Australia Laimi nih Thihnak Fak Tuk Kan Ton. Salai Bawi Hup nih a Mual a kan Liam Tak (RIP)

Nihin zaanlei ah Breaking News in kan rak langhter cang mi, Australia inn kanghnak kong update kan rak tuah nolh tthan.

Nihin August 1, 2020 zaanlei suimilam 1:00Pm hrawng ah khan Australia, Adelaide ah a um mi, kan mah Laimi inn pakhat mei a kaang i cu ahcun inn chung ah aa hngilh lio mi Salai Bawi Hup Lian Zahau a nunnak a liam hi asi. Bawi Hup Lian hi kum(26) lawng a si rih i an inn a kangh lio ahhin inn chung ah aa hngilh lio a si. Hringtu apa nih chanh ding in a timhtuah tuk ko nain meikangh a zual cang ruang ah chanh kho loin a nunnak a liam hi a si.

Inn kangh le thihnak a tong mi chungkhar hna hi Australia, Adelaide , Parafield Gardens ah a um mi an si i Falam mi an si tiah 7NEWS Adelaide nih a tarlangh.

An inn ah a um ve mi, an chungkhat a simi Salai Anthony Zahau nih “Inn ah ka um lo karlak a si. Ruak humh nak ah ka kal i cu ahcun inn a kaang tiah phone an rak ka chonh i namchan in inn lei ahcun ka rak tli ve ko nain zeihmanh ka tuah khawh mi a um ti lo.

Inn ah rak um ning law cu timi ka ruat nain santlaihnak a um ti lo. Salai Bawi Hup Lian cu kapa nih khamh ding in a zuam tuk ko nain a khamh kho lo” tiah 7NEWS Adelaide sin ahcun a chim ve. Hi inn khangh nak ruang ah hin a dang minung pakhat zong hliamhma a tuar ve i Sizung ah an kal pi lio asi.

Hi inn kanghnak kong he pehtlai in biafiang ngai ngai aum kho rih lo. Minung nih khangh hramhram mi maw a si a mah tein dah timi cu police nih an hlathlai cuahmah. A si nain minung khangh mi si loin a mah tein a kang mi a si ko lai tiah an zumh bik.

VIDEO timi hi Click law rak zoh ve Source: VOM