Ralkap Nih Mah Ti Bakin Hin Laitlang Khua Kip An Hlat Thluahmah Cang!

Nihin zing suimilam 10 hrawng ah Haithlan in Ralkap pawl cu an ke in an kal i chun suimilam 12 tluk ah Nabual khua an phan. Laitlang khua kip ah zeidah a cang ti theih duh bak ah mah ti hin an cawl cang i an ngiat thluah mah cang hna. Khuakip ah kal an i tim ko lai tiah zumh a si.

May be an image of sky and tree

“Ralkap pawl hi minung 20 in 30 kar cu an si lai, a pikpak tete le hmun dangdang in khua chung ah hin an rak lut. Hi ralkap an hruaitu hi Major (Kalay lei in aa rak i thial mi) a si i ‘Mipi hnahnawhnak kan in pe hna lai lo, khua le ram kan zoh ta i a si’ a ti i khua chuang ah suimilam 1 hrawng an um hnu ah lungphor motor in Hniarlawn khua lei ah an kai” tiah khuami pakhat sin in kan theih.

Crd- The Hakha Post.

Relchap: Ralkap nih tlaih bal mi U Hting Linn Naing a nunnak a liam

Hakha Ralkap le Palek nih rak tlaih mi U Hting Linn Naing (Kum 27) cu, Ralkap umnak 266 le Palek thonginn ah zaanli an chiah hnu ah chuah a si i, thonginn a chuah hnu ah thin lei damlonak le pawpi lei damlonak in a nunnak a liam.

“Hting Linn Naing hi Yangon, Hlaing Thayar in a ra mi a si i Hakha ah rian a tuan mi a si. Amah hi a hlante in thin lei damlonak le pawpi lei dam lonak a rak ngeicia mi a si i, a dingei pah mi zong a si. Thong in a chuah hnu ah voi khat sii-inn ah aa thlop.

Sii-inn voi khat aa thlop hnu ah tlawmpal a dingei pah than i a voi hnihnak sii-inn ah a va zohter ahcun a thin rian a tuan ti lo tiah an ti i hi bantuk in a nunnak a liam hi a si,” tiah a thi mi chungkhar he naihniam in bia aa ruahtu pakhat nih a chim.

U Hting Linn Naing hi March thla donghlei ah Ralkap nih amah tel in minung panga an rak tlaih hna. Ralkap umnak 266 le Palek Sakhaan ah zaan li chiah an si i a hrem zong an hrem hna. Thonginn in chuah an si hnu ah amah he tlaihti mi hna zong riantuan kho loin ni zeimawzat an i thlop, tiah kan theih.

U Hting Linn Naing cu April 14 zinglei 10:00, Hakha Thlaan No.1 ah Buddhist Biaknak Phung in a ruak an vui.