Nuclear hriamnam in vawlei hrawhnak vialte khamtu – Salai Kawltu

Nuclear hriamnam in vawlei hrawhnak vialte khamtu

 

North Korea le USA heh tiah Nuclear hriamnam in tlerhkhawnnak an ngeih tik ah vawlei ah Nuclear Armageddon a um sual lai tiah ruahawk a tam ngai, Vawlei ram tam tak tak nih Nuclear hriamnam an ngeih thluah mah cang, ram pakhat uktu bawi thinhung ruang ah caan a dong ruangmang kho cang, hnangam tein um caan a si ti hnga maw ti ruahawk zong a tam ngai, kan Bible bia phuan zong a cheunak tam a cang thluahmah fawn, zeikhawm siselaw, zeizong vialte sertu kut ah kan sining vialte ap usilaw hna angam khun ko rua…

Liam cia kum 30 ah khan Cold War(USA le Russia fimthiamnak raltuknak) a rak um bal cang, cutik ah fimthiamnak in i tuknak nih cun a parpahlek a phan deng, cutibantuk caan lio ah vawlei hrawk dih khotu Nuclear hriamnak in a khamtu minung pakhat a um, amah ruang ah vawlei ah tuchun ni tiang he ka cattial na rel khawhnak aruang hi a si.

Nuclear hriamnam in vawlei khamtupa cu Soviet (Russia) Lieutenant Colonel, Stanislav Petrove a si, kum 77 a siah vawleiin a nunnak a liam.

Amah cu na theihnghalh bal mi a silo kho men, sihmanhselaw hi pa a rak dam lio ah a kut tlai ding in Hollywood minthangmi hna Kevin Costner, Robert De Niro, le Matt Damon pawl an rak in tlar cang, kan nih zong nih hi pa sin ah lawmhnak bia chim ding tampi kan ngei, zeicaah kan tiah cun kan nunnak hi Pathian nih hi pa lungthin ah rian rak ttuan hlah selaw an um ti hnga lo.

Kum 1983, September 26 zingka te ah Russia ram nih a ram vennak caah  ralrinnak a tuahmi nih a parpahlek a phan, cu lio caan ah cun Stanislav Petrove nih a kum 44 nak a hman lio a si.

Ralkap hna umnak ding ah lei an cawhmi chung khor a um lio ah ralrinnak an tuahmi eng cu zuk tiah a ceu len cang, cunih a langhtermi cu a tu hnu minute 15 ah vawlei hrawhnak caah Nuclear hriamnam hman a si lai ti khi a si. cu Nuclear hriamnam cu USA missile panga nih US in Moscow lei ah a kah lai.

Petrove chim ningah “Missile kah an timh cuahmah eng cu ka hmuh, ka lau tuk ruang ah ka taksa a hnin dih, a ther in ka ther, kha lio caan kha ka nun chung vialte ka philh kho ti lai lo, ka tthu i zeitindah vawlei a um lai, caan a donghnak caan cu ka zoh ko, eng sen tak tak cu a ceu len cang, an biachimmi ka umnak khor in ka theihmi cu ‘kap cang u’ timi a si”

Ralkap training a rak neih lio i an chimh bantukin an commander sinah USA nih Missile in tuk an kan timh cang tiah thawng thanhnak tuah a tim colh, sihmanhselaw thil umtuning a ruah tikah thil si kho in a thei lo, a ruang cu Russia missile pawl in an kah ve bak a si ah cun minung nunnak a liam dingmi a ruah ah lungawttawm in a um.

Petrove chim ning ah “Russia nih missile hriamnam kha rak hmang selaw vawlei caah ngaihchia ngai a si lai, vawlei tam tak tak van lei ah a vorh lai, meikhu tam tak tak a ser fawn lai, vawlei ah Ni in a rami eng hmuh ding a um lai lo, a voikhatnak ah minung a tlawm bik ah 1,000,000,000 leng an thi colh lai, a donghnak ah vawlei minung vialte kan thi dih lai, vawlei pi cu minung um lonak thetse ram ah a chuah lai” tiah a ti.

Vantthat ah, Petrov nih ralrinnak a theihmi cu a hmaanmi ralrinnak a silo tiah a theih tik ah missile hmannak order chuahnak caah button nam ding an sermi a nam tthan lo, button nam bak selaw missile in an i kap colh lai, sihmanhselaw lau tuk ruang ah button a nam lonak hnga tthate in thil a dothlat ta, minute tlawmpal chung ah thil umtuning a dothlat dih manh, cucaah missile i kahnak lak in a kham dih.

A thil hmuhmi bantuk le a theihmi bantuk kha midang duty lio siselaw ralrinnak an pek colh lai, a ran khawh chung in nuclear missile button an nam colh lai i, vawlei an hrawh dih cikcek hnga, sihmahselaw Petrove nih a ruah tik ah ralrinnak an tuahmi cu ralrinnak hman lo, a tak tak a silomi ralrinnak a si tiah a dothlat manh ruang ah nuclear hriamnam in vawlei a khamhnak a ruang a si.

Hi kong hi a ho sin hmanh ah a chim bal lo, sinain tadinca ttial pakhat nih a theih tik ah a konglam ttial awk ah a inn ah a kal, sihmanhselaw a konglam ttial cu a duh lo, heh tiah tthatein a chimh hnu lawng lawng ah tadinca ttialtu sinah a konglam a chimh.

Petrov kong an ttialmi cu Hollywood pakhat Kevin Costner nih a theih tik ah cheque in $500 a kuat colh, cu hnu ah a thil tuahmi philhlonak caah “The Man Who Save The World(vawlei khamtupa pakhat)” timi documentary an tuah i, kum 2015 ah mi zapi zoh awk ah an release.

Russia ram nih an mi ralttha a theihlo ruang ah sifak ngaiin a nunnak a liam, sihmahselaw tadinca ttial pawl nih a konglam an ttial tik ah a min thang tak tak, cuhnuah a tuahsermi vawlei nih a theih , laksawng tam tak tak an pek.

Kum 77 a si ah a nunnak vawleiin a liam.

 

Leave a Reply

Your email address will not be published. Required fields are marked *