September 23 ah Vawlei Caan a Dong Lai Timi Fiangtein Dothlatnak – Salai Kawltu

September 23 ah Vawlei Caan a Dong Lai Timi Fiangtein Dothlatnak

Zarhpini September 24 ah caan a dong lai tiah an chim tthan.

Hc Lalvenhimchhunga

Planet-X le Nibiru kong hi ka ngakchia lioin ka theihmi an si cang, Kan inn chaknu nih a rak ttih tuk ruangah hringtu ka nu nih zumtu caah ttih ding zeihmanh a umlo timi bia in a rak hnemhnak kha ka theih peng ko, sihmahselaw hmailei thil kong an chimchungnak cu a hmaanlo ti fiangtein theihawk ah tuchunni tiang vawlei ah kan nung ko.

Hi hmailei kong chim chungnak (prophecy) hi David Meade nih a larter mi a si, a caan chimmi ah vawlei a donghlo caah a ni a tthial lengmang. Solar eclipse tukum August 21 ah a ummi a hmuh tikah September 23 hi caan donghnak caah a chimnak hi a si. Cucaah tuchunni September 23 tiang vawlei donghni le caan a tthial cang. Zeitik ni le caan ah dah vawlei dongh ni le caan a tthial tthan te lai? ti cu ka ruahmi pakhat a si.

Tuzing ah caan donghnak kong an ttialmi  ka vun rel tikah vawlei caan dongh ni cu September 24 ah a chimtupa David Meade nih a tthial tthan.

Biakinn pulpit in hi kong a chimmi tiang an um ti thawng ka theih tik ah ka lungrawk tak tak.

Mi tampi nih an chimmi September 23, zarhteni ah vawlei a dong lai timi na theih theo lai ti zumhnak tampi ka ngei. Khrihfa mi tampi tuaknak(numerology) nih Bible bia bantuk tein September 23 ah vawlei a dong lai tinak caah LUKA 21: 25-26 hna hi an hman.

LUKA 21:25-26—“Cun Ni le Thlapa le Arfi ah khin hmelchunhnak an lang lai. vawleicung ram hna cu rili tilet a thomi le a awnmi nih olokchong in an tuah hna lai”.

“Vawlei cung pumpi i a tlung dingmi thil an ruah ah khan mi cu ttihnak in a ther in an ther lai; zeicahtiah vancung tthawnnak cu an i hnin lai”

Hlanlio mifim thiam Egypt khua pakhat Giza a ummi hna nih an tuakning ah September 23 hi fiangtein hmelchunhnak an tuah tiah an ti, cu thil hmelchunhnak kong le krihfa mi tampi mithiam pawl nih vawlei sining an theih tikah Bible ningin an tuak ve, cutikah September 23 cu caan dongh ni a si lai tiah an ti ve. Sihmahselaw caan donghnak caah an chimmi Nibiru an timi planet-X hi a um tak tak lomi le i dehnak/hlennak sawsawh a si timi hi ka hlathlai tih ah ka hmuh khawhmi a si.

Krihfa number tuaknak(Christian numerology) in an tuakmi a hmaannak caah vawlei a dong lai, Limkeng lu panga nei a lang lai, Nu naupawi nih fa a nei cang lai (hi hna hi biathlam an chim duhnak a si theo lai ti ka ruah) timi cu heh tiah Planet um tak tak lomi le ruahchommi NIBIRU he thil sining an pehtlaihter. September zarh linak thla 23 ah NIBIRU nih kan umnak vawlei a khuai dih lai, vawlei a dong cang lai tiah mi tampi an thihphai hna, hi thong ka theih tik ah ruahnak a tam ngai.

NASA website pawl ka hlathlai colh, hi biaphuan hi anmah timi a simaw ti zong ka dothlat. Hibantuk Planet Nibiru hi kan umnak Solar system naih ah a um maw? Kan umnak planet earth(vawlei) khuai dih dingin zeibantuk hla ah dah a um? NASA pawl nih hi palnet X: Nibiru hi a um tak tak timi thawngpang an ttial hnga maw tiah ka dothlat. NASA pawl nih hibantuk thil hi an hmu tak tak maw? ti tiangin ka zoh dih. Ka hmuh mi cu kan Solar system chung i planet cu chim lo, planet nak hme thil tiangin hmuh lomi an neilo, sihmanhselaw NIBIRU an hmuhnak kong an ttialnak ka hmu  lo, cucaah vawlei hrawktu planet zeihmanh a um lo caah ttihawk zeihmanh a um lo.

NIBIRU cu aa thup i telescope nih a hmu kho lai lo ti an chimnak tampi internet ah ka hmuh, sihmanhselaw hi a ttialtu pawl hna nih an theih fiang lomi cu hi hi a si, zeibantuk thil paoh nih hnuhnak thazaang(gravity:magnetic field) an ngei dih, nang zong nih na ngei, na pumsa a hmet tuk ruangah ruahawk na theih lo caah a si. Vawlei hrawk kho tu leh kehkuai dihnak caah planet NIBIRU hi mi tampi chim ning ah a thuh ruang ah Telescope nih a hmu kholo tiah an chimnak tampi zong rel ding a um fawn, sihmanhselaw thil a hnuhnak thazaang cu aa thup kho lailo, zeicaah kan ti ahcun vawlei khuai dih khotu cu Planet ngan tak tak asi awk a si, vawleinak hme Thlapa hmanhnih thil a hnuhkhawhnak a thuh khawh lo caah rili ti hna a thawhter tawn, cucaah NASA pawl nih kan umnak Solar system i Planets hna an cawlcanghning ah Planet X a um tak tak ahcun thil  a hnuhning an hmuhawk hrim hrim asi.

