Israel ah Lai Siangngakchia pawl Buainak Nganpi an ton cang

“Ramat Negev International Training Centre fo Advanced Agriculture” program in Israel ram ah Cinthlak nak lei fimnawk a cawng cuahmah liomi hna Falam Siangngakchia pawl cu Covid-19 boruak ruang ah harsatnak an tong ngai cang tiah theih asi. Covid-19 pulrai le Lockdown ruang ah khuachung zong ah an chuakvak kho lo i an duh herh zong tha tein an i cawk khawh lo pin ah Bank i Phaisa chuah a herh zong ah harsat nak an tong ngai ti a si.

Harsatnak an ton mi kong he pehtlai in Israel ram ah sianginn a kai lio mi Salai Tha Van Thawm nih ” Khuachung chuahvah khawh lo dirhmun a simi Lockdown hi a harsabik cu a si ko. Khuachung zong ah kan kal kho lo. Phaisa chuah a herh caan zong ah harsatnak kan tong ngai. Khuachung chuahvah ahcun Asian minung cu thleidan le tihram nak kan tong pah tawn. Atu hi kan sianginn kai mi Program cu a dih cang nain Laitlang lei zong ah kan tlung kho lo i cu ruang ah course a dang pakhat an kan tuah piak tthan hi cucu kan kai nolh tthan. Cu zong cu October thla ah a dih ding a si. Bomhnak ti bantuk cu khuazei hmanh in kan hmuh mi le kan don mi a um lo” tiah CH Daily News sin ah a chim.

Eidin le umnak kong he pehtlai in “Atu Cinthlaknak kan cawn mi program ah hin cun sianginn lei nih umnak ti bantuk cu an kan pek mi a um lo. Mirum pawl sin ah rianttuan bomh in an inn ah an kan um ter mi a si. Cu ruang ah Eidin le umnak kong ahcun kan Pu le pawl tawlrel nak tang ah kan thudir ko. Cun rianttuan kan bomh mi phaisa tucu sianginn man ah kan pek” tiah Salai Tha Van Thawm nih cun a chim fawn. Hi Cinthlaknak lei kong cawnnak program hi thla 11 chung kai mi a si i Falam khua chung in minung 3 ( nu 1 le pa 2) an rak kal. Kum 2019 August thla in an rak thawk mi a si i kum 2020 June thla ah a dih cang nain Covid-19 boruak ruang ah tlung khko loin an um hi asi.

“Laitlang lei ah tlun hi kan duhtuk hringhran cang ko. Tulio boruak ruang ah zeitik tiang dah tlung kho loin kan taan rih lai timi zong chim awk a ttha lo. Thailand ram lei Airport an phih peng rih tikah tlunak ding lam cu a um rih lo bak a si ko” tiah Salai Tha Van Thawm nih cun CH Daily News sin ah a chim hi a si.

Note: Hi thawngpang hi Falam Online media nih a tial mi asi. Halkha holh in kan rak leh chin tthan mi asi.(VOM)