Mizoram Le Assam Buainak A Linsa Taru Tuk Cang.

Mizoram le Assam buainak cu a linsa taru tuk cang. Raldoh kho dirhmun ah an dir cang. An buainak kong tha tein theih tik ah Assam cozah hi an sual taktak. A tanglei bantuk hin an buai ning cu kan van langhter.

Zahan nai khan Mizoram Mamit District chung i ummi Thinghlun khua ah Assam lei cozah nawl ngei tu hna cu an rak ra i Pu Zolawm thlam cu an khangh piak dih. Cu lawng siloin an kuva kung zong an hrawh piak dih fawn. Assam lei in Mizoram rak ra pawl hi Minung 100 hrawng an si. Pu Zolawm le Pu David ram cu an duh paoh in an tuah piak hna. Thlam an khangh piak hnu hin Assam lei cu an ram lei ah an tlung than.

Mizoram leiin Army zong duty dingin chiah ve colh an si. Tuni khan Assam leiin Palik pawl an rak ra than. Asinain Mizoram lei Duty pawl nih raltha ngaiin an meithal i put mi he an rak dir hnawh hna. Hi bantuk in Mizoram Army pawl an duty tik ah Assam palik pawl nih an naih ngam ve lo. Assam palik pawl cu an ram lei ah an kir than hi asi.

Thinghlun Khua hi Mizoram Mamit District chung i ummi a si. Assam le Mizoram i ri tak pawng i ummi an si fawn. Assam lei hi bantuk i an van cawlcangh nak a ruang bik cu Thlinghlun khua hi kan ram a si tiah an van ti caah asi. Asinain Mizoram lei nihcun kan ram bak a si, Assam ram a si hrim hrim lo tiah an chim ve fawn.

Mizoram Le Assam buainak hi a linsa chin lengmang caah thinphang ngai khi a si. Mizoram cu kan unau um tam nak a si caah thlazam in bawm cio hna usih.