Hurricane Lak ah Zeitindah Kan i Ven Lai?

Thil chia le ttotho (Hurricane) a tong balmi kan um lai i, a tong bal lomi,ralrin zia a thiam lo mi zong kan um kho men. Cucaah hi kong hi a herh tiah ka ruah caah ka van langhter.

Hurricane nih cun thil tampi a phanhter khawh. Cu hna cu Tilian, Tli fakpi hran, Rili tilet le Tornado (vawlei le thli nih fakpi i a mertermi ) hna hi an tlung kho. Cucaah i ralrin ding a tam. Hi  kong hi ttih lo tein thil a phanh tak tak hlah ah ralrinnak he kan rak um cio a herh.

 

Hurricane a Phanh Hlan ah:-

Nithum chung nan chungkhar ei le din awk ttha tein na timhlamh lai i, ttha tein na chiah hna lai. Cun Radio, flashlight, batteries, first aid kit, Can opener, Toilet paper, Garbage bags tibantuk tiang in na chiah cia dih lai. A herhmi tling deuh i rel na duh ahcun hi kha website hin na chiah ding  herh vialte aa tial lai. https://www.ready.gov/

Ei le din awk thilri cu ttha tein plastic bag ah fawi zaang te i na ken khawh nak ding na tuak lai. Emergency management pawl nih inn chuahtak ding ti thawng a um tikah na ken khawh dingin na tuak tan lai.

Nang chungkhar nuam te i an in umter khawh ding thilri pawl na pawng ah na chiah khawh cun a ttha. Ihnak bag, blanket, cauk, board games tibantuk.

Na thlalangawng cu lenglei in  plywood he ttha tein na khenh lai. Tape men men i thlalang awng benh nih a kuainak ding khamh kho lai lo.

Na mawttaw  zong timhlamhnak tein na chiah cia lai.

Emergency i kal a hau sual ah emergency lam (Map) ttha tein na theih ta lai. Map pung na pawng ah na chiah lai. Nan inn chuahtak a herh sual ah kalnak ding hmunhma na tuak cia lai..

Na Refrigerator (kihternak) zong a kik khawh chung i kik in Hurricane na ton hlan in  setting na chiah lai. A kik bik nak setting ah khan full in na chiah lai. Mei a mih sual i na rawl hna saupi a khan khawhnak ding caah a si. A kik peng khawh nak ding caah a inn ka zong ttha tein na khar lai.

Na ti kholhnak (Bath Tubs) zong ah ti khat tein ralrin ah na chiah lai.

Na inn ka ttha tein na hrenh lai. Hurricane tik i, i vennak innka hrenh pawl zong kha na chiah hna lai.

Hurricane a Phanh tikah

Mei a mih sual ahcun phazawngdaing nakin flashlight na hman lai.

Hurricane a phanh tak tak tikah hmun himnak lei i tthial a herh sual lai maw, herh lai lo ti  ttha tein na hlathlai peng lai.

Thawngpang le nikhua kong ttha tein na ngaih lai.

Hurricane dih ah

Aa hliammi an um maw um lo, tha tein na zoh lai. An um cun first aid na pek hna lai asinain fak tuk i hliamhma a pu mi cu na hliam hma fak chin an tuar ding a si lo paoh ah cun na tong hna lai lo. Mi bawmtu na chonh hna lai.

An umkalnak ah thlichia nih a hrawhmi thilri thlalangawng kuai tibantuk lakah na ralring lai.

Ti tamnak lampi ah kal na hrial lai.

Leng ah na zaam i, nan inn ah lut tthan ding na si tikah. Nan inn ah zeidah um ti ttha tein na tuak hmasa lai. Electric mei le hri a cat sualmi/ gas rim nam mi tibantuk lakah na ralring lai. Hibantuk electric hri cat a um le gas rim a nam ah cun inn ah na lut lai lo.

Nan ei awk pawl tti nih a cintermi a um ahcun na hlonh dih lai.

Thlichia le ttotho hna hi minung nih kan khamh khawhmi a si lo. Asnain ralrinnak he kan um ahcun tampi a kan chanh lai.

Source : Mother Natural Network

Leave a Reply

Your email address will not be published. Required fields are marked *