vialte an hloh bia a si lai, a ti. Adam hi mithatthiam le nehnang hlohthiam a si lem lai lo.

Mithattu keneh a um ko a titu Dr. Mauric Godwin nih a chim i, Rebecca thihnak hi raithawinak caah minung thah (ritual killing) he aa lo ngai tiah a ti.

Rebecca ruak a chekhlai hmasatu palik Dr Lucas i a thanhmi bia, Rebecca hi tlaihhremmi a si lo a timi kha Attorney Anne Bremner a lung a hrin caah, Rebecca hi tlaihhremmi a si kho i, a thar in chekhlai awk a si a ti bang khan, tehte hi Dr Lucas kut ah tampi aa hngat.

July 13 zing ah Dr Lucas hi Rebecca ruak chek dingah Jonah inn ah a va phan zau lomi kha a si, suimilam 12 leng a rauh hnu ceo ah a va phan khah. A diklomi ceihhmainak an ngeih ta bia a si lai tiah zapi nih an rak soiselmi pa kha a si. Dr Lucas nih Rebecca chekhlainak a tuahmi phichuak chirhchan in San Diego palik department nih Rebecca thihnak ripawt kha kan thanhmi a si tiah voi 2 tiang an thanh.

Palik nih DNA an hun tuah tikah Rebecca nehnang lawng a um tiah an thanh hmasa nain a hnu ah Rebecca chungkhar sihni phu nih an chekhlai tikah midang DNA zong a um ko an ti; khakha tehte thuhnawhmi a si ko hnga lo maw? Jonah inn ah thidor tehna le nu tawhrolh chungnawh hlonhmi tehna le tifim dildel thawl khat a ummi tehna kha palik nih DNA tuah aa tlakmi an si. Rebecca ihnak khan innka ah cafangpi in aa tialmi ca zong kha a tialtu ngaingai aho a si kha palik nih an hrilhfiah khawhmi a um lo. Palik nih Adam thintur le thatur an chekhlainak polygraph phichuak kha thanhmi a um lo. A sullam cu, tehte a si kho ding thuhmi a tam. Zei ko nih dah a kham hna hnga?

Jonah nih Rebecca thih thawng a theih tikah a khuaruah a har lo, Max hi Rebecca daithlan ruangah a thi ve ding a si ko le Rebecca a thih hi a phu ko, a poi lo ti khi a ruahnak a si hnga maw? Jonah khuakhannak in Rebecca hi thi hlah sehlaw Rebecca thihnak kong tehte kawlnak le chekhlainak ah biatak thla in a rumnak tangka tampi a hman sian hnga. Palik nih Rebecca hi amahte in aa that an timi bia kha Jonah nih fawite in a pom.

+++ Rebecca thihnak kong ka tialmi hi kum 2019 chungah ‘Falam Holh le Hakha Holh (Bilingual book)’ in cauk pakhatte ah chuah ding khuakhannak a um. Tling deuh in cauk caah tialchap le remhchap ding, a dih rih lomi bia a si caah kongthar a hung um ahcun, dawichap le telhchap ding a si.

Credit:Salai B.Chankhar

Leave a Reply

Your email address will not be published. Required fields are marked *