US Lai Cakei Pawl zam dih an i tim maw?

Naga paih thawng pahnih hna cu US a phan ding tiah timhtuahnak an ngeih cuahmah lio a si bantuk in US laipa pawl zong an i ready tuk cang lai tiah zumhnak a um. Naga paih thawng pawl hi US an van phanh taktak cun Laipa pawl nih an pai ngam tak tak hnga maw? ti hi ruahawk tampi a um. Zam dih hna an i tim lai maw? Nagaland ram i champion bak an si bantuk in fawi te cun paih pi awk an tha lai lo. Cucaah biatak tein timhlamhnak an ngeih a hau lai. Naga paih thawng pawl hi US laipa aho dek nih an tei sual cun minthang ah an i chuah colh ve lai.

Kan theih bantuk in World Piah Championship Committee tawlrelnak in US ram i July thla ah paih tuah dingin timhlamhnak ngei tiah kan theih. Hi paih an an tuahnak ah hin ramdang dang in aa tel ding zong an tam ngai tiah theih a si. Ramdang cio in a tel ding hna zei maw zat cu Air ticket zong tlamtling tein an I cawk cia cang an ti.

Cun Worl Paih Championship nih Naga lei in paih thawng pahnih, Tukum an champion pa le Rung Lian Ceu semi final a teitu pa le an pu le zong visa an sawk cuahmah lio a si I, visa an hmuh khawhnak hnga thlacamnak in bawm cio hna u sih. Naga Paih Thawng Pahnih Le An Pu Le Visa An Hmuhnak Hnga Thlacam Bawm Hna U Sih! Cun  US Lai Pathawng zong GYM An La Taktak Cang Hih Ngaih AUm Ko.

Hi kong he pehtlai in US lai kan lai pathawng pawl zong an um sawhsawh kho ti lo I, ka kenkip loin GYM an la cio tiah theih a si. Tutan I, Naga pathawng pawl nih an kan tei ahcun a poi tuk ding a si. Taisawm le $ Zei mawzat an I tlun pi ding cu kan lai pathawng pawng nih an ruat kho hrimhirm lo tiah US upa pakhat sin in kan theih.

Rung Lian Ceu zong a tu hi GYM a la peng ve tikah a mah a teitu Naga pathawng an rak phanh tikah cun a um kho bel lai lo i, aa pai than ko lai tiah zumh a si. Hi kong belte cu a mah Rung Lian Ceu sin in theihmi a si rih lo. US upa pakhat nih a mah a ruahnak a kan chimh chihmi a si.

Source: Chin 11 News

Hi kong hi rel chap.

Rung Lian Ceu hi Champion Tak Tak cu a Si.

Rung Lian Ceu hi Champion tak tak cu a si. Laimi thinlung ahcun champion bak a si. Tutan ah a voi 12nak Open Naga Wrestling Meet 2019 cu a ropui ko. Laimi in Round 1 teinak a hmumi hna cu Rung Lian Ceu, Hran Tin Thang le Mang Hnin Thang hna an si. Naga paih zuamnak i Lai Pasal hna lakah Round 2 nak in teinak a hmumi hi Rung Lian Ceu amah bak lawng a si rih. Paih min aa pemi Naga le Kala minung 60 leng i Paih thiam bik (the best tactic wrestler) laksawng ah Rs. 10,000 tiang a hmuh hi a sunglawi tak tak.

Rung Lian Ceu hi pe 5’8, kg 97 lawng asinain amah nak i a nganmi tampi a tei hna. Culawng si loin Naga paih thiam miphun hna lak i Open Naga paih zuamnak bak i Semi-Final tiang a phanh khawh hi a za tuk hringhrang. Rung Lian Ceu bantuk paih thawng hi laimi hna lakah an chuak ti lai maw ti hmanh ruahawk a tampi.

Nagaland State hi India ram ahcun Paih a thiammi le ramdang dang (International) tiang i paih ruang i a phanmi tamnak state bak a si. Northeast,India State 8 hna lakah Nagaland State tluk i Paih lei i minthang hi an um lai lo. Nagaland milu hi ting  22.8 (lakhs) bak an si. Hi vialte Naga minung paih thiam lak i Semi-Final tiang a phanh lawng siloin 2 runner up (Pathumnak) a si i a men hrim hrim lo.

Tutan ah Rung Lian Ceu nih 2 runner up (Pathumnak) lukhuh an i cuh lio ah Naga paih thawng Vekuyi Medeo bak a tei. Vekuyi Medeo hi Rung Lian Ceu nih a tei i Rung Lian Ceu cu pathumnak ah phuan a si. Pathumnak laksawng India tangka Rs.1 lakh ($1425.42) bak a hmuh.

Tutan ah Rung Lian Ceu nih a pai pi mi pawl Naga Cakei pawl min le sinak kan van langhter lai i Laimi thinlung ahcun champion a si nak a van i fiang ngai lai. 

Riikukhoto Khusoh: Rung Lian Ceu nih Riikukhoto Khusoh hi fawi tak tak in a tei i First Round in Round 2 bak a kai.

Kubere Nyekha : Rung Lian Ceu nih Kubere Nyekha cu Second Round i a tei caah Second Round a phan. Hi pa hi Naga paih thawng a si ve. Hi ruang ah Pre-Quarter final tiang bak a phan kho.

