Amen!, China ram ah Zumtu an karh ning hi na ruah leng si lai.

China (Christian Outlook) Open Doors director of Strategic Research Dr. Ron Boyd MacMillan nih a tuak ning ahcun China ram ah Communist cozah nih faaktuk in Pathian nung zumtu hna cu cihmih dingin biatak chuah in i zuam cuahmah hmanhseh law Zumtu hna cu biatak tein an karh chin lengmang ve i, kum 2030 ah khin cun Khrihfa hi million 300 an tlin te lai tiah a zumh.

Chinese Communist Party President Xi Jinping thithruainak tangah hin biatak tein Khrihfa hna cu cihmih tim in doh si hna hmanh seh Khrifa bu hna hi an tthawng chin lengmang i, kum chiar tein an than ning hi 7percent in 8percent hrawng in an karh peng. China ram ah hin kum 1980 khan biatak tein Zumtu hna hi an karh i, a bik in protestant Khrihfa hna cu an karh khun. Zumtu hna hi tha tein an i langh ngam lo ruangah hin zumtu zat hi dikthliar in theih a har deuh i, Mission bu dangdang hna an tuak ning hi ai khat set loh. A tlawmbik in China ram ah hin zumtu minung million 100 in 120 karlak hi cu an um lai tiah an zumh. China ram ah hin minung billion 1.4 hrawng an um lai tiah zumh a si i, zakhat ah zumtu hi 7.5percent in 9percent karlak hrawng cu an um lai tiah an zumh. Covid pulrai a len ruangah China ram nih harsatnak biatak tein an ton lio zongah khan zumtu hna thlanglamhnak hi cozah nih faaktuk in a kalpi nain zumtu hna hi an karh chin lengmang thiamthiam. Cozah nih zumtu hna an karh tuk ti a theih hin biatak tein hmalak nak zong a nei colh. Asi nain cozah hmalak nak nih hin zumtu hna cu daite in a um ter kho hlei hna lo hi, ni chiar tein Khrihfa ah a lut mi an um peng thiamthiam. China ram ah zumtu hna an karh chin lengmang khawhnak hnga thlacamnak in bawm cio hna usih.