Chin nungak pahnih Tuluk ram(China) ah thihnak an tuar ning thawng fiang!

China ram ah rian tuan ding in a kal mi Chinnu pahnih hna cu Police tih in an zamnak lampi ah rawltam le tihal tuar khawh lo in an nunnak a liam tiah theih asi. Thihnak fak a tong mi Chin nungak pahnih hna hi Mai Lal Rin Tluang le Mai Bawi Za Len an si i an pahnih tein Kalay peng, Aung-Zua khua mi veve an si. Mai Bawi Za Len kong hi a chungkhar le a hawile zong kan pehtlaih khawh rih hna lo caah a chungkhar dirhmun le China ram aphak ning fiang in kan thei kho rih lo tiah Ihburlen nih a langhter.

Mai Lal Rin Tluang kong he pehtlai in an langhter ning ah ” Mai Lal Rin Tluang kum 23 hi Pu Van Lal Hlu le Pi Thian Nei Thluai hna i fanu, Aung Zua khua mi a si. A thihnak kong he pehtlai in hringtu apa Pu Van Lal Hlu nih a chim ning ahcun Mai Lal Rin Tluang hi kan hnu thla August ni 14-15 ah khan China ram a kal i a mah Agent sin ah tluang tein a phan. A mah he a kal mi hi minung 60 an si hna. An mah Agent inn ahcun zaan (2) an riak i cu hnu ah an rianttuan nak hmun lei ah motor in an kal hna. Vanchiat ah China police nih Lampi in an rak bawh (ambush) hna.

Cu lio ahcun an mah lakah aa tel ve mi Rakhine minung pakhat nih Kawl holh in a au i, China Police kut ah thongtlak nak cun zam dih hna usih, kan himnak kan mah tein kawl hna usih tiah a au. Cun an za te cun motor cung in an zuang hna i minung 15 cu an zam manh nain a dang 45 cu police nih an tlaih dih manh tthan hna. Cu ti cu Mai Lal Rin Tluang le a hawinu, a dang an hawile cu a zam kho mi lak ah an i tel ve. A si nain an zamnak ah ni zeimaw chung ti rawl tha tein an i hmuh khawh ti lo ruang ah an nunnak a liam. Mai Lal Rin Tluang a thih hi a chungkhar zong nih tuan ah an thei lo. Nizaan September 5, 2020 lawng ah khan an theih hi a si i cu an fanu thawngpang an theih bak cu lungkuai in chungkhar zong Aung Zua ahcun an um kho hna” tiah Ihburlen nih cun a langhter.

Kan farnu le pahnih Mai Lal Rin Tluang le Mai Bawi Za Len an thih ning kong hi fiang in an chim kho ngai ngai rih lo. A si nain Police tlaih tih tuk ruang ah an zamnak ah ramtang le hmawngtang tiang an phan i tirawl eidin zong an ngeih ti lo ruang ah an zamnak lampi ah an nunnak a liam. An mah pahnih le Rakhine minung pakhat an zamnak lampi ah an nunnak a liam hi a si tiah an chim.

Kan ram harsat le chungkhar pawcawmnak ruah ah kan fanau, kan farle kum notete tampi Malaysia, Singapore, China le Macau ti bantuk ah sin um rian ttuan le Kuli hlawh in tampi an kal hna. A luancia caan zong ah tampi nih vanchiatnak an rak ton cang. Tutan kan far le pahnih an ton mi thil ruah tikah thinlung a fak tuk hringhran. Tantak mi chungkhar pahnih nih hnem hram hna seh.

Ref: IHBURLEN Source: VOM