Karen Ralkap An Cawl Ve Cang! Uar An Um Kho Tak Tak Si.

Karen Ralkap KNU nih a mi hna cu Palek le Kawl Ralkap nih harnak an pek hna nak hnga lo a cawlcang ve cang.

Ralkap nih hram hram in uknak an i cuh hnu ah Kawlram Pumpi cu a khuaci a mui. Uknak duh lo nak cu ramkip ah a um mi Kawlram mi nih an langhter. Ramdang hna zong nih mah bantuk Democracy ram ah uknak hram hram in i cuh than cu an duh ve hrim hrim lo.

Saturday thok khan biatak tein Kawlram ah Leng chuah in Ralkap uknak duh lo nak langhter nak cu Sandah piah in an thok. Ralkap ral chanh in mah ti hin sandah piah hi tih a nung tak tak mi thil a si ti hi theih cio cu a si. Sihmanhsehlaw hram hram in uknak laak an i timh mi hi a hmaan hrim lo tiah Mipi ralthatnak ruangah an doh ngam ve mi a si.


Sandah piah hram cu an thok cio hna tikah, Karen Ralkap KNU zong cawlhram ai thok ve cang. Mipi, palek le Ralkap nih harnak an pek hna ahcun kan leh colh ve hna lai ti bakin Meithal le an Mawtaw he anmah Karen lam pawl ah an i chawk thluahmah cang. Mipi dawtnak le zawn ruah nak an ngei ti cu mah nih hin fiang tein a langh ter. Uar an um law law Ram le Miphun thatnak caah tiin nun pek ngamh tiang in an cawlcang mi hi cu upat lo awk a tha lo.