Zahan US Thil Cangmi Kong ah US Hawitha Israel a Holh Ve Cang

 Israel ram Prime minister Benjamin Netanyahu nih cun, Capitol i US mipi cawlcanghning cu Democracy nunphung he aa kalhmi a si caah US le Israel ca ah tumchuknak phunkhat a si, tiah US Treasury Secretary Steven Mnuchin sin ah a chim.Hi lio ah hin Netanyahu nih cun US president Trump cu a thil ti that ruang ah a fak thiamthiam rih ko. November thla US ram president thimnak ah vote firpiak buainak kong ah raltha taktak in a doh peng rih.

Asinain, US attorney general William Barr, Trump nih rian a pekmi pa nih cun, hi vote firpiak kongkau ah hin zeihmanh fianhnak taktak a um lo, tiah a chim ve.Benjamin Netanyahu, Israel PM nih cun,” Capitol i thil cangmi hi ningzak ngai a si, fakpi in kan doh awk zong a si, Chan saupi cu America ram democracy phunglam hi ram tampi le Israel zaohchunh mi a rak si, phungning lo in cawl le tharum thawh hi US le Israel he cun aa ralkalh mi a si,” tiah a chim. US Treasury Secretary Steven Mnuchin zing nih,” Capitol i tharum thawhnak cu America ram ca ah cohlan a har tuk hringhran,” tiah a chim ve.

Israel Defense Minister Benny Gantz zong nih,” Washington in hmanthlak kan hmuhmi cu zumh a har tuk hringhran, democracy i zumhnak a ngeimi vialte thinlung a fahter,” tiah a chim ve. French President Emmanuel Macron zong nih,” Washington i kan hmuh mi cu zumh a fawi lo, hi thil cang hi American he aa tlak lo taktak mi a si, America democracy phunglam hi kan zumh taktak mi a rak si,” tiah a chim ve.

UK prime minister Boria Johnson zong tweeter lei ah a hung au colh ve,” United States hi vawleicung hmun kip ah democracy dirkamhtu a si zungzal tawn, cu ca ah nawlngeihnak i hlanh chin hi a biapi tuk mi a si,” tiah Trump cu a mawhchiat.Hilio ah hin US ral a si zungzal mi Iran president Hansan Rouhani lung a awi tuk rua,” US show cu a mak hringhran ko, hi nih hin khuathlang ram democracy thatlonak a langhter, vawlei fimnak ah thangcho ko hna hmanhsehlaw an cozah uknak phunglam a thurhnawn ning a lang,” tiah a chim ve.  Source: The Jerusalem post