Mindat CDF le Ralkap An Biaruahnak Tlamtlin lo ruangah an i kap than colh.

Kawl Ralhrang le Mindat CDF hna cu tuchun ah khan kah ngol chung dingin bia an rak i ruah hna. Mindat CDF le SAC ralkap karlak ceihmainak a tlamtlin lo caah tu zaanlei sml. 6:00 hrawng in an i kap tthan. Peng/myone dang zong nih SAC ralkap pawl doh ding in Mindat mino nih forhfialnak bia an chim.

Mindat khuami le ralkap kahdohnak chikhat ngol in kaphnih chimhchawnhnak a tlamtlinlo ca ah April 27, 6:30 PM hrawng in an i kap than, tiah kan theih.

“Meithal aw hi pehtlai cun kan thei lo nain kahnak aa thok than ti cu an chim cio. Cun, ralkap he kaphnih chimhchawnhnak (biruahnak) zong a tlamtlinglo,” tiah khuami pakhat nih The Hakha Times ah a chim.

Khuami pakhat thiam nih, “An i chimhchawnh mi hi ralkap lei nih khualeng um an minung khuachung luhnak nawl an hal hna i khuami dih an duhlo. Khuami nih tlaih mi thlah dih ding le ralkap nih hmunhma an laak (umhmunkhuar) mi chuahtak ding an hal ve nain tlam a tlinlo ca ah an i kap than. Tuzaan April 27 zaan cu zaankhuadei i kah dawh in um a si,” tiah The Irrawaddy ah a chim.  Mindat khua kahnak hi April 26 in aa thok i April 27, 7:00 PM tiang ah ralkap 16 an thi cang, tiah kan theih.

Crd- The Chin Journal.

Relchap: Delhi ah COVID-19 in Laimi Pakhat a Nunnak a Liam, Chin Ralzam 100 Hrawng Zawtnak an Ngei

March 25 hrawng in India ram ah COVID-19 zawtnak a voi 2nk a hun tlung tthan i Delhi khuasa Laimi pa pakhat zong COVID-19 in a nunnak a liam, tiah Delhi CHRO ah Coordinator a simi Salai Cung Dawt nih The Chin Journal ah a chim.

Salai Cung Dawt nih, “Delhi khuasa Chin ralzam chung in COVID-19 zawtnak a ngei kan tam ngai. Zawtnak a ngeimi zapi ah 100 dengmang an si. COVID-19 zawtnak a ngei lai tiah zumhmi dang zong an um nain ttha tein an chim lo caah cu pawl cu kan relh hna lo. April thla chung ah Laimi chung pa pakhat COVID-19 in a nunnak a liam,” tiah a chim.

Delhi Chin ralzam kong a telreltu CRC nih UNHRC ah COVID-19 runvennak sii a hal lengmang nain bialehnak a um lo caah Delhi Chin ralzam pawl COVID-19 sii zong an i chun kho lo.

“A poimi cu COVID-10 runvennak sii hi kum 45 cunglei pawl cu India cozah nih a chunh cuahmah ko hna nain Refugee Card lawng a ngeimi cu a ngah lo tibantuk a si. Cucaah, Laimi chung in sii aa chun khomi zong kan um rih lo. UNHCR ah cun CRC nih request a tuah peng nain zeihmanh bialehnak felfai an kan thanh kho rih fawn lo,” tiah Salai Cung Dawt nih a chim chap.

Delhi khua Lockdown zong tuah a si cang i, ahohmanh lengchuah in rianttuan khawh a si ti lo. Chin Refugee pawl eidin kong ah CRC nih UNHRC ah bawmhnak zong a hal nain Lockdown caan a si caah bawmhnak a pe kho rih hna lo.

Delhi ah Chinmi ralzam chung in minung 100 hrawng COVID-19 zawtnak a ngeimi an um nain sizung ah mi an khah dih cang caah zawtnak ngei Chin ralzam 90% hrawng hi cu inn ah anmah tein an i thlop, tiah Salai Cung Dawt nih a chim.

Crd- The Chin Journal