Thi kai a ngei mi na si maw? Sii hau theng loin a zohkhenh ning a um!!!

Tulio vawleicung zawtnak ahcun thi kai hi a lar ngai mi asi i, a ngei mi zong an tlawm tilo. Thi kai a ngei mi nihcun lungretheihnak fakpi an ton tikah, an thi kai a zual tawn. Kan taksa ah a lang tuk theng lo nain kan i zohkhenh tthat lo ahcun duhsah tein kan taksa a kan chiatter tluahmah i, a donghnak ahcun thihnak tiang a kan phakter khotu zawtnak asi.Thi kai ngeih hi a ruang a phun phun in a um kho. Cu hna cu Kan thau tuk ruangah, ci te tampi kan ei ruangah, zu din ruangah, cun kan ngamdamnak nih a herhmi zatin kan cawlcangh lo ruangah an si kho. A ruang a dang tampi zong a um lai.

Ci te ahhin thi kai nih a huat tuk mi sodium a um i, cu nihcun thi kai a zual ter kho. Laimi cu kan meh kipah ci te peih lo cun rawl kan ei kho lo. Ci te kan peih zongah tlawmte lawng peih usih law, cun thi kai mi caah an tuahmi ci te lawng kan caawk ah a ttha cem. Thi kai a ngei cang mi hna caah cun kal (kidney) rawh a fawite i, kal lei a ttha tilo mi tampi an um. Ci te tampi kan ei ahcun kal rawhnak tiang a phan kho i cun zawtnak a phunphun zong ngeih khawh asi.

Zuding mi cheukhat nihcun zu nih thi kai a ttumter khawh tiin an ruah. An din lioah an lungthin a dam tiin an i ruah caah a si. A sinain zu nihcun thi kai a zual ter chinchin ti hi kan theih hrimhrim a herh.Kan thau tuk ahhin, kan taksa chungah thau a simi phunkhat (cholesterol) kan timi cu a khat tawn i, cu nihcun thi kai le lung (heart) lei tthatlohnak a chuapi kho. Cucaah Kan rihnaak kan i niam ter kha a biapi tuk, cun exercise kan laak chih a hau fawn cu nihcun thi kai a sang tuk lomi a ngei mi hna caah cun sii theng hau loin um khawh asi.

Thi kai hi mithiammi hna nih an chim ning ahcun 140/90mm (140 tangah 90) nakin a san ahcun khulrangin i zohkheng ding asi. Cun, Kum 60 cunglei ahcun 160 tangah 96 nakin a san ahcun i zohkhenh zok ding a si fawn. Kan blood pressure hi a si ning ahcun 120 tangah 80  asi ding asi i, hi nak hin tlawmte zong  a san ahcun chikhatteah thi kai zawtnak kan ngei kho i, buainak kan taksa nih a phun phun in a tong kho. Sihmanhsehlaw, khulrang in kan i zohkhenh colh asi ahcun sii hau theng loin kan uk khawh. Cun BP hi a mah ning pengin a um tawn lo caah, kan sining i theihnak dingah le i ralrinnak ding ahcun BP i check lengmang zong a hau.

Thi kai a ngei mi caah sii um hmanhsehlaw kan ei le din kan i ralrin a hau, cun kan tuah tawnmi kan ngandamnak caah a ttha lomi hna cu kan kaltak khawh a hau fawn. Thingthei lei ei hi a ttha i, sa lei ei tamlo ah a ttha cem, kan ei hmanhah nga sa le arsa hna sisehlaw cun exercise tuah zong kan taksa nih a herh ngai mi asi. Cu nihcun ngamdamnak a kan pek khawh. A sinain kan taksa nih a zawh lo tiangin luan tukin tuah bel a tthalo.

Cucaah thi kai a ngei mi paoh nihcun kan ngamdamnak ttha tein i zohkhenh hi biapi ah kan chiah hrimhrim a hau. Sii theng hau loin kan ei le din ah siseh, kan cawlcanghnak ah siseh, kan pum kha kan uk khawh ti hi i thei tthan hna usih. Sii tamtuk kan ei ahcun a tthalo lei, a dang zawtnak a chuahpi khawh caah kan ngamdamnak cu kan mah tein kan i ven peng a hau ti hi kan theih cio a herh.

Source: Health Solutions