Ralbawi Lin Htet Aung Cu Mipi Sinah A Dir Cang! (GOOD NEWS)!

Ralbawi Lin Htet Aung cu a dirhmun chuahtak in mipi sinah a dir cang tiah theih a si. Mah hi တြိဂံဒေသတိုင်းစစ်ဌာနချုပ် tangah a ummi Man Pin peng chung Khah-Mah-Yah (ခမရ) 528 ah ralbawi a tuanmi a si. A personal number cu 62136 a si. Kum 2008-9 ah May Myo ralkap sianghleirun in sianginn a dihmi a si.

CRPH upa a pehtlaih hna i atu hi Thailand ramri i tlangcung hriamtlaibu ukmi hmunhma ah a phan tiah theih a si.

Ralbawi Lin Htet Aung nih cun ralkap nih mipi cungah hriamnam ngan in an kahmi, bomb tiang an hmanmi cu keimah ka duhmi ralkap sinak he aa tlak lo tuk caah atu bantukin ka chuahtak hi a si tiah a chim. Amah sinah a kuttang ralkap zeimawzat an ra ve nain an dawi hna i an kah hna caah cheukhat cu an vaivuan, asinain cheukhat cu amah sinah an lan kho tiah theih a si.

Ralbawi Lin Htet Aung nih cun “Ralkap chung i misualral hna ruangah kan ram ah khongton uknak chuah than aa tim cang. Mino hna nunnak tampi a liam cang. Mipi kha ralhrang bantukin zoh le hmuh dingah an cawnpiak hna. Federal Army a dir in cun mipi nih kan tei hrimhrim lai. Atu khi ralkap sing 3 renglo lawng an si ko. Mah lakah ralbawi 75% nih cun ralbawizik hna sualpalhnak an theih tuk ko. An i zukphiak kho rih lo i a si. Biatak tein ral a thawh tikah cun anmah leiah fek tein a dir dingmi cu an tlawmte. Federal Army leiah a dir ding ralkap an tam tuk. Dinnak lei ah kan dir peng lai” tiah a chim.

Ralbawi Lin Htet Aung cu 1992 ah a chuakmi a si caah atu hi kum 29 lawng a si rih. Atu bantukin ralbawi sinak chuahtak in mipi lei ah a dirmi nih ralbawi dang/ralkap dang hna ca zongah an sinak chuahtak in mipi lei dir dingah thazaang a pek hna lai tiah zumh a si.

Crd- Chin Post.