NLD nih Kawlram Ralkap Biaceihnak zung ah chuahpi a timh!

Yangon:- NLD chungtel in Yangon chung Parliament member thimmi ca i a dirmi Committee nih Kawl Ralkap State Administrative Council cu a ruang um lo in Yangon Ministers le a bia chim tu hna an tlaih hna caah Penal Code, Article 344 tang ning in cozah phunglam a buar a si caah Zung ah chuahpi a timh.

“Ralkap Khuakhawngtu/Nawl ngei tu hna hi kan i timh mi cu a si. A Ralkap Tatmandaw dihlak cu a si lo, an duh nak an i khat dih cio hna lo ti kan zumh ruangah a haotu, Military Council long hi kan chuah pi lai tiah ” NLD, Yangon Cozah ai awh in a dir mi committee chungtel Naw Susanna Hla Hla Soe nih a chim.

A hmaan mi biaceihnak Ralkap hruaitu hna cung ah hin chuah kho dingin Ram chung zung le International zung ah kan chuah pi lai tiah a chim fawn. Zei bantuk Biaceihnak zung ah an aap ti cu zeihmanh a chim rih lo. “Mi zeihmanh hi a ruang lo in 24 hours chung tlaih khih phung an si lo. Zei palhnak hmanh an tuah lo, an cozah rian te an tuan ko, a hmaan lo mi tlaihkhih nak a si” tiah a chim.

Yangon Chief Minister U Phyo Min Thein le ministers U Ye Min Oo, Daw Nilar Kyaw, U Naing Ngan Lin, Daw Moe Moe Su Kyi, Naw Pan Thinzar Myo le Yangon biachimtu U Tin Maung Tun le a bawm tu U Lin Naing Myint hna cu Feb.1 ah khan Ralkap nih an rak tlaih hna. A hohmanh nih ni 11 chung an sin in zei bia hmanh an thei kho hna lo, an chungkhar hna zong zeiruang ah tlaihkhih an tawn ti a ruang zong an chim hna lo.

Penal Code i Article 344 chung ning cun mi pakhat khat, zeiruang dah tlaihkhih a ton ti,  ni 10 chung ah theihkhawh le fianh khawh a si lo ahcun, a tlai tu cu kum 3 chung thong thlak ding tiah cozah phung ah a um. President U Win Myint, State Counselor Daw Aung San Suu Kyi le an Minister hna zong, cu thiam thiam in feb 1 ah an rak tlaih cang hna.

Cozah biaceihtu bu vialte hna zong Min Aung Hlaing kut tang ah an um dih ko nain, Cozah phunglam Penal Code le 2008 constitution hna cu an nung ko, ai hmang kho rih ko tiah Lawyer U Kyee Myint nih a chim.

Cozah phunglam cu a nung rih ko, zei bantuk mi le mibu cung zong ah biaceih ding in chuah pi khawh a si ko. Kan i timh mi hi a awngmin lai ti cu chim ding a um rih lo nain Cozah phunglam cu a nung rih ko. biaceih ding in chuah pi khawhnak nawl kan ngei ko tiah Lawyer U Kyee Myint nih a chim chap.

National Parliament ca i a dir mi committee zong nih Min Aung Hlaing cu Chapter 6 of the Penal Code phung a buar ruang ah Biaceihnak ah chuah pi a timh ve. Chapter 6 of the Penal Code chung ahcun, Thazaang hmang in hram hram in cozah i cuh nak kong hi a si.

Source:- The Irrawaddy