Sui Hlei Tial Ruak Fimtawlnak Kong He Pehtlai In. Cattial tu: Salai K. Biak Lian Thawng

Nai kan naunu Malaysia ah a thi i Thantlang ah an rak tlunpimi nungak Sui Hlei Țial ruak kongah Thantlang uktu pawl nih kan miphun, Chin miphun cungah an thil tuah le an kan tuahto ning ruah ah lung a fak i ngaih a chia hringhran ko. Ukmi, mipi zalong tuk i chiah hi uktu caah a har ngaingai. Cu bantukin cun uktu hna kha zalong tuk in chiah i an chimmi paoh lu i khun i zulhpiak zungzal hi a hnu a hnu ah cun ukmi, mipi caah a har ngaingai ve i ngaihchiatnak le buainak a si ve țhiamțhiam tawn. Cucaah cun ukmi, mipi nih uktu hna kha a herh ningin tuah to, țuanvo laak ve i rengh an herh ve ti kha kan hngalh zungzal ding a si.

Kawl miphun cu kan doh kho bal hna lai lo hme cu, kan doh hna ahcun an kan hrawh chinchin sual lai hme cu. An lung tu tluanh kan i zuam lai kan ti chung paoh kawl pawl an thazaang a țhawng lai i an kan namneh in an kan nihsawh zungzal lai. Chin miphun hi miphun hmete si hmanh u sih law kan lung aa rual ahcun atu lio a kan uktu kawl miphun an thazaang a der lai ti hi kan hngalh zungzal ding a si.

Chin miphun hi kan lung i rual seh law khoika hmun hmanh ah kawl pawl an ral a chia lai. Chin miphun kan lung aa rual lo ning an kan hmuh ruangah an ral a țha tuk. Cucaah an duhmi paoh an kan phih khar ngamnak hi a si. Kan duh le kan țhutter hna i kan duh le kan dirter hna an ti lai i an lungchung cun an nih kan chuak ziar ko lai cuh.

Kum 2002 lio Shan ramkulh Mongton myo (မိုင်းတုံမြို့) ka rak um lio ah hin Mongpan (မိုင်းပမ်မြို့) i palik bawi, sakhanhmu pa hi a rak sual taktak. Hlan lio Thantlaang ralkap bawi Khin Maung Ye bantuk kha a si. Cu palik bawi bohnih pa cu a umnak Mongpan (မိုင်းပမ်) khua mi, Shan miphun pawl kha a herh lo ah a tlaih hna. Keimah palik bawi sakhanhmu theihter loin zeihmanh nan tuah kho lo a rak ti hna i khua mi an awlok a rak chong hringhran. Cucaah shan mino pawl (Shan miphun Mongton mino bu kan ti lai cu) nih palik bawipa a kalnak paoh an zulh, an hlat i amah lawng a um lio ah an tlaih. An i kalpi i an thah, tan thum ah an tan. A hngawng an cik, a tai an cik i zaanțim ah cun palik sakhan luhnak lam ah a lu a dang a tak a dang a taitang a ke a dang cio in palik nih hun hmu te hna seh tiah an chiah ta i an kaltak diam. Ahohmanh nih mi zei nih an thah ti kha atu tiangin hngalh khawh a si thai lo.

Cu hnu thok in palik bawi an si ah siseh, ralkap bawi an si ah siseh, a dangdang kawl bawi pawl kha Shan ram nichuahlei i an vun chiahmi hna paoh nih Shan miphun cu ti ngam ding phun an si lo, an lung pei aa rual tuk hi an ti i kawl miphun ahohmanh an cawlcang ngam hrimhrim ti lo. Baibal tuanbia kan zoh a si ahcun Israel mi hna khi miphun hmete an si ko, nain an lung an i rualnak nih thazaang ngan pi ah a ser hna i an thazaang a țhawnter hna ti kha kan hmuh. Cucaah Izip uktu Faro thazaang a der chin thluahmah i a donghnak ah cun an ram, Izip ram in a chuahter hna. Cu bantukin cun Chin miphun zong hi kan lung i rual u sih law Chin ram chungah uktu pawl hi zei miphun an si hmanh ah anmah duh in an cawlcang ngam in khua an khaang in an um ngam naisai lai lo.

Cucaah cun Chin miphun hi miphun dang nih nihsawh thlanglamhmi le zawmhteihmi, zeirellomi, namnehmi le neek ngai in an duhmi paoh fial i tuahtermi miphun kan si khawh lo nakding ahcun khua le ram peng le tlang lawng țanh kan hman lengmangmi kha kan hrial cio i kan dihlak lungrual tein kan dirți a herh hringhran ko cang. Chin miphun kan dihlak in kan lung aa rual lawnglawng ah kan thazaang a țhawng lai i miphun dang, kawl miphun an thazaang a der lai. Dinnak kha a cat lomi tiva bantukin luanter camcin ko u (Amos 5:24). Cattial tu: Salai K. Biak Lian Thawng Source: Hringdildel Website