Laimi Nih Kan Herh Taktakmi Hmanthlak Delete Sualmi Hmuh Than Ning!!

Na Phone Chung ah a um mi Hmanthlak Delete na tuah sual ah siseh a tlau sual a si ah cun Fawi tein lak than khawh a si , keimah pumpak in ka test dih hnu ah zeitindah kan lak than lai timi hmanthlak tete in cawnnak kan chiah piak hna .

Note : iOS ( iPhone/Pad ) ah Cun a tu ka langh ter mi hi hman khawh a si lai lo !

Hmasa bik ah Photo Recovery timi App Kan Phone ah khumh hmasa a herh , App cu a tanglei Link ah hin Download tuah piak hmasa

App Download Link : Download

App Download na tuah dih a si ah cun na Phone ah Install tuah piak law a tanglei bantuk tein tuah piak

App Install na tuah dih ah cun On piak

Scan timi na hmuh lai hmet

Scan na hmet bak in a cunglei ca box in an pek a si ah cun Allow timi hmet an pek lo ah cun poi lo

Chikhat hngah piak law Hmanthlak na delete na tuah lio caan he Delete na tuah mi Hmanthlak pawl a langh dih lai

1 : Menu hmet 2 Select All timi hmet than

A Cunglei Button hmet piak than

OK timi hmet piak ding

Hmanthlak Delete na tuah mi poah fawi tein na lak khawh cang

File Manager ah Photo Recovery timi Folder ah zoh khawh a si , si lo le na Phone Gallery zong ah zoh khawh a si

Credit: Chinitfree.com

++++++++++++++++++++++++++++++++++++++++

Hi capar hi relchap

Tlerlung

Chinku pa cu zan ah a mitkuh a cim lonak a sau cang.

Zan ah Chinku nu he chungkhar khuasak tintuknak caah khurkhua cu an tuak len nain zei pipa an chuahchanh kho lo.

A cal ai domh. Milai pasal, a lung a caw, a thluak a baa. A khuaruah a pit-chong.

Chinku pa cu miding fel mi nunnem a si pinah khuami nih an ibochan ngai i dawtu zong tampi a rak ngei. Chawhleh chawhawl in a paw a cawmmi an si. Fa pathum a ngeih hna― upa bik ah Ṭial Chin a si caah Chinku nu le pa tiin an auhnak hna zong cu a si. Chawhleh in khual a tlawn kip i a hlawh a tlin tawn caah inn le lo zong hi an i zalh khawh―an nung kho ngai. Mi nih an zumh fawn i ho sin paoahah phaisa a duhzat in a cawi khawh.

Voikhat cu khual an tlawng i an lam a tluang ngai. Voi dang nakin an hlawh tling deuh. Tha nuam ngai in phaisa kuatu (hluaitu) sin in a phaisa vialte cu a kuatter hna. India khualtlawng pawl nihcun an phaisa anmah teih an iphurh tawn lo. Nguaihluai an timi phaisa kuatpiaktu sinah i phaisa thlen reet hmasa hna. An duhning reet a si ahcun Kawlram lei ah kuatter a si tawn.

Chinku pa cu India in Kawlram lei tlun an von ithawh cu anih lawng a chuak ko. A hani a khumh kho set ti lo. A chungle caah herhbau a cawkmi tete he thanuam takin an hung pok. Inn phanh lai zong aa ngeih. An hlawh a tlin caah a si. Ṭio cho kai hmanhah baat timi hrim a thei kho lo.

Ṭio cho zong an von lanhtak dih cang. Tlawmpal an von kal ah, khualei in a rami a hawile mitlung kal he an itong hna. Idinh pah in thawn kan ichim, kan ihal hna lai an ti.
Chinku pa nihcun Mizoram lei thawngpang ṭhatnak kong lungtho ngai in a chimh hna. “Leiba cawh zong tutan cu an har lo,” a ti.

