Malaysia in a tlung mi Salai Benjamin AA hriamtlai nih an tlaih ai

Malaysia Chin ralzam tlangval Salai Benjamin cu Kawlram a tlun tlawmpal ah AA hriamtlai nih an tlaih ve tiah theih asi. AA hriamtlai nih Chin tlangval minung (4) an tlaih mi hna lak ah Malaysia in a tlung mi Salai Benjamin zong aa tel ve hi asi.

Hi kong he pehtlai in Mizzima News nih ” Malaysia in a tlung mi Chin tlangval pakhat telh chih in Paletwa peng Chin ralzam caah a cawlcang mi, Chin mino (4) hna cu July 29, 2020 ah Rakhine ramkulh, Kyautdaw in Chin ram, Paletwa lei an tlun pah ah AA hriamtlai nih an tlaih hna i nihin tiang an thawngpang theih a si lo” tiah a tarlangh ve.

AA hriamtlai nih an tlaih mi hna Chin tlangval minung (4) hna hi Rakhine ramkulh in Chin ram Paletwa lei an tlun pah ah a si. Sami khua lei in rak rat loin aa naih deuhnak, lam dang in an rak ra i cu ahcun AA nih an tlaih hna hi asi. AA nih an tlaih hna timi mit hmutu (Eyewitness) an um ruang ah kan chim mi a si Khumi Affairs Coordination Council (KACC) upa a simi Mai Nan nih a chim hi a si.

“AA hriamtlai nih an tlaih mi pawl hna cu Salai Benjamin, Salai Aung Soe, Salai Aung Htun Ko le Salai Khin Maung Htun hna an si. Salai Benjamin hi a luancia thla(4) ah khan Malaysia in Kawlram ah a rak tlung mi a si. Malaysia ah ralzam dirhmun in a rak um nain a luancia thla (4) ah khan kawlram ah a rak tlung tthan. Cun Salai Aung Soe, Salai Aung Htun le Salai Khin Maung Htun hna hi Paletwa lei Chin ralzam caah biatak tein a cawlcang mi, ralzam bawmtu chungtel an si” tiah Mai Nan nih cun Mizzima sin ah a chim.

Tutan ah AA hriamtlai nih an tlaih mi hna Chin mi tlangval minung(4) kong he pehtlai in AA hriamtlai sin ah hlathlai nak zong tuah kan duh ko nain Kawlram phung ning ah Cozah nih apom lomi hriamtlai phu he aa pehtlai mi cu Unlawful Association Act in tlaih le taza cuai an si tawn caah zeitin hmanh in khua mi nih AA sin ah hlathlai nak kan tuah ngam lo tiah an chim fawn. Nihin tiang an thawngpang zong an thei lo i AA hriamtlai nih khuazei lei ah dah an hruai hna timi le an thi maw an nung dah timi zong an thei kho lo. Ref: Mizzima (VOM)