Kan Laipa Nih Kan Pasaltha Hna Zawnruahnak He A Chim Mi Bia Cu Ruahphu Ngai Ngai A Si.

Salai Pa Thawng, “Mipi ralkap le SAC (Min Aung Hlaing) ralkap an i doh i hmursau Media nih Mipi ralkap an tei hna.

Tulio cu thawngpang theih duh cio si kaw, thil a cang mi an kan ttialpiak colh lengmang cu mipi Facebook ah hmunhma khur mi nih cun kan duh ngai ko. Nain kan duh mi nakin kan ralkap caah ttihnung mi a si kho ti kha kan tuaktan kho ti lo.

Thawngpang theih colh lengmang duh cio a si ko rual rual in kan thanh colh mi le video le hmanthlak nih zei tluk tiangin kan Mipi ralkap caah a him lo ti Tiak chih zong cu a hau. Cucaah Col.Solomon Thangding zong nih Media pawl sinah nawlnak bia zong a rak chim kha a si.

Kan kong Media ah tial/ chim tuk rih hlah uh kan him lo hi an ti ahcun i sum hram ko uh sih. Mipi tampi thawng kan theihter khawh mi nakin kan ralkap pakhat a thihnak ding si sual lai kha tuak deuh hram ko uh sih.
Meithal voikhat thlah nih mi pakhat lawng a thah nain Media nih mi a thong in a thah hna an ti bang, kut rang ngai le hmursau ngai in kan tial kan chim mi ruangah kan Miphun pi sunghzatlaknak a phan kho ti zong ruah chih hram ko uh sih.

Phungthluk ah rawl kha ei dih law bia chim dih hlah an ti bang in kan chimh dih mi bia ka khat ruangah na Miphun na thah sual kho zong ralrin kan hau.

Kan theih duh mi thawngpang nakin kan thihnak ding a si ti tu khi pakhatnak ah ruah a herh mi a si.

Credit : Salai Pa Thawng

SAC Van Ralkap Thazang Cuanhnak: Cunglei Kahdohnak Nih Teinak Caah Bia A Khiak Lai Lo.

SAC nih biatak tein cunglei kahdohnak tuah an i timhmi kong cu kan ṭial pah lengmang cang. Camp Victoria kah an timhmi kong zong CHRO nih an Twitter ah an ṭialmi chirhchan in The Chin Post zong nih kan langhter cang. Tanglei kahdohnak ah a sung pengmi SAC nih cunglei kahdohnak dah ti lo bochan ding an ngei ti lo. Cucaah SAC van ralkap thazang kan theih tawk ka rak langhter!

SAC nih MIG – 29, JF – 17, Nanchang Q5, Chengdu J7 le Shangyan J6 hi 83 an ngei. Raldoh cawnnak le phun a chia deuhmi vanlawng 29 le bomb thlaknak vanlawng A5 tlawmpal an ngei fawn. Russia ah SU 30 vanlawng paruk le raldoh cawnnak vanlawng 10 an cah i SU 30 pahnih cu a phan cang. Asinain SU 30 vanlawng hi a tonghtham an thiam rih lo. Russia vanlawng khalhthiam hna nih an cawnpiak cuahmah lio hna a si.

China ah JF 17 16 le raldoh cawnnak vanlawng 50 an cah i cucu tuan ah a phan lai tiah zumh a si. Cun hriamnam le thilri dang phawrhnak vanlawng 25, MI 35 Helicopter 9 le zeica paoh ah hman khawhmi vanlawng 70 hrawng an ngei.

SAC van ralkal hmunpi hi 10 a um. Atu tiangah Mingalardon, Hmawbi, Taungoo, Meikhtila, Magwe le Thadaoo van ralkap hmunpi in cunglei kahdohnak hi an tuahmi a si. Bomb an thlak tawnmi Pond 500 a ritmi an si. Pond 1,000 a ritmi hi voihnih thum cu an hman ve. Miakpi kuanfang a hmemi phun le 30 mah-mah seh meithal zong an hman ngai.

A cunglei hi SAC van ralkap thazang kan theih khawh tawk a si i mah nakin a tam deuh kho. Asinain a biapi deuhmi cu cunglei kahdohnak nih teinak caah bia a khiak kho lai maw ti hi a si.

Vietnam ral kha 1955 in aa thok i 1965-1975 tiang, kum 10 chung US kha Vietnam ral ah aa tel. Vietnam ral cu Chaklei Vietnam le Thlanglei Vietnam i dohnak a si. Dimawkaresi (Democracy) a duhmi Chaklei Vietnam cu US le nitlaklei ram hna nih an bawmh i Kawmionit (Communist) a duhmi Thlanglei Vietnam cu Kawmionit ram nih an bawmh ve.

Vietnam ral lioah US ralkap nih cunglei kahdohnak an tuahmi zat hi nuai 5 renglo a si i bomb an thlakmi hi ralpi pahnihnak lio i ramkip nih bomb an thlakmi zat nakin a tam deuh ti a si. Vietnam ral lio i US nih vanlawng le hriamngan a hmanmi hna kha, kha lioah cun a ṭhabik timi an si. Asinain US nih cunglei kahdohnak biatak tein a bawmhmi Chaklei Vietnam cu April 30, 1975 ah ral an sung diam ko.

October 7, 2001 ah aa thok i August 30, 2021 ah a dihmi, kum 20 chung a raumi Afghanistan ral lio zongah US le a hawikom ram hna nih cunglei kahdohnak an bawmh. Hriamnam ṭhaṭha an hman. Afghanistan ral ah tangka an hmanmi dihlak US Dollar trillion tiang a phan. Asinain Taliban nih Afghanistan cu an lak ko.

Vietnam ral ah siseh Afghanistan ah siseh US nih hriamnam ṭhaṭha hmangin cunglei kahdohnak an bawmh hna nain an sung ko. US nakin a zeilei paoh ah a niam deuhmi SAC nih cunglei kahdohnak an tuahmi hi zeimawzat cu a bawmh khawh hna lai nain teinak caah biakhiaktu a si lem lai lo. A biapi mi cu mipi le dohthlennak ralkap hna hi ralṭha le lungrual tein i funtom a si. Mipi thazang hi SAC van ralkap thazang nakin a ṭhawng deuhmi a si.

Salai CP Lian
CEO, The Chin Post
Nov 8, 2022