Khualei in a rami an hawile belte cu an mithmai a panh ruam lo. A chim lai aa harhmi ko an lo. Chinku pa nih an mithmai a zoh in a lung a fiang. Kan theihte ṭhiam ding cu kan chim ko u, a ti hna. Parku pa nih, “Vei.. vei dawh…” a von ti i, “Ehhem!” tiah a hrom a von ithianh ta.

“Phaisa nan rak kuatnak hna kha mi nih an hlen hna i nan phaisa vialte nan chungle sin a phan kho lo,” a von ti khin, “Ehhrem!” tiah a hrom a von ṭhianh ṭhan i, “Zeiti tal in hmuh ṭhan khawh a si ko lai fawh, Chinku nu zong nih hmuh lai cu an zenh ko,” tiah Chinku pa lei hoih in khualei thawng cu lung ṭhalo ngai in a von chimh hna.

Chinku pa nih inn phanh lai aa rak ingeih tukmi cu a zenh in a zenh cang. Nain, aa von ihrim. “Pasal, thihlohnak thawng a si lo, phaisa cu kan kawl ṭhan khawh ko lai” tiah amah le amah thazaang aa pe.

Laitlang ah cun thawngpang vah cu ṭhawng tuk kaw, Chinku te inn cu “ka phaisa hi kan hmanpiak ve” tiah thluachuah he a rak fuhmi an um ti lo. Zing a hung chuak leiba cawhtu. Zan a phan, leiba cawhtu. Awklokchong in cawhtu lawngte nih an fuh hnawh cang hna. Zingzan leiba cawh an dai ti lo.

An ngeihchiah acheu an zuar, a daih lo. An thilri an zuar, a tlinh ti hna lo. Chinku pa cu awlok chong vansang au in a um. “Lei ka zoh ah a pit, Van ka zoh ah a dong” an timi bia khi Chinku pa caah cun aa tlak bik ko cang.

Chawlehnak in cawlcangh awk a ṭhat ti lo tikah, Chinku pa nihcun leiba chamnak ah ti in a ngeihchiah a zuar. Zeimaw zat a cham hna i a taangmi in Malaysia lei ah aa thawh ve.

Chinku pa cu Malaysia ah cun hawi cio bang rianṭuannak hmun ah aa thawh ve. Upatlei sang ramdang phan kan ti cu holh nih a thiam ai harh. Rian nih thiam lo, a caah cun a fawi bak lo. A hawile hi a zul hna i anmah Malay nih kong-si-kong an timi fial chukcho rian te cu nitin din loin a ṭuan ve tawn. A rian cu a har hringhran. A caan ah Tuluk supervisor mino tete nih kan pa le ṭhi ti hmanh ruat loin hngal ngai an van raak tawn. Sal rianṭuan ko khi an lawh caan zong a tampi.

Malaysia phanmi Laimi cheukhat cu nupi fale mithmuh lo tham ah tiin pumsa duhnak, sual duhcuai in ai hlothlaumi zong an um ve. Chun ah thi deng rian an ṭuan. Zan ah zu an ding, phe an ikah, nungak an chawn hna. Zaan ah cunt la belbul inuam emem in a ummi an tlawm lo. Hmuhmi phaisa cuti cun nuamhneihnak ah a deng lanmi zong rel cawk lo.

An phaisa dih poah ah an rianṭuanak boss sinah, “Boss, saya mahu pinjam satu ratus,” an hei ti. A sullam cu, ‘ka pu phaisa RM 100 cawi ka duh’ tinak a si. An pu le cu a caan ah cun an ing puang tawn. Tuluk boss te zong cu khurkhua an ruat kho i ei awk kan ngei lo an ti paoh ah cun an pek peng hna. Asinain zudinnak le phekahnak tbk ah cun an hman ṭheu ṭhiam.

