US Lai pa pawl nih Naga Cakei an Tei Lai tiah zumh a si Cang – Salai Kawltu

US Lai pa pawl nih Naga Cakei an Tei Lai tiah zumh a si Cang

Note: US Lai pa pawl nih Naga Cakei an Tei Lai tiah zumh a si Cang. A ruang cu a tanglei bik ah ka langhter.

Tutan Paih kan hmuh dingmi cu zoh a nuam chin lengmang ko lai. July 13 i tuah dingmi ah timhtuahnak tampi a um tiah thawng theih a si. World Paih Championship nih an tawlrel ning hi a tha chin lengmang ko. Tukum February thla khan US Lai paih Champion a simi Rung Lian Ceu le WPC hruatiu hna cu Naga ram ah ipai dingin an kal. Naga paih ning phung (rules) asinain semi final tiang bak a va phan kho. Cu lawng siloin paih dawhbik lawng tiang bak a hmuh khawh rih.

Thawng kan theih ning ah a voi 4nak WPC paih zuamnak ah hin Naga paih thiambik champion le a changtu hna cu WPC nih a tuah dingmi paih zuamnak ah hin special in sawm an si. Hmaizarh khin visa an lut lai tiah theih a si. Hi lawng siloin Laimi umnak ram dang dang zong in a ra ding an si. New Zealand, Sweden,Denmark le Canada tibantuk zong in Lai paih thawng pawl an i tel lai tiah thawngtheih a si.

WPC lai in Naga paih thawng US a phan dingmi min hi an langhter lem lo nain tutan Open Naga paih i champion Menuosetuo Yiese le Semi i Naga cakei Rung Lian ceu a teitu Venuzo Dawhuo hna hi si dawh an si ko.

Menuosetuo Yiese le Venuzo Dawhuo kong hi tlawmpal kan van zoh ta lai.

Menuosetuo Yiese.

Tutan i a voi 12 nak Naga Open Wrestling Championship 2019 i teinak hmutu cu Menuosetuo Yiese timi pa hi a si. Naga cakei Venuzo Dawhuo he final ah an i phomh. Menousetuo Yiese nih teinak a hmuh i Champion ah phuan a si.Menuosetuo Yiese hi Naga paih thawng bakmi a si ve. Kg 118 bak a si i pe 6 bak in a sang fawn.

Naga paih thawng champion peng  tawnmi Venuzo Dawhuo zong nikum December 4, 2018 khan a rak tei i  12th International Hornbill Naga Wrestling Champion a si. Hi lawng siloin nikum i tuahmi 26 Naga Wrestling Meet (2018) ah champion a si cang fawn.Hi pa hi a men hrim hrim ve lo.

Venuzo Dawhuo.

Naga cakei ‘The Naga Beast’ ti tiang kawhmi pa Venuzo Dawhuo le Rung Lian Ceu hi Semi-Final ah an tong. Hi Naga cakei hi. Kg 92 a si i feet 5’10 in a sang. State Level Indigenous Open Wrestling Competition (2018) ah champion bak a si fawn. Venuzo Dawhuo nih Rung Lian Ceu a tei. Rung Lian Ceu hi i pai than se law ti tiang a duh tu kan tampi lai.

US Lai pa pawl nih Naga Cakei an Tei Lai tiah zumh a si Cang

US Lai pa pawl nih Naga Cakei an Tei Lai tiah zumh a si Cang. A ruang cu tutan Lai paih rules le naga cakei pawl an rak i paih tawnmi rules hi aa dang tuk. Tutan July 13 WPC nih an timhlamhmi paih ah  hin Lai paih rules bak hman a si zumh a si. Rung Lian Ceu zong naga paih rules bak in aa phomh ve caah tutan naga cakei pawl zong hi lai paih bak in paihter an si zumh a si. Cucaah US Lai pa pawl caah Naga cakei hi an tei hrim hrim lai ti zumhnak tampi a um.

Lai Paih ka timi le Nagaland paih hi a rak i dang tuk hringhran. Tahchunhnak ah Laimi cu kan i paih tikah kan hmailei i kan tlak i kan bawh a si ahcun sungh a si lo, Nagaland ahcun kan hmailei i kan tlak i ka bawh i kan ttang nih vawlei (stage) a tongh a si ahcun sungh bak a si ko. Cu lawng siloin kan liang nih vawlei (stage) a tongh a si zong ah sungh a si. Hi bantuk paih phung (rules) hi laimi nih kan tuah bal lomi a si tikah iranrin lo pi i kan um sual a si ahcun sungh sual a fawi tak tak. Kan ttang maw kan liang lei hna i kan tlak sual ahcun sungh bak a si colh.

Lai paih ahcun ka bawh cang hnu ahcun  referee nih pitpit a tum i kan i thlah. Asinain Nagaland lei paih ahcun an ttang maw an liang lei i an tlak tikah vawlei (stage) kha a tongh lo nak ding ah an kut in heh tiah an ttang chih. Cun khat lei Pa nih vawlei (stage) a tongh khawh i a sungh khawh nak ding ah hngawng (neck) tiang i dih le hmehpiak khawh  a si.

Thazaang tampi chuah zong ah hau. Lai paih bak in iphomh ding a si caah naga cakei pawl nih hin an i ziak lem ve lai lo. WPC Chairman Pu Ang Cung nih Naga Paih Rules Kong a Chimnak video zong a tanglei bik ah um lai.
WPC Chairman Pu Ang Cung nih Naga Paih Rules Kong a rak Chimnak Video tanglei ah hin a um lai.

 

Leave a Reply

Your email address will not be published. Required fields are marked *