Ralpi pakhatnak cu (28th July 1914– 11th Nov 1918) zei tin dah hram an thawh “Ralpi a rapthlak ning cu”

A tu lio ah Pu Trump-nih North Korea thil tuah ning aduh lo ngainak kong ruang ah, ralpi chuak thut khawh dirhmun ah kan dir lio tiah mi tampi ruah ning asi, vawlei nih anrak ngaihven fawn, kan zoh thup ko cang khi asi ko, Kan mah tlangcung miphun hna ruah ning ah cun, idoh kose, ikap kose tiah kan tit awn, kan duh ning zong asi, Cu lio ah cun Ralpi hi chuak selaw zeitluk in dah vawlei nih achiat pi lai? Timi belt e cu kan ruah bal lo ti awk khi asi, aruang cu Ralpi chuah hnu ah achuak/hrin kan si caah vawlei chiatning rapthlak zia kanrak theih lo kha asi.

Zei asi zong ah Ralpi nih zei thil dah achuah pi timi hi langhter kan duh mi asi, Vawleipi nih hin Ralpi vawihnih kanrak ton cang kha asi, avawithumnak hi rak phan selaw, zei thil dah vawlei ah aphan te lai timi belte cu aphan phawt lo ah cun chim khawh asi lo, Ralpi hmasa bik kum 100 kal liam cang ah khan, vawlei nih zei thil dah an ton? Zei bantuk chiatnak dah an ton? Timi hi langhter timh mi asi.

Ralpi pakhat nak ah khan ralkap ral doh mi vialte hna chung ah khan hmun thum then hmun hnih hrawng hi an thi dih tiah tuaktan asi, ma chung ah tam deuh cu meithal kuan ruang ah si lo in, zawtnak hrik tha lo ruang ah thi an si, zawtnak hrik nih cun ralkap le ralkap lo zong thleidan nak a ngei ti lo, ralkap pin ah civil minung tampi nunnak aliam ko kha.

German nih a hmasabik nak si ding in Flamethrowers (Mei-alh chuahter khawh meithal) arak hmang, flamethrowers nih hin 130ft tluk a kap phak khawh khi asi, Ralpi pakhatnak ah hin, a vawikhatnak caah atu lio Tank kan timi ‘Little Willie’ hi anrak hmannak hramthawh asi, kum 1915 ah khan an tuah, mi pathum a chungah chuang ah an thu khawh, suimilam pakhat ah 4.8km cak/thawng in atli khawh mi asi.

Ralpi idoh chung ah khan British pawl nih an Tank-hna cu a nu-le a pa-ah adang tein then asi, tank nu-hna nih cun Machine gun lian tha tak an ken, tank pa-hna nih meithal pi an ken ve fawn, Idohnak meithal thawng cu dongh lo tein fakpi in achuak peng tawn kha asi cang, kum 1917 ah Belgium ah German pawl umnak hmun ah thil puak mi kha, 220km hlatnak London lei in theih khawh kha asi, Belgium ram, Messines pawng ti dil ‘Pool of Peace’ an timi, 40ft tluk athuk mi kha kum 1917 ah British nih tons 45 tluk rit mi bomb an thlaknak in khuar khurum ah cang mi kha asi.

German fighter pilot Manfred Albrecht Freiherr Von Richthofen kha ralpi chung ah vanlawng kap tla tambik asi, vanlawng 80 bak akap tla mi asi, kha lio ah amah zong athi ve cawlh ko, Ralpi pakhatnak can lio ah khan Uico hi san tlai ngai ngai in an hmang khawh hna, ral hmai ah um mi hna ca zong ah phone bantuk in thil/bia kuatnak caah Uico kha an rak hman kha asi.

Tank hi a hramthawh ah cun ‘Lei-lawng’ (Landship) tih asi, hriamnam dang bantuk in thupter khawh asi lo caah, Ti phurnak tank phen ah thupter tawn asi, British pawl nih cun a code name caah ‘Tank’ timi hi anrak hman kha asi, kha lio ah U.S President si lio Woodrow Wilson-nih khan a term hnihnak ding a celh than lai kha asi, an au chuahpi mi cu “Ani nih hin raldohnak lak ah akan venhim” tih asi, nain President office a thut hnu thla khatnak ah United States zong cu Ralpi ah arak zuang lut ve kha asi.

Ralpi pakhatnak lio ah khan U.S Army anrak tam deuh deuh ko, Congress nih ‘Selective Service Act’ an passed kha asi fawn, hramhram in ralkap ah luhter tiphun zong in chim khawh asi lai, Ralpi dih ah khan U.S ralkap 2.7 million bak cu hramhram in lak asi, 1.3 million belte cu ram caah pum pek in a lut mi (Volunteer) an si, U.S ram chung ah German minung a um mi hna cu zei maw phun in zoh dih kha asi, German cabu vialte hna cu mei khangh piak dih asi, German Shepherd dog zong tampi an thah pin ah German le American thlahpawlh zong thah mi an ngei hna.

Zawtnak Hrik ‘Spanish Flu’ ruang ah ralkap hmun thum then hmun khat tluk an thi, ralpi pakhatnak ruang ah U.S nih tangka an hman dih zat cu $30 trillion bak asi, Kha san lio he ruah ah cun atam taktak khi asi, Raldohnak ruang ah khan Ralkap hriamhma ngei tampi an um, a cheu hna cu taksa tha ngei ti lo hna khi asi, Ralpi nih ram economy le ralkap tampi, civil minung tampi hna pin ah, thi lo in sifak ret5hei vawlei cung ah an tam ning cu rapthlak tuk khi asi, a theih mi hna nih cun chim zong ah an duh lo ngai ngai hna khi asi cu mu!

Ralpi pakhatnak ruang ah khan Siangpahrang ram pali/4 bak tluk chiat asi, Ottoman, Austro-Hungarian, German le Russia hna cu an si, ralpi pakhatnak nih hin min dang a ngei, Great War, The World War, The War of the Nation le War to End All Wars ti hna in auh asi, Mah idohnak nih hin kum 4 chung bak asi, vawlei Rilipi le vawlei pum hna hi arak danter ngai ngai khi asi mah chung ah Europe ram hi kawlrawn ah arak cang kha asi.

Ralpi hramthawhnak taktak cu Serbian tupung  pawl nih Austro-Hungarian Siangpahrang thutdan ngeitu  Archduke Franz Ferdinand le a nupi an kap thi kha asi, Austria-Hungarian nih 28th July 1914 ah Serbia lak ah raldoh phuan kha asi, Russia le France nih Serbia an bawm hna, German-nih Austria-Hungary a bawm ve fawn, Cun boruak kha arak sang cho deuh deuh peng in, ram dang dang hna ah akai deuh deuh hna, mah hnu ah cu, kum 4 chung bak vawlei ralpi pakhatnak cu arak chuak kha asi.

Russia nih cun ralkap 12 million bak an chuahter, Idohnak ah ralkap kqal chuahter lian bik arak si, A mah belte cu an ralkap kha hmun li then hmun thum bak an thi, pin ah hliamhma tuar le an umnak theih lo tampi an um fawn,United States hi cu ralpi donghnak lei kum khat le cheu hrawng long ah an lut kha asi caah ralkap an sungtuk lo khi asi.

#karak peh than te lai@