Lungrawk Bak Si: Nihin Mino Kan Nun i Remh Kan Herh, Ningzah Thei Lomi Kan Tam Chin

Tuchan, tuni, atu mino kan dirhmun a hman ti lo. Kan duhmi poh kan tuah, kan uarmi poh kan i cawk. Kan duh a fak, thil ngeih dih kan duh. Kanmah nih a tha timi lengin thildang tuah kan i tim ti lo. Cu lakah duhmi nungak tlangval kan ngei hoi.

Saram nih cun chiatha thleidannak nun an ngeih caah duh poh an nun zong ah a si awk si ko. Nain minung nih cun chiatha thleidan khawhnak kan ngei nain cu chia tha thleidannak cu nihin mino nih kan thlau cang. A tha lo kan theih ko mi zong kan tuah chih. Ningzah nun kan ngei ti lo.

Khuazeimaw Korea nun ka cawng ti phun in, nu nih paw le pang lang in thil kan i hruk. Kan hnuk langh pah buin kan i pum. Ka hnuk minih an hmuh sual lai lo ti bang, hnarcheu cu kan langhter ciamciam. Hlaan lio lainu nih an thuhmi cu tuchan nu nih zei ah kan rel lo.

Kan nun ah ningzah timi a um a tlau. Nu le pa bia zong kan ngai duh ti lo. Kanmah ko a fim bik ah kan i ruah. Mah nih zeitindah ka kawl lai ti tu si loin nupa hmuh cia kan ei . Kan thil duhmi le man fak lawngte. Nikhat ah voikhat thil kan i thleng. Rawl voi thum kan ei rih.

A chunnitlak online kan thu, heh tiah mi kan chawnh hna. Kan duhmi he leng kan chuak. Kan duhmi poh kan tuah. Sertu Pathian kan tih ti lo. Nuamhnak phunphun kan tuah cang. Mi hmai khah lo zong kan hmang ti lo.

Tha te aa thi-um ding mino kan tlawm chin. A thiang thit-umnak timi catar piak ding kan um ti lo. Pastor te zong laklawh in kan tuah hna. A phung te cun a thiang thitumnak kan ti. A tak ah thla 2-5 fa pawimi kan tam.

Zeitindah thluachuah kan hmuh khawh lai, zeitindah kan fale mi an lawh khawh lai. Kan nunzia a rawh tuk cang tung. Video thur kan zoh. Kan duhmi hna he kan zeizong kan i piah dih.

Ruah ah lung a faak ko. Minung a tling kan um lo, nain hi ti ning te kan kal ko si cun laimi misual kan karh chin lai. Ngaktah an tam chin lai, lakfa hrin a karh lai, fahrawh le thah a kar lai. Thluachuah kan nganh chin ko lai.

Note: hohmanh pumpak ti hnawhmi ka ngei lo, kan nun i remhnak ca si hram seh.

Leave a Reply

Your email address will not be published. Required fields are marked *