Kawl Ralkap Botor Pawl kong ah Yangon i RC Biaknak lei lutlai zong a um sawh sawh kho ti lo.

Yangon i RC biaknak lei lutlaibik pakhat a simi Cardinal Charles Bo , Archbishop of Yangon nih cun Kawl Ralkap nih an tlaihmi Suu Kyi le President U Win Myint cu a ran khawh chungin chuah dingin nawlnak a tuah cang. Tutan ah hin biaknak lei upa zong an um sawh sawh kho ti lo. Raltha tak takin an duhmi an dirpi cang. Atu tiang Suu Kyi le President U Win Myint le hruaitu lutlai hna cu mipi hmuh ding ah an chuak rih lo.

Suu Kyi le tlaihmi midang pawl hi hmuh khawh hrim an si lo. Kawl Ralkap nih an hren peng hna. Hi kong he pethlaiin Cardinal Charles Bo nih cun zahan tihni ca cawn ni thumni (Wednesday) ah khan a rannak in Suu Kyi le a minung pawl hi chuah dingin nawlnak (Statement) a chuah. Tutan buainak hi biaruahnak tha tein daihter dingin a duhnak a langhter.

Cun, ramdang dang hna zong  Kawlram sipuaizi lei dantatnak a tuah hnikmi cu tha deuh tein khua ruat dingin a chim fawn. A liamcia Kawlram tuanbia zoh tikah sipuaizi lei philh khamhnak nih hin minung million tampi sifahnak tu a phak deuh tiah a langhter.

Cun, tutan Kawlram buainak ah mipi hna cu dai tein um ding in le buainak chuahpi bak lo dingin nawlnak zong atuah chih. Cardinal Charles Bo catialmi a langhter hlan deuh te hin Yangon i ralkap Bawi  Yangon Region military commander nih cun Cardnal Charles Bo hi Yangon i a umnak a inn bak ah a rak ton. Minute 15 hrawng an biaruahnak an ngei. Zeikong dah Ralkap lei nih hin an chim timi belte langhter  asi lo. Source : Irrawaddy News