NU PAW CHUNG I BAWHTE A SERNAK KONG – Salai Kawltu

NU PAW CHUNG I BAWHTE A SERNAK KONG

Tialtu James Cung

Minung kan taksa cawlcanghning vialte uk tu cu cell a si, cells chungah tthatein rian a ttuannak caah DNA(Cells rian ttuantertu) a um. DNA zong cu rian a ttuannak caah a chungah Gene tampi a um tthan. Hi hna hi an hme tuk hring hran, theihfian zong an har, anttam ci chungah khin cells tam tak tak an i tlum, cutibantuk cells hmete cu tahchunnak ah nangmah tia si selaw, DNA cu na kutpi hmanh a tiat lai lo. DNA chung i a umi Gene cu a hmet tuk ruangah tahchunawk a hartuk cang. Na sam pakhatte hmanh a tiat ti lai lo, cubantuk khuaruahhar kong cu fiangte theihawk ah an dothlat cuahmah lio asi.

Zeibantuk miphun dah kan si? Zei bantuk miphun hrinsor dah kan si? ti vialte theih nghalhnak caah le minung kan i dothlat ning ah biapi cem i chiahmi cu DNA (Deoxyribonucleic Acid) hi a si. Cu kan DNA chungah cun genome phun phun a um tthan, cu genome pawl cu mathematics biahalnak ah formula tampi in an fianter bantukin le computer Engineer pawl nih computer ttha tein rian a ttuan khawhnak hnga program an sersiam bantukin rem thlipthlap tein kan DNA chungah an i remh dih.

Formula theih dih ahcun Mathematics cu fawite a si, zeicaah tiah Formula nih a sersiammi a si ruangah a si, cubantuk cun minung i sersiamnak hramthoknak caah biapi a simi DNA zong thei fiang dingin Gene pawl theih thiam a hau, a ruang cu DNA sersiamtu le rian a ttuantertu an si caah a si.

Tuchunni tiang Scientist pawl nih Genome pawl kan DNA chung i an isersiam ning an dothlat cuahmah, sihmanhselaw fiang tein an thei kholo, vawlei fimthiamnak hi ka ruah tikah khuaruah har awk tampi thil a rak um.

Thlapa, Mars tiangin minung an kal kho dih cang, hriamnam phun phun vawlei hrawk kho dih cikcektu cu ram tampi nih ann neih cang. Science lei zong an thiam cang ning cu Arfi tampi sining tiang an hlathlai khawh dih, minung lu tiangin thlen an i tim cang. Technology lei ah pumpak pakhat lawng in chantiluan theihthiamnak caah dawi a ngah tilo, a phun phun in vawlei a tthang tuk hring hran.

A donghnak bikah ka ruah tawnmi cu Pathian sermi kan pumsa chung i thil hmete a simi DNA chungah Gene a phun phun an insersiam ning fiang tein hi tluk chantiluan ah an thei fiang kho lo va si kaw, zeitlukin dah Pathian sermi thil hna hi an lianngan ti ka ruah theo tawn.

Tulio ah UK scientist pawl nih zeitindah Genome pawl cu DNA ah an umtuning a si an dothlat tikah tampi an theih khawh cang. Hi Genome umning an theih ahcun minung hi zeitindah nu paw chungah a hramthoknak cem ah kan rak umning a si hnga? timi tampi an theih khawh cang lai. Minung hringtu kan nu pumsa chung i kan insernak hramthok(human embryos) an theih asi ah cun tampi in minung sining tak tak an theih khawh lai. Aruang cu a hramthoknak sining te i a tthang thluahmahmi kan si ruang ah asi.

UK khua le ram i a ummi Francis Crick Institute in researchers pawl nih an chim ningah  minung hringtu nu pawchung ah kan sem lio(embryos) theihnak caah thil biapi ngaimi cu hi embryos sertu DNA chung i a ummi Gene pawl an umtuning le an i sersiamning theih a si, (embryo cu DNA pawl nih an ser, cu DNA cu gene pawl nih an sersiammi a si ve tthan), cu genome pawl an sining dothlatnak cu CRISPR/Cas9 tiah an ti, cu thil hna hmang cun  gene i sernak caah biapi ngaimi protein phunkhat OCT4 hna sining an hlathlai lai. Cuthil an dothlat khawh a si ah cun zeitindah hringtu nu paw chung i ummi nauin ah minung ser hram kan i thokning asi ti a fiang lai.

Minung ti(va nih ti an neih bantukin minung zong nih kan neih ve, cu cu nu pawchung ah a ummi egg cell an timi hi a si) cu keuh hram aa thok bak in nisarih le tlawmpal tiang cells 200 vel chumin pumpululh bantukin an i hlawm dih, cu thil a hlawmmi cu “Blastocyst” tiah an ti, “minung i sersiamnak caah gene pawl kan dothlattik ah khuaruahhar ngai ngai asi, thil sining fiangte hngalhnak caah rian kan ttuan thluahmah” tiah Francis Crick Institute i a ttuanmi Norah Fogarty nih a chim.

“Gene pawl cawlcanghning fiang tein kan theih ahcun zeitindah bawhte a ser ti theih a si lai, cunih cun nau neihnak caah biapi ngaimi IVF treatment zong ah tampi a tthanter lai {IVF treatment cu nupa hna nih nau an neih khawhlo tikah pa ci(sperm) le nu ci(egg cells) cu an lak i, nudang nauinn ah an keuhter, siloah pa ci(sperm) cu an lak chuah i, nu nauinn ah an chiah, a fawi nakin cuti cun bawhte a ser}, hi thil hi fiang tein nghalh a siah cun zeicaahdah nu tampi nih fa an pawi khawh lonak a ruang kan theih cang lai” tiah hi kong mithiam Niakan nih a chim, hibantuk dothlattu pawl nih kum tamtukte an hlathlai peng, fiang tein an tuah khawh caan a phan theo lai ti keima pumpakin zumhnak tampi ka ngei.

Hi thil hi duh paoh in tuah(experiment) a ngah lo caah tibantuk lei nawlngeitu Human Fertilisation and Embryology Authority(HFEA) hna sinah Licence lak dih a hau, ni nikhat cu minung fimthiamnak a sang ruangmang mi nih a phichuak tthamite a kan hmuh ter theo lai ti zumhnak tampi a um.

Leave a Reply

Your email address will not be published. Required fields are marked *