Hibantuk Nga Na Tlaih Bak Ahcun Na Rum Colh Lai, A Man A Fak Taktak



Ting tampi tangka an tlaih bak ko! Maharashtra ram Palghar peng ah a ummi unau pahnih nih sur an vork nak ah ‘ghol’ nga timi cu an tlaih, hibantuk nga hi an chimningah sii caah a tha bakmi a si caah vawlei ram tampi in an duh taktak mi a si, India tangka in Rs 550000 bak in an zuar.

Unau pahnih Mahesh Meher le Bharat Meher cu Arabian rili ah kan hnu zarh ah khan an kal, ‘ghol fish’ timi nga cu an kalnak ah an tlaih, an tlaih lio ahcun cubantuk nga cu a man a tam taktak mi a si timi zong an thei lo, rili kam an phak tikah an nga tlaihmi cu mi tampi nih sii caah an kawlmi a si timi an theih tikah an i lawm taktak, minutes 20 hnu ah an cawk colh hna.

“Liamcia kum 20 in hibantuk in rili ah hin nga kan rak tlai bal cang, ‘ghol fish’ timi nga hi a min lawng in kan theihmi a si, sihmanhselaw, tuchunni ahcun khuaruahhar ngai in kan nih zong nih kan tlaih ve hi a si, man tam taktak in kan zuar caah kan i lawm bak” tiah an unau in tadinca sinah an chim.

An chimning ah hi unau pahnih hna hi an sifak ngaingai, tuchunni ahcun nga tlaihnak caah tilawng thar zong an ngeih khawh cang lai caah an i lawm taktak, hibantuk ‘ghol fish’ nga hi Singapore, Malaysia, le Indonesia ahcun mi tampi nih biatak te in an kawlmi a si, tichung nga vialte lak a man fak bik a si tiah an chim.

An chimning ah ‘ghol fish’ nga hi damdawi a phun phun sernak caah an hmanmi a si, cu caah mi tampi nih tlaih duh in an kawlmi a si, a tlaimi an um bak asi ahcun a zuar a fawite, a caw duhmi nih an tlaihnak hmunah an panh colh tawn hna tiah an chim.

Source: Mid-day



Be the first to comment

Leave a Reply

Your email address will not be published.


*