Trump caah Pennsylvania lei in Thawngpang Chia tak tak kan Theih

Trump caah thawngpang chia tak tak Pennsylvania lei in a chuak. Pennsylvania i court a sangbikmi nih Trump le a team pawl nih tazacuainak an tuahmi mail in tlakmi vote 2.5 million thihternak cun an hlawnh piak diam. Pennsylvania Supreme Court nih cun tuni khan (US Saturday) ah court hme deuh nih order a tuahmi cu a cohlang lo.

Court hme deuh nih hin tutan ithimnak hi cohlang (certify) lo dingin nawlnak a tuah. Tazacuainak nih a duhmi cu hi state chung i mail in vote pawl hi US phunghrampi ning in a kal lo (Unconstitutional) tiah a ti. Hi tazacuainak hi kan hnu thla khan rak up cangmi a si. Cun Trump zong nih voi tampi a chim phuan cangmi a si. Tuni Saturday khan Pennsylvania Supreme court nih a hlawnh piak hi a si. Trump caah cun thawngpang chia tak tak a si. Zeitin US pi hi a kal lai ti ruahawk a tam ngai ngaicang. Source: Daily Mail.

(Mah capar hi van rel chap) US Citizenshp kong ah theih herh ngaimi :Citizen phitnak man le biahalnak pawl a thlen than lai lo: USCIS nih December 1 thawkin US rammi sinak (citizenship) camipuai phitnak an thlen lai timi kha an thlen than lai lo. Pemnak lei NGO pawl nih thlennak nan tuah ding hi a ding lo ( unfair) tiin tazacuainak an tuah caah atu bantukin an ngol thannak asi. Biaceihnak zung nih a ding ko tiin bia a khiah lo chung cu a thlen dingmi phung le lam vialte a takin tuah chuah lo ding in a um cang.

USCIS nih biakhiahnak cu ni 60 chungah ceihpiak than dingin nawlnak tuahnak caan a ngei. USCIS cu mah tik ah cun President thimmi Joe Biden uknak tangah a um cang lai. President Trump nih fimthiamnak a ngeimi pemnak lawng on i a dang pemnak paohpoah kham dingin a zuam. Cucaah President Biden nih zung rian a thawk tikah thlennak pawl kongah zei a cang lai ti cu ka thei lo.

Hi thlennak pawl hi a ngol cang: USCIS nih citizen phitnak N400 ah a man U$ 1170 tiang kai an rak duh. Nain atu cu biaceihnak zung nih a man cu U$ 725 ah um rih ko seh, biaceihnak zung nih na kai kho a ti hlan paoh cu mah zat lawngin a man um ding. USCIS nih biahalnak pawl cu thlen in har deuh in tuah a duh. Biahalnak pawl 128 tiang zoh dingin a um lai a ti. Mah chungah khan biahalnak pawl 20 hal ding ti asi. Biahalnak 20 chungah a tlawmbik 12 na hmaan hrim a herh. Nain atu ahcun biaceihnak zung nih camipuai kong cu biaceihnak zung nih a ding ko tiin a ti hlan paoh cu nan thlen kho lo a ti. Cucaah citizen camipuai phitnak ah biahalnak pawl cu 100 kha a si rih ko lai. Biaceihnak zung nih zulh phung thlen asi a ti hlan chung paoh cu foodstamp/Medicaid hman in phaisa lak lo dingin nawlnak tuah khawh zong asi rih ko lai. (Becky Nelson nih mirangca in a tialmi ka lehmi asi. Becky Nelson cungah ka lawm)

Source: Salai ZT Lian