Zahan kalaymyo Thil Cangmi Cu A Mak Tak Tak.

Covid 19 zawtnak timi a min hrim tihtuk ruang ah cheukhat thinlung lei buainak a ngei mi tete an um pah. Tutan Kalaymyo i a cang mi thil zong hi tihnung le tuksum ngai ngai zong a si.

Sagaing ramthen Shwe Bo khuapi in Kalaymyo ah rian a ttuan mi, Kalaymyo Hotel ah a riak mi Mg Zaw timi pa cu an khua Shwe Bo i a hawikom, hmunkhat te ah a um tti tawn mi pa Covid 19 lunghrinh a si ruang ah Quarantine ah an chih. Cu caah Mg Zaw zong cu Shwe Bo in a naupa nih phone a rak chonh i na hawipa Covid-19 lunghrinh a si, cu caah nangmah zong tha tein rak i test ve, cun caan karlak cu Hotel zong ah um loin Quarantine rak i tuah ve tiah a rak chimh. Phone an i chonh dih bak in Mg Zaw cu a umnak Hotel in a chuak i Kalaymyo a nupi umnak inn lei ah kal ding in aa thawh.

Na hawipa Covid 19 lungrinh a si cang, nangmah zong lunghrinh ding na um caah Quarantine rak i tuah ve timi bia nih a thinlung buaiter ngai dawh a si. A hmai in Motor a rak ra mi cu namchan in a tlik hnawh i Motor tangah lut in rial ter aa timh. Motor Driver a khul a rang ngai i cu caah motor break cu a tlaih manh i Mg Zaw timi pa cu rial loin a him. A si nain Mg Zaw cu thinlung buai, mi molh phun in a cawlcang le cu caah tuanvo ngeitu pawl phone a chonh hna i an rak chuah hnawh colh ve. Tuanvo ngeitu pawl nih biatak tein an tlaih, a thinlung a dik lo a si ko an ti i harsa ngai ngai in Kalaymyo Sizung ah an kal pi.

Kalaymyo Sizung an phak pi hnu caan tlawmpal ah cun atha ko rua tiah an ruah i a mah tein Ihkhun ahcun an ih ter. Cu lio ahcun a tho, a kut an temnak pawl aa phoih, a pawng ah a um mi Cerep aa lak i a chuak colh. Cu a hmuh mi minung paoh tlaih in thah ding in a dawi hna, Cerep in a hmuh mi paoh cu sawh ding in a dawi hna. An tlaih, an buai pi nak ah Police pakhat zong a hliam ti asi. Cu hnu zong ah a dang minung pakhat cu Cerep in a hliam manh rih.

Cun Kalaymyo Sizung cun a zam, lampi ah a hmuh mi minung paoh cu Cerep in sawh ding in a dawi hna. Cu tlawmpal ah biatak tein an zuan hnawh cio i an tlaih khawh tthan. A tu hi a mah zong Kalaymyo Sizung ahcun an hren i an chiah rih.  Mipi nih an zumhnak ahcun Covid-19 ka ngei ve sual lai timi khua a ruah tuk nak ah a thinlung a kal sual a si ko ti a si, a tu hi Kalaymyo Sizung ahcun an chiah rih ko. Source : VOM