Sihmanhselaw cutibantuk thil zeihmanh an hmu fawn lo, a hlat tuk ruangah a si lai timi tampi a ttialtu an um kho men, NASA telescope tthat ning kan theihawk ah Japan ram i fikfa pakhat um selaw Kawlram in an hmuh khawh lai, cutibantuk Telescope ngan pi pi cu van cung sang pi pi ah an chiah hna. Kan umnak Solar system cu chim lo, vawlei umnak Solar system aa bunhnak Milkyway Galaxy leng lei i a ummi Galaxy tampi tiangin a hmuh khawh dih. An Telescope nih Planet cawlcanghning a hmuh khohlonak ah a um ahcun vawlei caah ttihnung asi lai lo tinak a si fawn lai. Zeicaah kan tiah cun hnuhnak thazaang tthawng tak tak a neimi, vawlei khuai kho ding dihmi Blackhole pawl Galaxy dang ah an tam tuk, tuchunni tiang in an hmuh chap thluahmah, sihmanhselaw an umnak a hlat tuk ruangah an thil hnuhnak thazaang cu  vawlei caah pakhat hmanh ttihawk an um lo. Cucaah NIBIRU timi hi lih le hrokhrol a si.

Sihmanhselaw ka ruahnak ah thil tampi a ummi cu a tulio vawlei ka ruah tikah hriamnam phun phun ram tampi nih an ser thluahmah, N. Korea ram hmanh nih USA a ttih tilo, Nuclear hriamnam a neimi ram cu ahohmanh an i ttih tilo, UN general Assembly- debate nak caan ah vawlei ram hna uktu bawi biachim ning ka ruah ah ttihnak a ho hmanh an i nei hnalo, vawlei ah lihnih phun phun theihawk zong a tam ngai cang, thlichia phun phun nih nunnak tampi zong alak, hi thil hna nih hin vawlei cu a donghter kho dihmi an si ko, vawlei fimthiamnak a san tuk cang caah planet dang ah seh(robot) pawl zong hlathlai dingin tampi an fial dih cang hna. Planets dang pawl umtuning le thil sining thawngpang tam tak tak kan theih khawh cang. Kan vawleipi aa mer ning hi tlawmpalin thil pakhat ruangah i tthum selaw minung kan thi dihlai timi zong kan theih dih cang, cucaah Bible bia bantuktein vawlei cu a dong te ko lai, sihmanhselaw a tulio a lar ngaimi NIBIRU hi vawlei dinghtertu a si hrim hrim lai lo.

Van i a ummi pawl(arfi) le Planets pawl caan an hmanning tahnak(cosmic time scale) in thil sining tampi kan theih khawh cang, tuni in kum billion 4.5 a liam tikah Ni(sun) nih lumnak a peknak caah a chung i Hydrogen meikang mi khi adih lai, cutikah Supergiant ah a cang te lai, cutikah cun vawlei ah nunnak a um kho ti lailo, sihmanhselawm ka chim bang kum billion 4 leng a hauh caah thil dang ruangah vawlei cu a dong te lai ti ruahnak tu nih a ka tei deuh.

Cutikah kan umnak vawlei a kehkuai lonak caah a chung tak tak i a ummi Magnetic dynamo nih vawlei ah a kan car dih lai i, mithi ruakin a khat dih lai. Planet dang Mars bantukin nunnak um lonak Planet umhar ah a chuak te lai. Minung um lo tein vawlei a um tik caan ka ruah ah ka lunghna khi a rawk ngai ngai.

Kan vawlei khuati umning zoh tikah a thleng ngai cang, a caan lo ah ruah zong a sur len, nipi(summer) ah a lum chin lengmang, cubantukin thlasik ah a kik chin lengmang fawn, mathematics hmangin thil tuaknak(mathematical model) in an tuak tikah minung kan tuahserning a tthatlo tuk ruang ah rili tiah carbon a karh thluahmah cang. Kum 2100 ahcun carbon a tam tuk ruangah rili chung ah zeibantuk phun hmanh an nung kho ti lailo. Hi thil hna ruah ah lungrawk tuk asi, aho paoh nih kan vawlei daw hna u si, Pathian nih minung a kan sernak le amah thangtthatnak caah a kan pekmi vawlei a si tiah philh hrim hrim hna hlah u si.

References:

  1. NASA website: https://www.nasa.gov/
  2. NASA: total eclipse(21st August 2017)
  3. The Sun: ‘doomday is coming’ is the end of the world on September 23 and what is David Meade’s theory about the great American solar eclipse and planet X?
  4. EXPRESS: Will Nibiru hit Earth on September 23 2017? Will Planet X end the world TOMORROW?
  5. Forbes: Science: The End Of The World Is Coming, But Not From Nibiru On September 23
  6. IFLscience: NASA Responds To Claims That The World Is Going To End
  7. Mirror: Science:nasa- NASA slams popular APOCALYPSE conspiracy theory  calls Nibiru Planet X an internet hoax
  8. Snopes: NASA Warns ‘Planet X’ Is Headed Straight for Earth?

 

Leave a Reply

Your email address will not be published. Required fields are marked *