Chinku pa tu cu nikhat a nihlawh RM 45 te a si ko nain a thlahlawh te ai khon i chungkhar caah tiin tinsih tein khua a sa. A hawile nih nihsawh capo nawn in, “Nang cu na ṭuan tuk nain nai sum tuk i na thi phah te lai. Ruah loin a molh hna na molh sual lai ti kan phang” an ti tawn. Nain, Chinku pa cu a dirhmun a fek. Hawi zu an din, sa an ei lio zongah a darling Nu Cuai i a kal lai te i an ngeihchun Bible cauk te a kau i a rel zungzal. Zarhpi Ni caan paoh ah pumhnak a tuahpi hna. Cuti cun midang kutrit zong aa zuam.

Mi ramdang ah harsa in rian a ṭuan tikah a thaisung le a fale hi a ngai tuk tawn hna. A umnak cu Putra Jaya ah a si. Anih cu Kuala Lumpur ah a kai kho tuk tawn lo. KL an kai ah cun thinphang thlalau in an um zungzal. Cucaah KL lei ah a kal tuk lo. Rian an ṭuan lai ah a phaisa hi buk kam ah vawlei a cawh i a phum. Cu hnu ah rian hmun ah a kal ṭheu. An tak cungah phaisa an chia ngam lo. Phaisa kuat a duh ahcun KL in agent pakhat a rak ra i mah ti cun a kuatpiak tawn hna.

Voikhat cu lung nuam lo, lileng bantuk in a um. Rianṭuan ding zong thatho lo ngai khin a um. Zingka tein an chuncaw cu a fun i rian hmun lei ah cun aa thawh. A kal pah ah, a zanmang i Chinku le a fapa hniang James nih “ka pa rak tlung cang, kan in ngai tuk” an ti lio a hnathlam ah a hung thang. A mang ah Nu Cuai zong fiang tukin a hmuh i a hawile cu Chinku pa nih chawn huaha loin a lanhtak hna. A chungle kong cu a ruat. A lung a maw pahmi a lo. A mithmai a panh ruam lo.

Cuti cun rianṭuan hram cu an van ot, chuncaw ei ah acheu an ṭum. An rianṭuannak seh zong an von dinhter cang. Cu tlawmpal ah a langhlat nawn khin mi an tlikleek lio khi an hei hmuh hna. Cun, raldo lai bang uniform thuam tling he operasi lut dingin mawṭawka lianlian cu an van izul duahmah ko.

“Elaw, khah!” tiah mah him khawhnak ah tlikzaam cio a si. Acheu ram tanglei ah, acheu ceiling cungah. Lungfim huaha loin an zaam, operasi he cun an idumdawi len hna. An rawl einak kanṭiin cu Rela, Police, Immigration an khat tirh-terh. An tlaihmi hna zong cu Lori ah an van ben hna I an tam kho taktak. Cu lio ah cun Than Hmung t pawl, cun adang Laimi Kio Cin tepawl zong cu kosong timi zeihmanh ai tlaih lomi cu si hna kaw, phirphahlik loin an zaam cio. Nain, an zaamnak ding lei kha rak ingiat cia hna kaw, an rak bawh cia hna i an tlaih khawh dih hna. An zapi tein thonginn ah khumh an si.

Thong cu thla kua an tlak hnu ah Thailand ramri ah hlonh ding an si. Chinku pa cu amah ve lo bang, ni khat hnu nikhat a titsa ṭumchuk lei a panh zuahmah. Ka innchungkhar zeitin hme an um lai, aho hme a zohkhenh hna lai ti a ruah ah a thawchuah ai chol. Cu lawng loin Thailand ramri kuat lai ko hi a caah ṭihnung khun. A zanmang i a nupi le fa a hmuh lio i chawn huaha loin a rak kaltak hna, mi bupi he an kal lio caan kha atu cu a hung tling taktak cang. A nun nih a tuar kho lo. Khatlei ah ratnak lei le rai hmanh cham khawh hlanah thongtlak a van si tikah a leiba a karh nih a van dawi rih hgna ding a van ruat. “Aw Pathian, a ziah hme, na fapa hi na ka daw lo maw? Na ngaih kan chiattermi cungah ka ngaithiam law, ka pa hi harnak chungin ka chuah hram ko sawh. Ka innchungkhar caah rian ngan bik ka ngeih zong na ka theih i kan auhnak aw hi ka theihpiak hram ko” tiah thlaza a cam.

