Chin State Parliament cu um a har tuk lai.

Ka mitthlam: Chin State Parliament cu um a har tuk lai. Tukum cu NLD Chin State ah teinak an hmu than. Chinram kulh thimfung cu an hui dih than. A tha tuk mi thil a si ve ko, major party nih chinram kulh ah hmunhma an ngeih zong cu thatnak a tam ko men lai.

Asinain, ka mithlam ah ka hei cuanter i Parliament chungah khin NLD lawngte an si hnga, hei ti ko usih a fawinak cun. Parliament chungah 25% ralkap nih hmunhma an rak ngeih zong cu khat lei cun a tha ko hlah maw ti hna ka ruahter.

Atu kan dirhmun hin, ralkap nih hmunhma ham cianak rak ngei hna hlah sehlaw, NLD nih Chinram pi cu a duhnak poah ah a hei hruai lai cu mu. Hrihnuh zuamnak ah a par khat te lei lawng ah hnuk ding um i khat ta lei ah ahohmanh an um ti lo ahcun a si kho lo cu. Cuai hun thlai ding zongah a khing a khat ti lo, Parliament chungah a sen lawngte an hei si hnga.

Chinram parliament hin muici i cawh deuh sehlaw a nuam deuh tuk lai ka ti. A sen pawl a cheu nak tam, van dum muici (blue) tlawmpal le ralkap tlawmpal ti bantuk deuh a si ahcun, Chinram caah tha deuh palia hnga. Dum chungah pangpar phunkhat lawng cu zoh zong a dawh lo cun tlawnlen zong a nuam lo. Cucaah, i buaktlak deuh in Chinram Parliament ah hin party pawl hmunhma ngei kho deuh hna sehlaw Chinram zong an dawh ter deuh lai.

Parliament chungah party pakhat nih hmunhma a lak dih ahcun thil pakhatkhat ceihhmai tikah kaan-kuattu an um hmanh ah minung tam deuh hrat nih duhnak in kalpi thiam a si ko lai. Parliament cu ruahnak chuahpi pawl ceihhmai, khat le khat ruahnak i al le chim phuannak hmun a si i, party pakhat nih thutnak tam tuk an lak cu si kho lo. Cucaah, Chinram Parliament chung cu mirang holh ka hlan si cun “Very Boring” a si ko lai.

Credit : Cung Lian Mang KhukZawn