Chin National Day hmangter ding in Chin State Thantlang Township pin ah, State 8-ah Military Council nih hmalak asi,
February 20-2022 hi CND vawi 74-nak Chin National Day cu Chin State Thantlang Township pin ah State 8-ah tuah ding in Military Council nih ruahmannak an tauh, State pakhat ah Ks.2,000,000 (ting 20) tiang Budget an tuah piak lai tiin Military Council Minister U Kyaw Ngeing nih achim, State vialte ah hmanter kan duh, District-bik bantuk in nan hman zong ah Ks.2,000,000 sianh pia kasi lai, Thantlang Township cu chiatnak fakpi an ton caah t uhlan bantuk in an hman khawh beisei a um lo, Acoyah mi pawimawh hna zong nan sawm ka zumh tiah Military Council Minister U Kyaw Ngeing nih a chim fawn,
Chin National Day State 8-ah an hmannak ding kong ah hin Chin mipi venhimtu pawl nih cun, Military Council hna hruainak tang ah asi caah, mipi hna cu tel lo ding in an duh beisei asi ve fawn, Chin mipi venhimtu ifuntomnak bu (CDJC) biaphuantu nih cun mah Chin National Day hi Chin mipi hna caah Ni pawimawh bi kasi, atu dirhmun ah cun chiatnak le buainak karlak ah, Military Council nih hma an lak laic aah rem kan ti kho lo tiah an ti, Amah belte cu CJDC hna nih cun kan umnak hmun ceu ah hman khawh kan beisei tiin achim, Mindat Township mipi venhimtu hna zong nih Military Council nih Chin National Day an hruainak tang ah, mipi hna tel lo ding in nawlnak an tuah bak cang tiah theih asi, hramhram in tel an um ah cun miphun phatsan tu ah ruah asi lai pin ah hrem asi lai tiah, January thla ah khan cathanh an chuah cang fawn khi asi.
Military Council hna nih Chin State-chung ah in hrawh, sualnak ngei lo thah le tlaih, mipi nunnak tampi an lak piak, mi tampi in le lo mei an dawh piak, Biak in tiang hrawh mi an si, mah lio ah Chin National Day kan tuah lai tiah an timi hi cu, thilk al ning zong asi lo, ningzak ding tu asi, tiin Thantlang Township-ah in meikhangh tuartu pakhat nih atu bantuk in achim mi asi fawn,Chin National Day kan timi hi Chin mipi hna lungrual tein um khawhnak ding le kan ram nih Democracy Federal kal ning dirter than khawh ding ah hman tawn mi asi, atu dirhmun ah cun zeihmanh beisei ding a um rih lo hma kan lak cuahmah lio ah Military Council nih Chin National Day an buaipi mi hna hi cu zeihmanh um zia ngei lo le phuahchawmh mi asi, Chin ram Thantlang khuapi long si lo in hmun dang dang hna ah Chin mipi an thah, tlaih le thawngthlak hna lio ah atu bantuk in CND hman ding ah ati mi hi cu mi hrawkhrawl zia asi ko.
2021 October thla in Military Council hna nih Chin State chung anrak thuat cang kha asi, umnak In 2000 leng umnak Thantlang khuapi ah Biak in 8 le minung umnak in 900 leng mei khangh asi, Chin mipi hna caah Ni pawimawh bik, Chin National Day hi kum 1948, February 19 in 22 tiang ah khan Falam khuapi ah Meeting hmasa bik can ah khan Democracy kalning in hman ding ah dir asi, Kum 1951 October 9-ah Chin Affairs Minister Meeting an ngeih hmasa bik ah khan Chin National Conference ngeih nak ni 20 hi Chin National Day tiah fekter asi, kum fatin tein ropi ngai ngai in hman tawn mi asi, tu kum hi vawi 74 nak ding asi cang.