Mizo le Mizo holh kan hua kan ti maw? Mizo Unau nih Chin Unau mah tluk akan buaipi mi hi kan chamh kho te hnga maw?, kan sual kan palh zong ah akan ngaithiam mi hi asang tuk hringhran ko,

Mah pic hi nihin 24.9.2021 ah S.Vanlaiphai khuachung dih lak nih Chin Unau ral zam mi hna umnak caah, In akan sak piak lio mi asi, kum 80 leng asi cang mi hna zong nih atu bantuk tlang rian ah Chin Unau dawtnak langhter in akan tuan piak rih ko hih! Bawipa tu nih zungzal in zungzal tiang thluachuah coter hram ko hna seh, timi hi kan chim khawh tawk asi ko.

Kanram uknak athat lo ruang ah nun himnak ding ah cun, kan duh zong ah duh lo zong ah kan Unau taktak asi mi Mizoram ah loh cun zamnak/kalnak ding dang kan ngei lo e, Mizoram hmun kip le keng kip ah VC le YMA hna nih khawchak ralzam mi zangfahnak le dawtnak he, nakan zohkhenh nak ah tangka nan dih tha le zung nan dih, nan mah rian hna kal tak in, nun himte in khuasak kho nak ding ah Chin Unau caah mah tluk in maw nakan dawt, ruahnak nih aphan kho lo tiang kan cung ah pum nan pek hna ka hmuh tik ah ka mit thli aluang ko e.

Thisen peh Nan unau Chin mi hi kan umnak ah siseh, kan kalnak ah siseh thil kan theih lo ruang ah sualnak le palhnak zong tampi kan ngei ko lai, mah zawn zong ah nan lungput apui tling taktak ko, theihthiamnak thukpi nakan ngeih piak khawh hna hi a ropi taktak ko, atu tan ah Mizo ram mipi dih lak in Chin Unau dawtnak nan langhter pin ah, Acoyah lei siseh theihthiam ngaingai in Central acoyah tiang kan harsatnak kong na kan chim piak, NGO’s dang dang hna nan cawlcang ceu nak ah lawmhnak bia chim cawk asi lo, mah vialte hna hi Chin Unau nih zei tik hmanh ah kan chamh kho ti lai lo, mah nih hin Unau kan sinak tuan bia thar akan ser piak khi asi.

Atu ah hin Chin unau hi Mizoram chung hmun dang dang hna he adih lak in minung 15,000 hrawng kan um cang tiah local lei report ning in theih asi, atu hnu zong ah tampi nun him duh ah arak zam mi atam rih ko lai tiah ruah asi, zei asi zong ah nan unau Chin mi cung ah dawtnak nan langhter law law cang caah, ara lai acan hna zong ah nan zohkhenh cawk lo tiang thil aphan kho mi asi, mah lio can hna zong ah lung sau tein nakan buaipi lawlaw lai caah le asi khawh chung tein lam nakan hruai piak thiamthiam ding ah nan cung ah mawhphurnak tampi a um rih ko lai, Pathian fa kan si bantuk tein dawtnak he nakan dawn rih aher ko lai, Bawipa tu nih nanruah nak le khawkhan lairelnak ah lam hruai ko hna selaw tiah Chin Unau nih zangfah nak tein kan nawl than hna.

Kan Bawipa Pathian nih thluachuah mi Mizoram lo cu, Chin mi nih himnak hmun dang kan ngei ti lo, na kan duh zong ah nakan duh lo zong ah khawika hmanh kalnak dang kan ngei lo caah, kan unau Mizoram ah thiamthiam asi ko, Aw zoram Unau hna nan mah sin long ah hna ngamnak a um cang, hna ngam nak ding hmun dang kan ngei ti lo e, rakkan ngai thiam hramhram ko ne u.