Hriamtlai CNF/A Hmanh Cawlcangh Kho Loin An Um Lioah Lai Meithal Tlaih in Mipi Nih Kawl Ralkap Biatak Tein Tuni Tiang An Kah Ve Hna!!

Gangaw-Kalay Karlak ah Nizan in Atu Zing Tiang an i Kap.

No photo description available.

March 29 thawk in Gangaw-Kalay lamthluan cung ah a ummi khua pawl ah Lai meithal aa tlaihmi mipi le Myanmar SAC ralkap kahdohnak aa thawk i nihin March 31 zinglei zong ah pehzul in an i kap, tiah thawng kan theih. Nizan zanlei ah khan Hmandaw khuataw ah a ummi Kabarni donhlei ah le Hantharwadi pawng hrawnghrang ah an i kap hna.

Nizan an i kahnak ah mipi lei in minung pahnih an thi. Hantharwadi palik sakhaan pawng ah pa pakhat ralkap nih an kah i a nunnak a liam. Cun, Taungkhinyan khua pawng ah a dang pa pakhat a nunnak a liam tthan. Hantharwady ah a ummi hna sin in The Chin Journal nih thawngpang fek kan theih ning ah Hantharwady khua pawng i palik sakhaan cu mipi nih an khangh i, palik le ralkap pawl an zaam.

Cun, nihin zinglei ah Gangaw le Kan khua karlak ah mipi lei nih ralkap motor pakhat an khangh. Nihin zinglei an i kahnak ah ralkap nih Machin Gun le Bomb tibantuk an hman caah mipi lei hliam a pumi an um len. A thimi zong a tlawm bik minung pathum an um. Ralkap lei in a thimi le hliam a pumi zong an um tiah an ti nain fiang ngaingai in fehter khawh a si lo.

Crd- The Chin Journal