Vawleicung Chungkhar ngan Bik Konglam – Salai Kawltu

Vawleicung Chungkhar ngan Bik Konglam

Vawlei pi khuaruah a har tertu ah mizo pa aa tel kho ve. Tu kum zabu 21 i fimnak le thiamnak a san thluahmah lio hi bantuk kong a phundang ngaimi nih tulio minung hna khuaruah a har ter ngai i a si lai cu amah ton duh ah vawlei cung hmun zaram kip in mitampi a sin an phan cang.

Media lei in tonbiaruahnak a neihtu zong an tlawm ti lo. Amin  Pu Ziona a si, Aizawl pawng te Baktawng khua i khua a sami pa a si.

Nupi hi 39,fa 94 cun tule 33 bak a  neih hna.  An dihlak i rel khawhmi ah minung 180 hi chungkhar khat ah khua an sa tti hna. A fale hi an tam tuk caah an min hmanh an dihlak in tha tthi in an chim kho cio hna lo.

Miphun dang media nih Pu Ziona kong social media i an taar tikah mi tampi nih a phun phun in comment an pek. A cheu nih vawlei thanchonak nih a phanh lonak North Korea ram le a chungkhar umtuning hi an tahchunh. A thangtthattu nakin amah a sawitu le khuaruah a harmi minung tam deuh dawh a si.

Vawlei cung ah chungkhar ngan bik (World’s Largest Existing Family) tiah theihhngalh a si. Tonbiaruahnak a neih hi a voi tam cang, a kong zong tha tthi in a chim zuam ti men lai lo. Cutluk cun mi nih an fuhpanhmi pa si ve. Pu Ziona hi vawleicung media channel minthang Ripley’s Believe it or not hna zong ah an rak langhter cang. Vawlei cung khuaruahhar  thil record an tuahmi ah voi tampi a min hi a lang ve cang.

Kum 17 a si ah amah nak i kum 3 upa Zathiangi he an i um. Zathiangi hi a nupi hmasa bik a si. Atu ahcun Zathiangi hi chungkhar khuasaknak tawlreltu bik pakhat a si. Pu Ziona chungkhar chungtel hna nih cun an upat ngaimi an nu bik a si. Hi an nu hmasabik Zathiangi nih hin chungkhar cu tha tein a zohkhenh i, ralkap bu fate bantukin nichiarte an tuah awk riang cio fel tein an ttuan cio tawn. A cheu vok rawl a pe hna, lehtama rian a tuan hna, rawl a chuang tawk, thil a suk tawk tiin rian zong tha tein an i phawzam dih.

Rawl an ei ahhin a eitu minung an tam tuk caah puai tuahmi ko an lo. An voikhat zanriah ah ar (chicken) 30 hrawng thah a hau. Alu (potatoes) kg 60, le facang kg 99 peng an chuan.

Inn dot 4 ah room 100 leng umnak inn a neih fawn.

Hi Baktawng khua ah hin an bochan ngaimi pa a si i, an bu zong nih lentecelhnak hmun ‘Chuanthar Stadium’ nganpi a neih.

Pu Ziona hi Khrihfa biaknak he a pehtlai pahmi bu ‘Chana Pawl’timi ah an hruaitu pa bik a si. Hi bu hi a pa nih a rak thokmi bu a si. ‘Chana Pawl’ timi bu nih cun Bible ca i Biakam thar Biathlam cauk chung ta ‘Kum Thongkhat Uknak’ cherhchanin an zumhnak hrampi  cu an derh. Kum 1942, June 12 khan hi bu hi rak dirh diam a si cang. Asinain a hnu tlawmpal ah ‘Hmangkawn’ khua ah hi  bu phunglam a zultu hna hi cu cawnpiaknak dik lo le ttih a nungmi cawnpiak a si tiah khuachung in khuachung hruaitu upa hna nih an  thawl hna. Asinain atu ahcun Baktawng Tlangnuam khua ah hi ‘Chana Pawl’ hi chungtel 2,000 tiang an phan cang. Kum chiar te June 12 paoh ah hi bu dirhnak camtuak ‘Bawite Kut’ timi cu an hmang tawn.

Hi bu nih cun nupi pakhat nak tam deuh neihnak (polygamy) hi a cohlan.  Hi phunglam nupi pakhatnak tam neihnak ‘Polygamy’ hi ram tampi ah cozah nih a sianh lomi thil a si. Vawleicung ram  200 lak ah ram 50 lawng nih an cohlanmi a si. Hi ‘Polygamy’ a cohlang tu ram cu muslim ram deuh an si hna. Hi ram pawl chim lo in a dang ram paoh nih cun an nupi pakhatnak tam neihnak ‘Polygamy’ hi an ram phunglam nih a sianh lo.


Mi tampi nih an sawisel tawn nain Pu Ziona sinin cawnawk tampi kan nei cio lai. A fale cawlcanghnak zoh tikah nawl a ngaimi le zulh phung tang ah tha te i a tthangmi fale  an si ti a lang. Chungkhar khat ah minung an tampi nain rual rem te le i daw tein khua an sa kho. Nupi tampi a neih ko hna nain aho hmanh nahchuahnak le a lung a fakmi an um lo. Hi nih hin mipi thinlung ah khuaruah a har ter.

Leave a Reply

Your email address will not be published. Required fields are marked *