Kum caan cu an hung liam riangmang i an thongtlak caan zong a hung dih pah zuahmah. Thong an chuah lai ah Malaysia dantatnak lakah a fak bik pakhat ah ai tel vemi fung tuk dantatnak voi hnih cio an inter hna. Thih tiang a lo kho ti lomi chinchiahnak dantat a si. Lenggeng Camp ah an chiah hna i caan tlawmpal ah Thailand ramri ah an kuat colh hna. Thailand Agent sinah Malaysia Immigration nih minung pakhat RM 1,000 in a zuar hna. Cun, cu Agent nihcun KL kir ṭhannak dingah RM 2,200 an lak ve hna.

Thailand Agent hi mi tluangtlam le miṭha an um lo ti awk an si. Rul buar hrang bangin an mit au hmanh hi zoh ah cuar a cuk. An bia hi a bo tuk i an kut hi a zaang tuk fawn. Hi ti van zoh ah cakei rawlṭam miseh lai bang in ṭih an nung. Cu hna pawl mi hro ko nih hna chungah a khaa, tuk a sum. An biatlaih pakhat ah “nan duh ahcun zam ko uh, a ngah tuk! Meithal kuan pakhat lawng nih an dawi hna lai” ti si ko. Chinku pa te an phak hlan deuh vakah Rakhine Kala pa a zam i Agent nih meithal zun nga in an kah i rili chungah an rak thlak. Mi thah hi annih caah cun Ui-ar thah tluk men ko khi a lo. Cozah zong nih tlaih dingin an dawi lengmang mi cu an si fawn i cu hna sin va phak cu thihnak thlankam dir khi a si ko cang. Chungkhat sahlawh rualchan a ngeimi hna cu KL lei an hei chonh hna i phaisa an kuat hna hnu ah dam tein an hung phan. Chinku pa le Ceu Luai hi aho chungkhat rep an ngei lo i awlok chong, chungril sivang in an um.

An caah ruahchannak a dong. Kainak phaisa ngei lomi cu rili ngatlai sinah zuar lawng kha a tang ko cang. An mitheih cu an chonh lengmang hna nain a tlamtling kho bal ti lo. Agent an thin a phawh hna i pistol in an cumh hna, an chuih, an bengh hna nain phaisa cu a chuak kho ti lo. Mi an ṭhen hna i mah ah cun Chinku pa nih a hawikom ṭha bik Kam Lian kha mithmai panh lo ngai in a hei auh i, “Kawi Kam, kei cu mah hi ka si ko cang i ka sining tu hi ṭha tein Nu Cuai te kha rak chim te hna mu. Cun mah hi cakuat te hi pel lo tein na rak pek te hna lai,” a ti. Mah hnu cun, Chinku pa cu Ceu Luai he khoika an um ti thei ti loin an thawng a dai.

Laimi Agent nih an kawl len hna nain an hmu kho ti hna lo. Kawl Agent zong nih an hmu kho ti hna lo. Laitlang a chungkhat rual cu mithli rualriat he Chinku pa te thawngpang cu nitin an hngak zungzal. Kum khat a hung tling. Ruah loin Ceu Luai cu Thailand ramri in a hungkai i thawngpang cu a von chim.

An tuanbia cu hitin a si:

Thai Agent nih an rak kalpi hna in khan, rili ngatlai sinah an zuar hna. Zan fatin nga cu an tlai i a caan ah cun Kawlram lei nga tehna kha a thli in an tlaihpi tawn hna. Zing khat cu Chinku pa zingka tein a tho i a mitthli a tla. Ka si khawh tawk in ka hnemh nain san a tlai lo. A lung a leng i Nu Cuai te nufa ka ngai tuk hna a ti. A dirhmun hi a ka chimh ah ka zaang a fak tuk ve. “Mah cu zingka cun kan umnak an kan ṭhen i Chinku pa le hi kaa dang ah an kal. Zan muilak ngatlaih cu khua an hmu kho lo. Zan nga an tlaih cuahmah lio ah ngatlai tilawng pakhat nih an tilawng cu a pah. An zate minung 20 an si i 15 an tlau, 5 an luat. A tlaumi chungah Biak Chin pa cu ai tel ve e,” tiah a chim.

