JESUH KAN HAWI THA BIK A SI timi Hla Tuanbia Sullam Tak Tak – Salai Kawltu

JESUH KAN HAWI THA BIK A SI timi Hla Tuanbia Sullam Tak Tak

Ttial Tu: James L Hlawnching

Story behind the song: ‘What a Friend we Have in Jesus’

“Hi pa te hi miding bak a si lai, Phaisa in Thing at tu caah rian pe ning law a ttha kho men” tiah  Lake Rice khuachung lampi i aa chawk mipa nih a chim. A pawng i a dirmi pakhat nih “Khi pa khi phaisa pekawk na neih caah….. amah cu na thing attu caah rian na pe kho lailo, phaisa pekawk a neilo mi misifak hna ca lawng ah thing a at tawnmi a si” tiah a leh.

Cu a kong an chimmi pa cu midang siloin Joseph Scriven,  Khrihfa biakinn Plymouth Brehren Church caah a a caan tampi hmang zungzal mi le JESUH KAN HAWI THA BIK A SI (What a friend we have in Jesus) timi hla a phuahtupa, misifak, hnipuan, ei le din awk a neilo mi hna bawmchantupa a si.

Ireland ram ah Joseph hi Kum 1819, September 10 ah a chuak, caan a kal thluahmah bantukin Joseph cu a tlangval thluahmah ve, cutikah a fel tak takmi le amah dawtu a simi nungak no te hi an i tong, nikhat cu a dawtmi he i um dingin timhlamhnak an ngei, cu timhlamhnak an ngeih cuahmah lio le an i umnak caah nikhat lawng aa duh ah vanchiatnak nih a den hna. I daw ngai i an len lio ah, an rang i citmi in tiva kainak hlei an  kal lio bak ah a dawtmi cu a tla sual i Tiva chung ah a tla i a nunnak a liam. Bawmh khawhmi neilo tein Joseph Scriven nih a dawtmi tiva a tlaknak cu a zoh tikah a lungrawk tuk hring hran.

A lungrawhnak vialte teiawk ah le a lungthin damnak caah tiin khualtlawn hram ai thok tthan. Kum 25 a siin Canada ram khua pakhat Port Hope a phan, cu khua a ummi hna nih Joseph cu an rak dawt tuk caah caan tam nawn um a tim, cu khua ummi singngakchia pawl cu inn ah a auh hna i ca a chimh tawn hna, cu khua ah cun nungak muidawh Elisa Roche he an i tong tthan, caan a rauhhlan ah dawtnak in ipehtlaihnak an ngei colh, ni le caan tampi a liam hnu ah i um dingin khua an khan , an i um hlan ah vanchiatnak nih Joseph Scriven cu a nanh  tthan, a dawt tukmi Elisa Roche cu Pneumonia zawtnak nih a nunnak a liamter.

Port Hope a rak um lio ah hin Joseph Scriven nih misifak, nuhmei le damlo tampi caah rian a ttuan piak tawn hna, hnipuan a neilo mi hna a thilneih a hrawmh hna, ei awk rawl a neilomi ei ding a pek hna, sihmanhselaw phaisa a hal bal hna lo, phaisa neilo mi lawng lawng a rak bawmh duh fawn hna, cutibantuk cun a caan a hmang tawn mi pa a si.

Nikhat cu fak ngaiin a zaw, cutikah a hawipa nih a va len, a ihnak pawngte ah biazai a ttialmi cu a hawipa nih a hmuh, hi hi aho ttial mi dah a si? tiah a hawipi nih a hal tikah, Joseph Scriven nih “Bawipa he kan ttial mi a si” tiah a leh. Hi a biazai ttialmi hi a nu kuat awk ah a tialmi a si, anu cu Ireland ah kum upa lei a panh cuahmah cang ti a thei tikah ka tuanbia vanchiatnak tampi a theih ruangah lungrawk tukin a um sual lai, a thlarau nun hnemhnak caah ti ruahnak he a ttialmi a si. Midang hmuh awk ah a ttial mi a si lo.

Kum 1886, August 10 ah ruahlopiin Joseph Scriven ruak cu Ontario tiva ah an hmuh, a mah philhlonak caah lungphun pahnih an phun piak, lungphun pakhat ah a hlaphuah mi JESUH KAN HAWI THA BIK A SI (What a friend we have in Jesus) hi an ttial.

A dam lio ah misifak bawmh a herh mi hna caah a caan a hman, sinain vanchiatnak nih a dawttuk mi le nunnak pahnih a lak hna, sihmanhselaw Pathian cu kan lungretheih caan ah a kan bawmtu le hnemtu a si ti fiangtein a theih ti hi hla a phuah mi nih hin a fianter. Thazaang laknak ah a hla hi rel tuah

JESUH KAN HAWI THA BIK A SI

  1. Kannih kan sual sifah ingtu, Kan hawi Jesuh a si lai, Pathian sinah kan duh vialte Hal ah cun a tha dah ngai, Hna-ngamnak tampi um loin, Fahnak ngaihchiatnak kan huah, Kan duh vialte Pathian sinah, Hal loin kan um caah.
  2. Fahnak le tukforh kan huah maw, Hna-hnawhnak in kan um dah? Kan lung belte rawk hin hlah seh, Pathian sinah thlacam u, Sifah huahnak kha an chanhtu, Hawi khuazei ah na hmu maw, Kan ngaih-chiatnak kha Jesuh hngal, Pathian sinah thlacam u.
  3. Zaang ngei lomi kan si cio maw, Kan thil kha a rit tuk dah? Asungmi kan Khamhtu Jesuh, A ngaih lai, kan hal tikah. Kan hawi nih an kan hlawt ahcun, Pathian Bawi sinah chim u, Akut in an lak an pom lai, Hna-ngamnak kan hmuh lai ta.

A hla hi video zong in ngaih khawh a si tanglei ah ka chiah lai.

Leave a Reply

Your email address will not be published. Required fields are marked *