Pathian a thangthat lio ah cun thluachuah tampi a ngei ko nain Pathian hnulei ah a mertak cang hnu ah chiatnak khur thuk pi pawng ah a dir ko cang,

Kum 2016-ah Sadiq Aman Khan, Pakistani Muslim chungkhar ah chuak mi,London Mayor caah thimtlin asi ah khan mak kan ti ngai ngai kha asi, Atu ah cun Rishi Sunak, Indian Hindu chungkhar in achuak mi, Prime Minister caah thimtlin asinak nih hin, British miphun an ihngahnak, Khrihfa lungphum a nghinhter cang khi asi, vawlei history-ah empire ropi le kau bik cem cu, British empire kha a si.

A ropi can lio kum 1900 cho hrawng ah khan ram 56 a uk mi kha asi, an uk mi kha sq kilomiter 26 million bak asi, minung 425million hrwang an um, vawlei history-zong ah company lian bik East India Company asi, kan nu le pa hna nih, kumpinu ram tiah an chim tawn mi dirtu ram arak si, vawlei parliament ropi bik, mithiam hna nih, parliament hrintu nu (mother of parliament) an timi bak cu dir asi.

Siangpahrang khawkhan lairelnak (monarchy) ropi ngai mi an ngei peng fawn kha asi, UK Queen tuan sau bik Queen Elizabeth II cu kum 70 chung khawkhantu asi hnu ah, tukum September thla ah khan a thi, Queen Elizabeth II nih hin khawkhan lairelnak atlai lai ah khan, Bia tak tein Pathian a auh kha asi, A fapa King Charles hi cu a nupi mui dawh ngai mi, princess Diana a ṭhen hnu ah, midang a ngei than asi.

A nun ning hi Pahian zumtu dik asi lem lo kha asi, mipi hna nih an cung ah zumnak an hngattuk lem lo fawn, Ram dang dang hna uk in, coloni­zation an tuah rualrual ah thawngtha bia chim darh nak lei ah, hma hruaitu an si, Industrial revolution-ah hma an hruai fawn, nain technological revolution-ah cun America-nih hma a hruai kha asi, Missionary-hna ram dang dang ah an kal chuahter hna, Mizoram hmanh ah arak thlah mi kha asi, an san tlai pi ngai ngai ko.

Sihmanhselaw atu ah cun, UK cu ram thim ah acing cuah mah lio cang, thawngtha bia chim piak herh ram asi cang, An ram chung ah minung 30% cu biaknak ngei lo, Pathian um zum lo an si cang, 50 % hi Christian- kan si an ti, 5% hrawng hi biak in ah a pum vet awn khi asi, cu hmanh ah pitar/putar khi an si deuh dih, a tam bik cu a min tein Khrihfa (culture Christian) an si, 4% cu Muslim an si, 2% hi Hindu an si, biaknak theih lo mi 10% an um fawn khi asi cang.

An parliament zong cu atu ah cun an mumal ti lo, miphun dang hmuhsit phun khi asi cang, atu ah hin Labour party-nih khawkhan lairel asi, kum khat chung in Prime Minister pathum (Boris Johnson, Liz Truss, Rishi Sunak) an ngei manh cang, ningzah ngai ngai in bia an i-al hna tawn, vawlei nih an ni sawh bak ko cang, An parliament buainak bik zong, an ram economy a tlak chiat tuk cang caah asi, tiah news site ah kan hmuh peng ko khah!.

Atu ah hin Economic crisis faktuk in an tuar lio khi asi, Brexit tiin European Union cu kum 2020 ah khan an chuah tak diam kha asi, mah cu zei maw tiin an economy nih an tuar ngai khi asi, Russian-Ukraine war ah hin, energy lei ah harsatnak atuah fawn, World News chim ning ah an ram mipi acheu hrawng deng mang nih, zar khat (per week) ah mi pakhat nih ₹ 300 hi daih ding ah an hman, (ref. World News Published on Oct 27, 2022 01:45 PM IST from Hindustan Times.

Joseph Rowntree Foundation chim ning ah cun, hmun tampi ah lumter nak (house heating), toilet thil (toiletries) le shower an ngei lem lo ati, Centre for Economics and Business Research chim ning ah, zar khat ah £407 ($ 473) income ngei hna nih cun, tax pek ding vialte an pek hnu ah, pocket money caah £2.66 an ngei khawh ati, nikum 2021 September thla ah khan cun £55 an ngei khawh, Kum 2008 hnu ah cun UK economy dirhmun tlak chiat lio bik asi.

Vawlei ram rumnak ah an langhter tawn (GDP) hi asi, atu ah cun India hmanh hi 5 nak ah a um ko cang, an dirhmun hi der thawng ngai ngai khi asi cang, atu dirhmun bantuk in an ram economy hi athancho khawh lo ah cun, ram sifak dirhmun an hlat tuk ti lai lo, UK-ram ah thil harsatnak phan cuah mah lio hi, a chan lian bik pakhat cu Bawipa Pathian an kal tak hnu in hramthawh ve cawlh khi asi, Pathian ah an ihngah ti lo hnu ah hin chiatnak rapthlaktuk an ton mi khi asi.

An Parliament buainak zong an Bishop pawl Council (Biaknak  hruaitu hna khawkhan lairelnak in) hram thawh asi, mahruang ah cun United Kingdom ram nih atu bantuk economy le ram hruainak kong ah, A hlan lio ah Pathian he an inaih lio ah an ram thangcho in vawlei ram 56 bak anrak uk khawh kha asi, atu ah cun, ram dang hna ni sawh bu khi asi pin ah, an ram tlak chiatnak tuk ngai in an ihngah nak fek lo dirhmun lio khi asi.