Dzieselatuo Keretsu :- Cun Rung Lian Ceu nih Pre-quarter final ah Naga Paih thawng le champion tiang a rak sibalmi Dzieselatuo Keretsu bak a tei rih. Dzieselatuo Keretsu hi 2017 kum i Naga Open Wrestling Champion bak a si i, cun 10TH INTERNATIONAL HORNBILL NAGA WRESTLING 2016 ah Champion a si fawn. Hi pa bak hi a tei.

Kekhriezo Nagi

Cun Quarter final ah Rung Lian Ceu nih Naga paih thawng le champion Kekhriezo Nagi cu a tei tthan i Semi-Final bak a phan. Kehhreizo Nagi hi Naga Paih thawng minthang bak a si ve. A voi 46 nak Western Angami ‘D’ Sports Association (WADSA) wrestling meet 2018 i Champion bak hi Rung Lian Ceu nih a tei i Semi-Final tiang a phan.

Vekuyi Medeo

Vekuyi Medeo zong hi Naga paih thawng  minthang thiam thiam a si. Rung Lian Ceu nih a tei i pathumnak dirhmun tiang a phanh khawh nak hi a si.

Venuzo Dawhuo.

Naga cakei ‘The Naga Beast’ ti tiang kawhmi pa Venuzo Dawhuo le Rung Lian Ceu hi Semi-Final ah an tong. Hi Naga cakei hi. Kg 92 a si i feet 5’10 in a sang. State Level Indigenous Open Wrestling Competition (2018) ah champion bak a si fawn. Venuzo Dawhuo nih Rung Lian Ceu a tei ning cu kan theih dih ko lai. Vanchiat tak tak khi a si. Venuzo Dawhuo nih Rung Lian Ceu a tei ning ah a lungtling set lomi le aa cenat lomi an tampi lai. Rung Lian Ceu hi i pai than se law ti tiang a duh tu kan tampi lai. Tutan Semi-Final i Naga Cakei nih Rung Lian Ceu a tei khi vanchiat deuh khi a si.

Menuosetuo Yiese.

Tutan i a voi 12 nak Naga Open Wrestling Championship 2019 i teinak hmutu cu Menuosetuo Yiese timi pa hi a si. Naga cakei Venuzo Dawhuo he final ah an i phomh. Menousetuo Yiese nih teinak a hmuh i Champion ah phuan a si.Menuosetuo Yiese hi Naga paih thawng bakmi a si ve. Kg 118 bak a si i pe 6 bak in a sang fawn. Naga paih thawng champion peng  tawnmi Venuzo Dawhuo zong nikum December 4, 2018 khan a rak tei i  12th International Hornbill Naga Wrestling Champion a si. Hi lawng siloin nikum i tuahmi 26 Naga Wrestling Meet (2018) ah champion a si cang fawn.Hi pa hi a men hrim hrim ve lo.

Rung Lian Ceu hi Laimi caah cun champion tak tak cu a si ko. Laimi caah champion a si hrim hrim nak a ruang ka van langhter rih lai.

Lai Paih le Naga Paih aa Dang Tuk.

Lai paih le Naga paih hi paih cio cio an si nain an Paih phung (rules) hi an idang ngai ngai. Hi ruang ah Naga nawlngeitu hna nih an theih tikah Rung Lian Ceu Naga paih a cawnpiaktu ding ah Coach tiang pek a si.Vawleicung ah paih phun tampi a um ko lai. Miphun hoih cio nih paih phung  (rules) dang deuh tete an i ngeih dih hna. Hi tluk Lai paih le Naga paih aa dangmi ah a voi 12nak Open Naga Wrestling Meet 2019 bak i 2 nd runner up tiang a phan khawhmi hi Laimi caah cun champion a si ko.

Rung Lian Ceu nak i a nganmi Naga Paih Thawng minthang lawng te a tei hna.

A cung lei kan langhter cang bantuk in tutan Rung Lian Ceu he aa paihmi pawl hi  amah nak i a nganmi Paih thawng tampi an i tel cun Naga cakei minthang lawng te an si. Paih ah hin thazaang zong hi a biapit nak tampi a um. Tutan Naga paih hrim hrim ahcun thazaang tampi chuah hau phun a si. Hi bantuk paih phung (Rules) pawl hi Rung Lian Ceu caah a thar bantuk a si. You Tube tibantuk hna in zoh hmanh se law a tak bak i Naga paih thawng pawl he van i phomh colh hi a fawi lo. Asinain hi vialte lawnh dih in voi 12nak Open Naga Wrestling Meet 2019 bak i 2 nd runner up tiang a phan khawhmi hi Laimi caah cun champion a si ko. Hi lawng si loin Paih thiam bik (the best tactic wrestler) laksawng a co hi a sunglawi ko. Paih thiam bik (the best tactic wrestler) laksawng ah Rs. 10,000 bak a hmuh rih. Laimi caah ahcun champion tak tak a si.

Note: Na lung a tlin cun Comment van pe ve tuah. 

Tuni Naga paih Final le Pathumnak kawlnak Video a tanglei ah a um lai.

Photo Credit: Salai Tin Cun Lian & The Chinland Post

Leave a Reply

Your email address will not be published. Required fields are marked *