Chinku te chung caah vawlei hi a mui cikcek. Chimpit vansang au in an um.
Aw! Chungkhar nun khuasak ruah ah fawh, tluang kip kan cul i nu le va, pa le fa, u le nau ai daw cukmak mithmuh loin thih ṭian kan ṭian tawn mu. Maw kan nun hi Chinmi pasal ṭha lu zeizat ko hme chan ṭim hlanah liam cang hna mu. Lairam lei dai i lu phum cu an duh tuk ve ko lai dahkaw… Ho hnemtu ngei lo ramsa bangin kan nun a pamhmai tuk e. A poi tuk hringhran e.

Chinku pa donghnak Cakuat

Ka dawtmi Nu Cuai le Chinku te unau, dam in nan um lio a si maw? Ka caah nan lungre theih tuk ding hi ka duh hrim lo. Pathian sin tu ah thla kan camṭi hna lai. Kannih cu Amah ta kan si ko i kan nunnak zong Amah sinah a um ko. Ka dawt bik mi Nu Cuai, ka fale tah an dam tling maw? Nai hrawng cu ka mang ah kan hmuh lengmang hna. James kha teh holh hna a thiam ngai cang lai cu ti. ‘Papa’ tiah a ka hlam tawn ve hnga maw? A ka hmu bal lo i a ruah awk a ka thei lai lo dah. A laipa te zong kha ka ngai tuk ve e. Phone kan ichawnh zongah a um bal lo na ti lengmang i a awka te hrim theih ka duh tuk cang. Nu Cuai ka dawt, na pasal hi san ka tlai lo tuk e. Lungre theih kan pekmi le chungkhar rian na liang cung i kan khinhmi cungah ka ruat thiam ko mu. Kei cu mah hi ka sining hi minung sinak in cun ruahchannak a dong ko cang. Asinain mu, Chinku nu, na fale te kha ṭha tein rak khur omh ko hna mu. Chinku zong kha ca fak piin rak izuam ko seh mu. Nai i kan kuatmi kha zeidang leiba cham rih loin an sianginn kainak ah rak hmang te ko. Na fale nunnak cu nangmah kut cungah chanh na si cang. Fimnak lei i lam na hmuhsak hna lo ahcun a nu le pa kehneh an zul lai. A nu le pa keneh zulh ding cu keimah lawng si lo nangmah zong nih na duh ve lai lo.

Ka fale hngakṭah lai ka ruah ahcun ka nun nih a celh hrim lo e. Ka dawt Chinku nu, hmunkhat te innchungkhar kan lenṭi lio kha ka van hlam tuk e. Tuzan ahhin kan hlam khun hna. Kei cu dam in ka kir lai ka zum lo. Asinain kan cung ramnuam ah chung tling tein kan lengṭi te hna lai. Ka nu le pa zong siseh, nangmah zong siseh, hi ca nan hmuh in nan ngaih maw rak chia lai ucih. Dam te um ah cun ka rak chuak ṭhan te ko lai. Khah! Nu Cuai, ca tampi ṭial caan zong ka nei ti lo. Mah vial in. Nan zapi te mangṭha uh mu.

Chinku pa
Thailand.

Note: Mah hi tuanbia te hi Malaysia Chinmi kan tuanbia van langhternak pakhat a si ve. Cun hringtu pa le nih chungkhar caah heh tiah an kawlhawl i a donghnak ah anmah nunnak tiangin a liammi kan pale upat pek philh lonak caah ka ṭialmi lenhloi a si. A relmi ka hawile nan zapi te cungah kai lawm.

Source: <a href=”https://riahbuk.net/tlerlung-lenhloi-dollar-mitthli/”>Riabuk.net</a>

Leave a Reply

Your email address will not be published. Required fields are marked *